Nehemias 13 - Maung A Balita Biblia

Say Ag Piolup ed saray taga Arum a Bansa

¹ Nen nibabasad saray totoo so Ganggan nen Moises asabi so parti ya ibabaga ton sebel a mikasakey ed saray totoo na Dios iray Ammonita odino saray Moabita.

² Say makasengeg ed saya et lapud saray Ammonita tan saray Moabita et ag da initdan na nakan tan nainom iray Israelita nen peles dan tataynan so Egipto. Binayaran da ingen na kuarta si Balaam a mangisambad saray Israelita, balet say Dios tayo impagmaliw ton bindision imay samba.

³ Nen nadngel na saray totood Israel yan parti na Ganggan pinaekal dad olupan da iray amin a taga arum a bansa.

Saray Pasimbalon Ginawa nen Nehemias

⁴ Si Eliasib a pari a makaoley nen saman ed saray kuarton panagsinupan ed Timplo et abayag a maabig so pipiolup tod kinen Tobias.

⁵ Inabuloyan ton ikana nen Tobias so sakey a baleg a kuarto a nigana a pangisinupan labat na saray bagat a trigo tan insinso, saray kagawaan ya ikakanad Timplo, saray bagat a para saray papari, tan saray kakaplo na trigo, alak, tan larak na oliba a rigalod saray Levita, saray tumutogtog tan saray kumakantad Timplo, tan saray guardiad Timplo.

⁶ Nen onyay nagagawa, anggapo ak ed Jerusalem, ta diad kumatalomplo tan duan taon na panaari nen Artajerjes ed Babilonia pinmawil ak diman a mangibalitad sikato. Ag abayag inabuloyan to ak

⁷ ya ompawil ed Jerusalem. Nikelawan ak ed impakaamtak ya inabuloyan nen Eliasib si Tobias a mangikana na sakey a kuarto na Timplo.

⁸ Mapalaloy petang na olok ed saman tan imbantak kod paway iray amin a kayaryan nen Tobias.

⁹ Ingganggan kon nalinisan imay kuarto onung ed ganggan; ingganggan ko met a nipawil diman iray kagawaan na Timplo, saray bagat a trigo, tan say insinso.

¹⁰ Akabatan ko met a tinaynan na saray tumutogtog tan saray kumakanta, tan saray Levita so Jerusalem ta pinmawil irad kaalogan da. Onyay agawa, lapud kulang a pambilay da so iiter na totood sikara.

¹¹ Nampasnukan ko ray opisyal lapud impangyabuloy dan nakaindan so Timplo. Pinapawil kod Timplo iray Levita tan saray tumutogtog tan saray kumakanta ed Timplo, insan ko ra impankimey lamet.

¹² Inggapo lamet na saray totood Israel so mangyakar ed saray kuarton panagsinupan ed Timplo na kakaplo na trigo, alak, tan larak na oliba ra.

¹³ Impasen kon makaoley ed saray kuarton panagsinupan iray onggendan a lalaki: Semaya a pari: Sadoc ya iskriba; tan Pedaya a Levita. Si Hanan a lakin anak nen Zacur tan apo nen Matanias so katulong dad kimey. Walay panagmatalek kod sikaran ibunog dan anggapoy saol ed saray kapara ran kumikimey iray abasto.

¹⁴ O Dios ko, nudnunot mo pa ra yan amin a ginagawak a para Timplom tan say panangigalang a nagawad dalem to.

¹⁵ Diad saman a panaon akanengneng ak ed Juda na saray totoon mamepespes na ubas no Agew na Panagpainawa. Saray arum papanoen day beneg na saray asno ra na trigo, alak, ubas, igos, tan arum ni ran bengatla, insan da iyaakar ed Jerusalem; pinasakbayan ko ran ag ira mangilalako ed saman ya agew.

¹⁶ Wala ray pigaran totoon taga siudad na Tiro a manaayam ed Jerusalem a mangaawit irad siudad na saray sira tan amin a klasin sasaliwen, ta ilalako rad saray totoo mi no Agew na Panagpainawa.

¹⁷ Nampasnukan ko ray pangulo na saray Judio tan inkuankod sikara, “Nengneng yoy kaogsan a gagawaen yo! Gagawaen yon aliwan masanto so Agew na Panagpainawa.

¹⁸ Onya so makasengeg na anusaan na Dios ed saray lalaki yo, nen dineral to yan siudad. Balet say Dios et lalon papepetangen yoy olo tod Israel diad panggagawa yon aliwan masanto so Agew na Panagpainawa.”

¹⁹ Ingganggan ko a kagapo na kapag Agew na Panagpainawa, diad kapansironget ikaput iray puirta na siudad tan ag ira lolokasan ya anggad asumpal lay Agew na Panagpainawa. Angipasen ak ed saray puirta na pigarad saray totook, pian naasikaso ran anggapoy bengatlan niloob ed siudad no Agew na Panagpainawa.

²⁰ Aminsan o amidwa, saray nigosianti na amin a klasin sasaliwen et nampalabas iray labi na Biarnes diad paway na padir na siudad.

²¹ Pinasakbayan ko ra, “Akin et wadya kayo? No gawaen yo niy onya dusaen ta ki la.” Nanlapu lad saman ag la ra pinmawil ed Agew na Panagpainawa.

²² Ingganggan ko ray Levita a linisan day sikaran dili onung ed ganggan, insan ira onlan mangguardiad saray puirta pian naasikaso ran masanto lawas so Agew na Panagpainawa. Nudnunot mo ak pa, O Dios, lapu met ed saya, tan ag mo ak papaolyan lapud kabaleg na ag mangoman a panangarom.

²³ Diad saman met a panaon akabatan ko a dakerakel iray Judion lalaki ya angaasawa na saray bibiin taga Asdod, Ammon, tan Moab.

²⁴ Say kapaldua na saray anak da et ikana ray salita ed Asdod odino salita tayo.

²⁵ Nampasnukan ko ra may lalaki tan insambak ira. Pinepepekpek ko ra tan inggogonut ko ra. Impansambak ira diad ngaran na Dios ya ag la ra mangasawa na saray bibiin taga arum a bansa.

²⁶ Inkuankod sikara, “Saray bibiin taga arum a bansa so makasengeg na impankasalanan nen Ari Solomon, anggaman a matalonggaring ni nen saray ararid arum a bansa, tan anggaman a diad panangaro na Dios ed sikato ginawa ton ari ed intiron Israel, apattak ed sayan kasalanan.

²⁷ Aligin mi sirin so ginawa yo tan sumlangen mi so Dios diad pangasawa mid saray bibiin taga arum a bansa?”

²⁸ Si Joiada a lakin anak nen Eliasib so Pangulon Pari. Balet inasawa na sakey ed saray lalakin anak to so anak nen Sanbalat a taga baley na Bet-horon, kanyan pinataynan kod Jerusalem si Joiada.

²⁹ Nudnunot mo pa, O Dios, no panon so impandotak na sarayan totoo ed inkapari tan say inpisipanan mod saray papari tan saray Levita.

³⁰ Nilinisan ko ray totoo ed antokaman a marotak ya inawit na totoon taga arum a bansa; angipaakseb ak na saray totontonen para saray papari tan saray Levita pian naamtaan na balang sakey ed sikara so kimey to;

³¹ impaiyakar kod manepeg a panaon iray kiew a pampool na saray bagat; impaiyakar ko met ed saray totoo iray bagat dan ononan anien a trigo tan saray ononan borboren a bunga. Ag mo lilingwanan yan amin, O Dios, tan tumangan mo ak pa.