Mateo 27 - Maung A Balita Biblia

Si Jesus ed arap nen Pilato

¹ Kasabiy kabwasan, nantotongtongan na amin a manonan papari tan saray mamatakken na baley no panoy pamatey dad kinen Jesus.

² Binalur day Jesus, insan da inyakar ed kinen Pilato a gobirnador.

Say Impatey nen Judas

³ Nen anengneng nen Judas, samay traidor, a sinintinsiaan dan pateyen si Jesus, nagbabawi. Impawil to may talomplon kuartan pilak ed saramay manonan papari tan saramay mamatakken na baley.

⁴ “Nankasalanan ak, ta inyawat kon papatey so toon anggapoy kasalanan!” inkuanto. “Antoy pibabalian mi? Sikay akaoley ed satan!” inebat da.

⁵ Imbantak nen Judas imay kuartan pilak ed loob na Timplo. Linma la, insan imbitay toy laman to.

⁶ Dinokdok na saramay manonan papari may kuarta tan inkuanda, “Bayar yay dala na sakey a too! Onung ed Ganggan, ag nayarin ikargad pananginay kuarta ed Timplo.”

⁷ Kasumpal dan nampapaknaan, insaliw da may kuarta na dalin da ray managgaway banga, tan ginawa ran panangipomponan na bangkay da ray sangkaili.

⁸ Kanyan anggad sayan agew, tatawagen na “Alog na Dala” man a dalin.

⁹ Tinmua sirin so inkuanen propita Jeremias, “Inala ray talomplon kuartan pilak (sikato yay nampapaknaan da ray Israelitan bili na bilay to),

¹⁰ tan insaliw day dalin na saray managgaway banga, onung na ingganggan ed siak na Katawan.”

Tinepetan nen Pilato si Jesus

¹¹ Manalalagey natan si Jesus ed arap na Gobirnador na Roma. “Sikay ari da ray Judio?” tinepet to may Gobirnador na Roma. Inmebat si Jesus, “Sika lan dili so mangibabaga.”

¹² Balet ag inebatan nen Jesus iray ipapakasalanan da ray manonan papari tan saray mamatakken na baley.

¹³ Kanyan inkuanen Pilato, “Ag mo narerengel ya amin iray ipapakasalanan dad sika?”

¹⁴ Balet ag lan balut inmebat si Jesus, kanyan ontan lay pankelaw to may Gobirnador.

Asintinsiaan a Pateyen si Jesus

¹⁵ Kapag Pista na Paskua, kaogaliyan na gobirnador na Roma so mangibolus na siopaman a prison kerewey karaklan.

¹⁶ Diad saman a panaon, walay bantug a priso a manngaray Barabbas.

¹⁷ Nen nantitipon sirin iray totoo, tinepet nen Pilato, “Siopay labay yon ibolus kod sikayo, si Barabbas o si Jesus a tatawagey Cristo?”

¹⁸ Ta kabkabat nen Pilato ya inyawat day Jesus ed sikato lapud pakakaibeg da.

¹⁹ Aliwan satan labat. Nen wadman ya akayorung si Pilato ed panagsintinsiaan, impaibaga na asawa to, “Ag ka mibabalid satan a toon anggapoy kasalanan, ta diad kugip ko kalabyan nairapan ak a maung lapud sikato.”

²⁰ Saramay manonan papari tan saramay mamatakken na baley nilagyat da ray totoo a kerewen dad kinen Pilato ya ibolus toy Barabbas tan papatey to si Jesus.

²¹ Balet tinepet nen Pilato ed saray totoo, “Siopad sarayay duara so labay yon ibolus ko?” “Si Barabbas!” kuanda.

²² Inkuanen Pilato, “Anto sirin so gawaen kod kinen Jesus a tatawagey Cristo?” “Paipasak mod krus!” inebat dan amin.

²³ Tinepet nen Pilato, “Akin, antoy ginawa ton maoges?” Balet lalon inkasikasil dan ineyag, “Paipasak mod krus!”

²⁴ Nen alikas nen Pilato ya anggapoy nagawaan to tan onggagapo lay golo, amaalay danum tan nanoras na lima tod arap na totoo. Inkuanto, “Anggapoy kasalanan ko ed ipatey na sayan too! Makaoley kayo!”

²⁵ Inmebat iray totoo, “Sikami tan saray anak mi so onebat ed ipatey to!”

²⁶ Imbolus tod sikara si Barabbas, balet impapasiplatan toy Jesus tan inyawat ton ipasak ed krus.

Niludlurey na saray Sondalo si Jesus

²⁷ Si Jesus inyakar na saray sondalo nen Pilato ed palasioy gobirnador, tan minokut na sakey a batalyon na sondalo.

²⁸ Nilakseban da, insan da sinolungay ambalbalangan kawes.

²⁹ Nanliken iray sanga-sangan masabit tan ginawa ran singa korona, insan da inyan ed olo to. Impabemben dad kawanan a lima toy sakey a bislak. Nantatalimukor irad arap to tan niludlurey da. Inkuanda, “Andokey komun so bilay na Ari da ray Judio!”

³⁰ Nilulukdaan da, inala ra may bislak tan impapaspas dad olo to.

³¹ Kasumpal dan niludlurey, nilakseb da may inkawes dad sikato, tan insolung da may dilin kawes to. Insan da impaway ya ipasak ed krus.

Impasak dad Krus si Jesus

³² Nen ompapaway ira, nabet day sakey a lakin taga Cirene a manngaray Simon, tan pinasoot dan impasakbat ed sikatoy krus nen Jesus.

³³ Sinmabi rad pasen a tatawagey Golgota a kabaliksan toy “Pasen na Lapis-lapis na Olo.”

