Mateo 6 - Maung A Balita Biblia

Say Bangat a nipaakar ed Panangasi

¹ “Manalwar kayo, ta ompan ipanta yod saray totoo so panggagawa yoy kaabigan. No ontay gawaen yo, anggapoy naalagar yon tumang a manlapud Ama yon walad tawen.

² “Kanyan no mangiter kay payabol, ag ka mamapaknul na trumpita a pangipakabat mo, a singa gagawaen da ray totoon mansimpisimpitan diad saray sinagoga tan daladalan. Gagawaen da ya pian idayew iray totoo. Tandaan yo ya! Naawat da lay tumang da.

³ No mangiter kay payabol, ag mo ipapaamta ed anggan siopa a maasingger ed sika.

⁴ Gawam yan anggapoy makaamta, tan say Amam a makakanengneng na gagawaen mod maamut so mangiter na tumang ed sika.”

Say Bangat a nipaakar ed Panagpikasi

⁵ “No mampikasi kayo, ag kayo mialalig ed saray mansimpisimpitan a totoo. Labalabay day akaalagey a mampikasi diad saray sinagoga tan suysuyok na dalan, pian nanengneng iray amin a totoo. Tandaan yo ya! Naawat da lay tumang da.

⁶ No mampikasi ka, loob kad kuartom tan ikaput moy puirta, insan ka mampikasi ed Amam ya ag nanengneng. Say Amam a makakanengneng na gagawaen mod maamut so mangiter ed sika na tumang.

⁷ “No mampikasi kayo ag kayo mangikakanay amayamay ya andi-kakanaan a salita, a singa gagawaen da ray Hintil. Say abaloan da dengelen iray Dios no andorokey iray pikakasi ra.

⁸ Ag yo ra aaligen! Amta la na Ama yo iray nakakaukolan yo, kasakbayan yo ran kerewen.

⁹ Onyay pampikasi yo sirin: ‘Ama min walad tawen: Nagalang komuy ngaran mo;

¹⁰ onsabi la komuy Panarian mo; nagawa komun ed tapew na dalin so linawam a singa pakagagawa to ed tawen.

¹¹ Itdan mo kami pay kanen mid sayan agew.

¹² Pirdonam pa iray kasalanan mi, a singa pamipirdona mid saray nankasalanan ed sikami.

¹³ Tan ag mo kami pa iyaakar ed pakatuksoan, no ag ingen iyagel mo kamid samay Maoges.’

¹⁴ “Ta no pirdonaen yo ray mankakasalanan ed sikayo, pirdonaen ki met na Ama yon walad tawen.

¹⁵ Balet no ag yo pirdonaen iray mankakasalanan ed sikayo, ag ki met pirdonaen na Ama yon walad tawen.”

Say Bangat a nipaakar ed Panagayuno

¹⁶ “No manayuno kayo, ag yo aaligen iray mansimpisimpitan a totoo. Liberliber iran nengneng day maermen tan narasan, pian naamtaay totoon manaayuno ra. Tandaan yo ya! Naawat da lay tumang da.

¹⁷ No manayuno ka, mandilamos tan mansagaysay ka,

¹⁸ pian ag naamtaay totoo so panaayunom; say Amam labat ya ag nanengneng so makaamta. Say Amam a makanenengneng ed sika ed maamut et tumangan to ka.

Say Kayamanan ed Tawen

¹⁹ “Ag kayo mantitipon na kayamanan diad dalin para sikayon dili, ta nayarin deralen na bokbok tan lati, o natakew ni.

²⁰ Ingen, mantipon kayoy kayamanan diad tawen a para sikayon dili, ta ag diman nayarin deralen na bokbok tan lati tan ag met natakew.

²¹ Ta no iner so kawalaay kayamanan mo, diman met so kawalaay pusom.”

Say Silew na Laman

²² “Say mata so pinagkasilew na laman. Kanyan no anggapoy sakit na matam, naliwawaan met so intiron laman mo.

²³ Balet no walay sakit na matam, nabilongetan met so intiron laman mo. Kanyan no say liwawan walad sika et bilonget manaya, agaylay bilonget!”

Say Dios tan say Kayamanan

²⁴ “Anggapoy toon makapanlingkur ed duaran amo, ta bosulen toy sakey tan aroen toy sakey, panlingkuran toy sakey tan balawen toy sakey. Ag kayo makapanlingkur ed Dios tan say kayamanan.

²⁵ “Sikato yay makasengeg na pangibabagaan kod sikayo ya ag kayo mapagpagad pambilay yo, no antoy kanen tan inomen yo, o antoy ikawes yo. Ag ta mamabli niy bilay nen say kakanen? Ag ta mamabli niy laman nen say kawes?

²⁶ Imano yo pa ray manok ed tagey. Ag ira mantatanem, ni manaani, ni mantitipon ed kamalir na nakan. Anggaman ontan, papakanen iray Ama yon walad tawen. Ag kayo ta mamabli nen saray manok?

²⁷ Siopad sikayo so makaparokey na bilay to na anggan saksakey a bekta, lapud pampaga to?

²⁸ “Tan akin et mapagpaga kayod ikawes yo? Imano yo pa no panoy ibabaleg da ray rosas a balang. Ag ira mankikimey; ag ira manggagaway ikawes da.

²⁹ Anggaman ontan, ibagak ed sikayo: anggan si Solomon a mayaman ag akapankawes na onyan kinarakep na sakey ed sarayan rosas.

³⁰ No say Dios so mangakawes ed saray karikaad kaalogan, a mabilay ira natan tan napoolan la ra nabwas, ag lalo kasin kawesan to kayo? Agaylay kapoy na pananisia yo!

³¹ Kanyan ag kayo mapagpaga. Ag kayo tepet a tepet na: ‘Antoy kanen mi kasi?’ o ‘Antoy inomen mi kasi?’ o ‘Antoy ikawes mi kasi?’

³² Sikara yay aanapen na saray Hintil. Amtay Ama yod tawen a nakakaukolan yo ra yan amin.

³³ Sikayo, balet, anap yon onona so Panarian na Dios tan say pambilay yon onung ed linawa to, et iter tod sikayoy amin a nakaukolan yo.

³⁴ Ag kayo sirin mapaga ed nakaukolan yo nabwas, ta say ontombuk ya agew makaoley lad saray dilin kapagaan to. Ag yo la iyaarum ed sayan agew iray kapagaan nabwas.”