Mateo 4 - Maung A Balita Biblia

Say Impanuksoy Diablo ed kinen Jesus

¹ Inyakar na Ispiritu si Jesus ed kalawakan a tuksoen na Diablo.

² Kasumpal nen Jesus a nanayunoy apataplon agew tan labi, narasan.

³ Nitan met lay mananukso tan inkuanto, “No sikan talagay Anak na Dios, iganggan mod sarayan bato a magmaliw iran tinapay.”

⁴ Inmebat si Jesus, “Onya so ibabagay Masanton Sulat: ‘Aliwa labat a tinapay so pambilay na too, no ag pati amin a salitan ibabalikas na Dios.’”

⁵ Insan inyakar na Diablo si Jesus ed toktok na Timplo diad Masanton Siudad,

⁶ tan inkuanto, “No sikan talagay Anak na Dios, tabuy ka! Ta ibabagay Masanton Sulat: ‘Iganggan na Dios iray anghil ton mangasikasod sika; ampayaen da kad lima ra, pian diad bato anggan saray salim ag mo ra nitopa.’”

⁷ Inmebat si Jesus, “Ibabaga met na Masanton Sulat: ‘Ag mo tutuksoen so Katawan a Dios mo.’”

⁸ Insan inyakar na Diablo ed atagtagey a palandey, tan impanengneng ton amin iray nanarian ed sayan mundo, say pakayari tan say kayamanan da.

⁹ “Iter kod sika ra yan amin,” kuay Diablo, “no ondakmomo ka tan mangigalang kad siak.”

¹⁰ Inkuanen Jesus, “Ekal ka dia, Satanas! Ta ibabagay Masanton Sulat: ‘Igalang moy Katawan a Dios mo, tan sikato labat so panlingkuran mo!’”

¹¹ Tinmaynan sirin imay Diablo, tan sinmabi ray anghil a nanlingkur ed kinen Jesus.

Inggapo nen Jesus so Nampulong ed Galilea

¹² Nen akabatan nen Jesus ya aprisoy Juan, pinmawil ed Galilea.

¹³ Balet aliwa lan diad Nazaret so nanayaman to, no ag ingen diad Capernaum. Sayan baley walad gilig na Dayat na Galilea, diad sakop na Zabulon tan Neftali.

¹⁴ Agawa ya pian nasumpal so imbaga nen propita Isaias:

¹⁵ “Dalin na Zabulon, dalin na Neftali, a mamaarap ed dayat, diad nibaliw na Jordan, Galilea a kawalaan da ray Hintil!

¹⁶ Saray totood sayan pasen ya abayag iran walad kabilongetan, anengneng day marlang a silew! Onsisindag yan silew ed saray manaayam diad kabilongetay patey!”

¹⁷ Nanlapud saman, ginapoan nen Jesus so nampupulong. Inkuanto, “Pansibkelan yo la ray kasalanan yo, ta asingger lay Panarian na tawen!”

Tinawag nen Jesus so Apatiran Sumisigay

¹⁸ Nen aminsan a manaakar si Jesus ed gilig na Dayat na Galilea, anengneng toy Simon, a tatawagey Pedro, tan si Andres ya agi to. Peles dan mansasabokul ed dayat, ta sumisigay ira.

¹⁹ Inkuanen Jesus ed sikara, “Tombuk kayod siak, ta gawaen ta kayon sumisigay na too.”

²⁰ Tinaynan dan tampol iray iket da, tan akila rad sikato.

²¹ Intuloy nen Jesus so panaakar to, tan anengneng to met iray sanagin Santiago tan Juan ya anak nen Zebedeo. Wala rad baloto ra a kaiba ray ama ra, tan ipaparaan da ray iket da. Tinawag met ira nen Jesus.

²² Tinaynan dan tampol so ama ra tan say baloto, ta akila rad kinen Jesus.

Nampupulong tan Nantatambal si Jesus

²³ Niliber nen Jesus so intiron Galilea a nambabangat ed saray sinagoga. Nampupulong na Maung a Balitan nipaakar ed Panarian, tan pinapaabig to met ya amin iray a totoon walay sasakiten tan liliknaen.

²⁴ Kinmayat ed intiron Siria so balitan nipaakar ed kinen Jesus, kanyan inaawit dad sikaton amin iray mansasakit tan amin iray manlilikna na kairapan: saray totoon inaponay dimonyo, saray dumurulot, tan saray paralitiko. Pinapaabig nen Jesus iran amin.

²⁵ Tinombuk na amayamay a totoon nanlapud Galilea, Decapolis, Jerusalem, Judea, tan saray nanlapud biek na Ilog na Jordan.