Mikias 7 - Maung A Balita Biblia

Say Marotak a Panagbilay na Israel

¹ Pakaskasi ak la! Singa ak sakey a toon narasan ya anggapoy narumog ton akeraan a bungay kakiewan tan anggapoy bungay ubas a nakdaan ed saray wakal. Aborbor ya amin iray bungay ubas tan amin a masamit ya igos.

² Anggapo lay nakdaan ya anggan sakey a matonung a too ed bansa, anggapo lay toon matoor ed Dios. Balang sakey a too et manaalagar na pankanawnawa ton mamatey ed kapara ton too. Balang sakey et labay ton erelen so siopaman a kadalaan to.

³ Amin da et masilib a manggaway kaogsan. Onkekerew na pasoksok iray opisyal tan saray huis. Say toon gagalangen ed bansa et ibabaga tod sikaray labay ton naala o nagawa, et mankokomplut la ra.

⁴ Anggan say sankamaungan tan sankatonungan ed sikara et singa la andi-kakanaan a dika. Sinmabi lay agew a dusaen na Dios iray totoo, onung na pasakbay ed sikara na saray managbantay ed sikara, salanti saray propita. Agolo-golo la ra natan.

⁵ Ag yo sisigsiaen so kaabay yo odino panmamatalkan so kaaro yo. Alwaran yoy ibabagayo ed anggan dilin asawa yo.

⁶ Diad sarayan panaon saray lalakin anak et ipapasen dan makulang-kulang iray kaamaan da, sumpaen na saray bibii so kainaan da, tan kolkolen na saray malangwer a bibii iray katolangan dan bibii; saray kalaban na sakey a laki et saray dilin kabyangan na pamilya to.

⁷ Balet para siak, say Katawan so pampilalekan ko; sitatalek ak a manalagar ed Dios a manangilaban ko. Dengelen ak na Dios ko.

Say Panangilaban na Katawan

⁸ Anggapoy makasengeg na panelekelek ed sikami na saray kalaban mi. Atumba kami, balet ombangon kami lamlamang. Wala kamid kabilongetan natan, balet itdan kami na Katawan na liwawa.

⁹ Nankasalanan kamid Katawan, kanyan nepeg min itepel a magano so pasnuk to. Balet diad kaonuran iyagel to kami tan pagmaliwen ton pankaabigan mi so maoges ya agawad sikami. Agwaten to kami ed liwawa; mambilay kamin nanengneng mi so panangilaban to.

¹⁰ Diad satan saray kalaban mi nanengneng da yan nagawad sikami et napelag irad satan ed kakabaingan, saray kalaban min angikuan ed sikami, “Iner so kawalaan na Katawan a Dios yo?” Nanengneng mi ran natalo, a nagatingatinan ira a singa pitek ed saray dalan.

¹¹ Sikayo ran totood Jerusalem, onsasabi lay panaon na pangipaalagey lamet ed saray padir na siudad. Diad satan iran agew onawang so dalin yo.

¹² Ompawil ed sikayo iray kadalaan yo a manlapu rad nandoroman pasen—manlapu rad Asiria ed bokig, diad Egipto ed abalaten, diad dalin na Ilog na Eufrates, diad saray ararawin dayat tan kapalandeyan.

¹³ Balet magmaliw a kabueran so mundo lapud saray maoges a gagawaen na saray totoon manaayam.

Say Panangaro na Katawan ed Israel

¹⁴ Katawan, sika pay mampastol ed saray totoon pinilim. Anggan manaayam iran mambukbukor ed kalawakan, walay mataban dalin ed kaliber-liber da. Ipaarap mo pa ran mangan ed saray malambut a pastolan ed Basan tan Galaad a singa ginagawa ra nen saman.

¹⁵ Manggawa ka pa na saray milagro ed sikami a singa samay ginawam diad saramay agew ya impaway mo kamid Egipto.

¹⁶ Nanengneng ya na saray bansa, et nalemay ira anggaman a mabisbiskeg ira. Diad kalemay da ikopit day sangi ra tan pepetan da ray layag da.

¹⁷ Manilos irad dabuk a singa oleg; ompaway irad saray tirinsira ra, manggiwgiw tan natatakot ira. Ondago ran sitatakot ed Katawan a Dios mi.

¹⁸ Anggapoy dios a singa sika, O Katawan; pipirdonaen moy kasalanan da ray totoom ya apaliisan day patey. Ag ka mampasnuk ya ando lan ando, no ag ta panliketan mon ipanengneng so ag mangoman a panangarom.

¹⁹ Sika so mangasi lamet ed sikami. Igatin-gatin mo ray kasalanan mi tan ipalereg mo rad dalem na dayat!

²⁰ Ipanengneng moy inkatoor tan say ag mangoman a panangarom ed saray totoom, saray kabyangay boleg di Abraham tan Jacob, onung na insipan mod saray lalaki mi, nen saman nin panaon.