Nehemias 11 - Maung A Balita Biblia

Saray Totoon Nanayam ed Jerusalem

¹ Nanayam ed Jerusalem iray pangulo, nampapalaranan balet iray arum a totoo no dinan a pamilya ed kapag samplora so manayam ed masanton siudad na Jerusalem. Saray arum a pamilya et nepeg a manayam la rad saray arum a siudad tan saray arum a baley.

² Indayew na amin a totoo so siopaman nin maabuloy a manayam ed Jerusalem.

³ Diad saray arum a siudad tan baley saray totood Israel, saray papari, saray Levita, saray kumikimey ed Timplo, tan saray kabyangay boleg da ray aripen nen Solomon et nanayam irad dilin dalin da diad saray dilin baley da. Say onggendan et say listaan na saray manonan totood luyag na Juda a manaayam irad Jerusalem.

⁴ Saray kabyangay tribu nen Juda: Si Ataya a lakin anak nen Uzias tan apo nen Zacarias. Saray arum a lalaki to et di Amarias, Sefatias tan Mahalalel a kabyangan iray boleg nen Fares a lakin anak nen Juda.

⁵ Si Maasias a lakin anak nen Baruc tan apo nen Colhose. Saray arum a lalaki to et di Hazaya, Adaya, Joarib, tan Zacarias a kabyangan iray boleg nen Sela a lakin anak nen Juda.

⁶ Diad saray kabyangay boleg nen Fares apat a lasus, anemaplo tan walo a matalonan lalaki so nanayam ed Jerusalem.

⁷ Saray kabyangay tribu nen Benjamin: Si Sallu a lakin anak nen Mesullam tan apo nen Joed. Saray arum a lalaki to et di Pedaya, Colaya, Maasias, Itiel, tan Jesaias.

⁸ Di Gabai tan Sallai ya asingger so pikanayon dad kinen Sallu. Siam a lasus, duan lasus tan walomplon amin iray kabyangay tribu nen Benjamin a nanayam irad Jerusalem.

⁹ Si Joel a lakin anak nen Zicri so pangulo ra, tan si Juda a lakin anak nen Senua so onkumadwan opisyal na siudad.

¹⁰ Saray papari: Si Jedaya a lakin anak nen Joarib, tan si Jakin.

¹¹ Si Seraya a lakin anak nen Helcias tan apo nen Mesullam. Saray arum a lalaki to et di Sadoc, Meraiot, tan Ahitob a Pangulon Pari.

¹² Walon lasus, duamplo tan duan amin iray kabyangan na sayan boleg a nanlingkur ed Timplo. Si Adaya a lakin anak nen Jeroham tan apo nen Pelalias. Saray arum a lalaki to et di Amzi, Zacarias, Pasur, tan Malkias.

¹³ Duan lasus, apataplo tan duan amin iray kabyangan na sayan boleg a sikaray pangulo na saray pamilya. Si Amasai a lakin anak nen Azarel tan apo nen Azai. Saray arum a lalaki to et di Mesillemot tan Imer.

¹⁴ Sanlasus, duamplo tan walon kabyangan na sayan boleg iray matalonan sondalo. Say pangulo ra et si Zabdiel a kabyangay sakey a pamilyan matalona.

¹⁵ Saray Levita: Si Semaya a lakin anak nen Hasub tan apo nen Azricam. Saray arum a lalaki to et di Hasabias tan Buni.

¹⁶ Di Sabetai tan Josabad, saray matalonan Levita a makaoley ed kimey diad paway na Timplo.

¹⁷ Si Matanias a lakin anak nen Mica tan apo nen Zabdi, tan kabyangay boleg nen Asaf. Impangulo to ray kumakantad Timplo diad panagkanta ray dasal na pisasalamat. Si Bacbukias a katulong nen Matanias ed kimey to. Si Abda a lakin anak nen Samua tan apo nen Galal, tan kabyangay boleg nen Jedutun.

¹⁸ Duan lasus, walomplo tan apat ya amin iray Levitan nanayam ed masanton siudad na Jerusalem.

¹⁹ Saray Guardia ed Timplo: Di Akub, Talmon tan saray kakanayon da; sanlasus, pitomplo tan dua ran amin.

²⁰ Saray arum a totood Israel tan saray arum a papari tan saray Levita et nanayam irad dilin dalin da diad saray arum a siudad tan baley na Juda.

²¹ Saray kumikimey ed Timplo et nanayam irad Ofel a sakop na Jerusalem. Di Ziha tan Gispa so angipangulod sikara ed kimey.

²² Say pangulod kimey da ray Levita a nanayam ed Jerusalem et si Uzi a lakin anak nen Bani tan apo nen Hasabias. Saray arum a lalaki to et di Matanias tan Mica, tan kabyangay boleg nen Asaf, say boleg a makaoley ed togtog tan kanta ed saray sirimonyad Timplo.

²³ Wala ray totontonen ya impaakaseb na ari nipaakar ed pansosoblay na saray boleg a mangipangulo ed inagew-agew a togtog tan kanta ed Timplo.

²⁴ Si Petahias, a lakin anak nen Mezezabel tan kabyangay boleg nen Zera tan say tribu nen Juda, so angilaman ed saray totood Israel diad korti na Persia.

Saray Totoo ed saray Arum a Baley tan Siudad

²⁵ Amayamay iray totoon nanayam ed saray baley ya asingger ed kaalogan da. Saray kabyangay boleg na tribu nen Juda et nanayam irad Kiryat-arba, Dibon, Jecabseel, tan diad saray barion asingger ed sarayan siudad.

²⁶ Nanayam met ira ed saray siudad na Jesua, Molada, Bet-pelet,

²⁷ Hazar-sual, tan diad Beer-seba tan saray kaliber-liber ton bario.

²⁸ Nanayam irad siudad na Siklag, diad Mecona tan saray kaliber-liber ton bario.

²⁹ Nanayam irad baley na Enrimon, Zora, Jarmut,

³⁰ Zanoa, Adullam, tan diad saray kaliber-liber dan bario. Nanayam irad Lakis tan diad kaalogan to, diad Azeca tan saray bario to. Saray totood Juda nanayam ira sirin ed dalin a nanleetan na Beer-seba diad abalaten tan say Patar na Hinom diad baybay.

³¹ Saray totood tribu nen Benjamin nanayam irad saray siudad na Geba, diad baybay ya anggad Micmas, Ai, Betel tan saray kaliber-liber ton bario,

³² Anatot, Nob, Ananias,

³³ Hazor, Rama, Gitaim,

³⁴ Hadid, Zeboim, Neballat,

³⁵ Lod, tan Oni, tan diad Patar na saray Marunong a Kumikimey.

³⁶ Saray pigaran grupo na Levita a gendat a nanayam irad dalin na Juda et nipabetang ed sikara a miayam irad dalin na saray totood tribu nen Benjamin.