Nahum 3 - Maung A Balita Biblia

¹ Pangaskasiyan so kipapasen na siudad a managpatey na too, say siudad a napno na kayamanan a samsamen.

² Dengel yo! Say sanotsut na lewet, say kalarakar na saray dalig, say banesbes da ray kabayo, say dalagorug na saray karwahin para bakal!

³ Ondedepdep iray akakabayo, mankidyam iray ispada tan saray pika! Ag nabilang iray bangkay ya abunbunton— nataktakbaan ira na saray totoo.

⁴ Nadudusa la so Ninive ya aliling toy marotak a bii. Makaay-ayat tan makapatey so ganggana to, kanyan pinalikdo to ray bansa tan inaripen to ra.

⁵ Say Katawan a Makapanyarin-amin kuanto, “Dusaen ta ka, Ninive! Ekalan ta kay kawes tan ipanengneng ta kad saray bansa, et nanengneng day pakababaingan mo.

⁶ Kabosulen ta ka tan kobutan ta ka na dotak. Sitatakot ya onnengneng ed sika iray totoo.

⁷ Arawian ka na amin a makanengneng ed sika. Ikuanda, ‘Aderal-deral so Ninive. Siopay mangakasi ed sikato? Siopay malabay a manligliwad sikato?’”

⁸ Ninive, daeg mo ni so Tebes a manonan siudad na Egipto? Wala met so ilog ton mangyagel ed sikato nen saman a singa atagey a padir—say Ilog na Nilo so tirinsira to nen saman.

⁹ Inoleyan toy Sudan tan say Egipto, anggapoy anggaan na pakayari to; kagampi to so Libia.

¹⁰ Balet saray totood Tebes et nibantak irad arum a bansa. Diad inerman a sokung na dalan, saray anak da et nipaspas ira ya anggad ag da impatey. Agolunggolungan a niakar ed arum a bansa iray manonan totoo ra tan nanaapagan ira na saray akadakep ed sikara.

¹¹ Ninive, magmaliw ka met a singa abuek a mandongilngil! Ibatikan mo met iray kalaban mo.

¹² Amin da ray tirinsiram et magmaliw iran singa saray kiew na igos ya aluluto la ray bunga ra: yugayog moy sengeg da et napelag lad sangim iray bunga ra!

¹³ Singa bibii iray sondalom, tan akaparontal ya anggapoy nagawaan ed arap na saray kalaban mo so bansam. Temeken na apoy iray balewet na saray puirtam.

¹⁴ Mantipon kay danum a pangiparaan mod panlakob dad sika, tan pabiskeg mo ray tirinsiram! Gatin-gatinan mo ray pitek, ta manggawa ka na saray laryo, tan iparaan mo ray pampeket ed sikara!

¹⁵ Anggan antoy gawaen mo, napoolan ka nin siansia ya anggad ipatey mo odino napatey ka ed bakal. Naandipat kan singa saray tanaman ya inoput na saray dorun. Dinmakerakel kan singa saray dorun!

¹⁶ Dakel ni nen saray bitewen ed tawen so impamarakel mod saray nigosiantim! Balet natan naandipat la ra, a singa saray dorun ya imbuskag da ray payak da tan tinmikyab la rad arawi.

¹⁷ Saray opisyal mo et singa sakey ya olup na amayamay a dorun a pinmepeket ed saray padir diad agew ya ambetebetel so panaon. Balet no ompaway lay agew, ontikyab la ra, tan anggapoy makaamta no iner so nakar da!

¹⁸ Ari na Asiria, inaatey la ray gobirnador mo, tan ag la nabangon a balut ed ogip da iray manonan totoom! Ataytayak ed kapalandeyan iray totoom, et anggapoy mamasempet ed sikara.

¹⁹ Anggapo lay panambal ed saray sugat mo, tan ag la ra naabigan. Mantipak ed liket iray amin a makarengel ed balitan nipaakar ed inkaderal mo. Wala tay akapaliis ed ag manganggan inkaruksam?