Nahum 2 - Maung A Balita Biblia

Say Katalo na Ninive

¹ Ninive, nadodogpaan da ka la! Sinmabi lay pakayarin manemek ed sika. Paguardiaan mo ray tirinsira tan saray daladalan! Mamparaan kan mibakal! (

² Ngalngali la ipawil na Katawan so kagalangan na Israel, a singa samay kagalangan to kasakbayan a sinasamsaman na saray kalaban to.)

³ Sankaawit na saray kalaban ton sondalo iray ambalangan samper, tan akasolung iran amin na ambalanga. Mampaparaan iran ondogpa! Mankidyam a singa apoy iray karwahi ra! Mankitapbo iray kabayo ra!

⁴ Mambanesbes ed saray dalan iray karwahi, ompawil onsulong irad saray plasa na siudad. Mankidyam iran singa apoy ya impotan tan mankidyam iran singa kirmat.

⁵ Atawag iray opisyal; mamkitakba ra diad idadago ra. Mapmaples ya onsisingger ed padir iray ondogpa tan ililira da so samper na panagbongbong na padir.

⁶ Biglan alokasan iray puirtad gilig na ilog; sinmabiy baleg a takot ed palasio.

⁷ Nalan adakep so riyna; maermen iray aripen to, singa ra managlem a malapati, tapok-tapoken dad ermen so kapagewan da.

⁸ Singa ompapaway a danum ed abwang a dipositoway danum iray totoon ontataynan ed Ninive! “Tonda kayo! Tonda kayo!” kuay eyag—balet anggapoy ompawil.

⁹ Samsam yo ray pilak! Samsam yo ray balituk! Napno na kayamanan so siudad!

¹⁰ Aderal la so Ninive, ataynan lan begtebegtew! Napoponaw ed takot iray kapusuan, mankalog iray pueg, naandi lay biskeg; mampotiy bosaleg iray kalupaan.

¹¹ Iner so kawalaan natan na samay siudad a nen saman et singa balaung na saray lion, say pasen a pangakanan da ray anak na lion, a dimay lalaen na lion a kalakyan tan kabatyan ya arawid kaatapan iray anak dan angkelag.

¹² Pinatey na lion so narel ton ayep tan biningbingkas ton kanen na asawa to tan saray anak ton ankelag; pinano to na abingbingkas a laman so balaung to.

¹³ “Siak so kalaban mo!” kuay Katawan a Makapanyarin-amin. “Poolan ko ray karwahim. Napatey ed bakal iray sondalom, tan alaen kon amin iray bengatlan sinasamsam mod saray arum a bansa. Ag la narengel so antokaman ya ibaga na saray ibabakim.”