³⁴ Initdan dad may Jesus na alak a nilaukay apgo. Balet nen atimtiman to, ag to labay ya inomen.

³⁵ Impasak dad krus tan, kayari ran nampapalaranan iray kawes to, inapag da.

³⁶ Kasumpal to ya, inmirung ira tan binantayan day Jesus.

³⁷ Insulat dad olowan to may impakasalanan dad sikato: “Sikato yay Jesus ya Ari da ray Judio.”

³⁸ Insan da impasak a kaiba nen Jesus so duaran tulisan ed sansakey a krus, diad nikawanan tan diad nikawigi to.

³⁹ Si Jesus pineyeng-peyengan tan pinapabaingan na saray totoon onlalabas.

⁴⁰ Inkuanda, “Aha, aliwa tan sika may maneral na Timplo, insan mo ipaalagey ed loob na taloy agew? Ilaban moy laman mon dili, no tuan sikay Anak na Dios! Epas kad tan ed krus!”

⁴¹ Ontan met, niludlurey na saray manonan papari, saray iskriba, tan saray mamatakken na baley. Inkuanda,

⁴² “Inlaban to ray arum, balet ag to nilaban so laman ton dili! Ha! Aliwa tan sikatoy Ari na Israel? Onepas pa natan ed krus, et panisiaan mi la!

⁴³ Manmamatalek ed Dios tan inkuanto, ‘Siak so Anak na Dios!’ Nengnengen pa sirin no labay na Dios ya ilaban natan!”

⁴⁴ Niludlurey met na anggan saramay tulisan ya impasak dad krus, a singa sikato.

Say Ipatey nen Jesus

⁴⁵ Nanlapud alas dosi ya anggad alas tris na ngarem, binmilonget so intiron dalin.

⁴⁶ Nen sakey ya alas tris ed ngarem, inmeyag si Jesus na makmaksil, “Eli, Eli, lema sabachthani?” a labay ton ibaga, “Dios ko, Dios ko, akin et inkaindan mo ak?”

⁴⁷ Nadngel ya na arum a manalalagey diman tan inkuanda, “Tatawagen toy Elias!”

⁴⁸ Batik a tampol so sakey ed sikara, tan angalay ispongha. Impasepsep tod anapseng ya alak, inyan tod ngoroy tiken, insan to ipapasopsop ed kinen Jesus.

⁴⁹ Balet inkuanday arum, “Alagar ka, ta nengnengen tayo pa no onsabiy Elias a mangilaban ed sikato!”

⁵⁰ Inmeyag lamet na maksil si Jesus, insan inyawat toy ispiritu to.

⁵¹ Diad saman a bekta, apaldua so kurtina ed Timplo, manlapud tagey ya anggad saloy. Yinmegyeg so dalin, apisag iray bato,

⁵² alokasan iray lobuk, tan amayamay ya inaatey lan totooy Dios so apaolid bilay.

⁵³ Pinmapaway irad saray lobuk nen kasumpal ya inmolid bilay si Jesus, tan linma rad Masanton Siudad a diman ira anengneng na amayamay a totoo.

⁵⁴ Ataktakot a maung imay kapitan tan saramay sondalon kaiba to a mambabantay ed kinen Jesus nen naimatunan da may yegyeg tan amin ya agawa. Inkuanda, “Tuan sikatoy Anak na Dios!”

⁵⁵ Wala met iray amayamay a bibiin walad bandad arawi ya onnenengneng ed nagagawa. Manlapu lad Galilea, ontotombuk la ra yan bibii ed kinen Jesus tan manlilingkur irad sikato.

⁵⁶ Kaiba ra met si Maria Magdalena, si Maria ya ina di Santiago tan Jose, tan say asawa nen Zebedeo.

Say Impangipompon ed kinen Jesus

⁵⁷ Nen labi la, sinmabiy sakey a toon manngaray Jose a taga Arimatea. Mayaman yan too tan sakey ed saray disipulo nen Jesus.

⁵⁸ Linmad kinen Pilato tan kinerew ton alaen so bangkay nen Jesus, kanyan ingganggan nen Pilato ya iter dad sikato.

⁵⁹ Inala sirin nen Jose may bangkay nen Jesus tan binalkut tod malinis a sidan abel,

⁶⁰ insan to insorub ed lobuk ton dili, ya agano nin inyongib tod bato. Kasumpal to ya, angitolin na baton baleg ya insara tod puirta, insan la linma.

⁶¹ Wadman a manyodyorung ed arap na lobuk si Maria Magdalena tan samay sakey a Maria.

Say Guardiay Lobuk

⁶² Kaimbuas, salantiy say agew a kasumpal na Panagparaan, saray manonan papari tan saray Pariseo nantitipon iran akitongtong ed kinen Pilato.

⁶³ Inkuanda, “Nanunotan mi a nen mabilay ni man a matilan too inkuanto, ‘Onoli ak ed bilay kasumpal na taloy agew.’

⁶⁴ Kanyan pabantayan mo pan maung imay angipomponan ed sikato ya anggad kumatlon agew, ta ag la pigan takewen na saray disipulo toy bangkay to. Insan dad satan ibagbagad saray totoo, ‘Inmolid bilay!’ Magmaliw a lalon maoges ni yan tila nen say inmona.”

⁶⁵ “Mangawit kayoy guardia sirin,” kuanen Pilato ed sikara, “tan pabantayan yon malet imay lobuk.”

⁶⁶ Linma rad angipomponan, minarkaan da may baton insara pian ag da panduaruwaan ya anggapoy mandiwit, tan intilak da may guardia a mambantay.