Mateo 26 - Maung A Balita Biblia

Implano ray Gawaen dad kinen Jesus

¹ Kasumpal nen Jesus ya imbangat ira yan amin, inkuantod saray disipulo to,

² “Amta yo a duay agew ni, insan Pista na Paskua la. Diad satan niawat ya ipasak ed krus so Anak na Too.”

³ Saray manonan papari tan saray mamatakken na baley nantitipon irad palasio nen Caifas, a Pangulon Pari.

⁴ Implano ran erelen a maamut si Jesus, insan da pateyen.

⁵ “Balet ag tayo pateyen legan na pista, ta ag la pigan manggolo ray totoo,” inkuanda.

Kinalboan na Pabalingit si Jesus

⁶ Nen si Jesus et walad abung nen Simon ya akating, diad Betania,

⁷ walay biin linmad sikato a sankaawit toy botilyan alabastro a napnoy mabmablin pabalingit tan inkalbo tod olo nen Jesus a mangakan.

⁸ Asanukan iray disipulo nen anengneng da yan gagawaen to. Inkuanda, “Akin yan panagdarak?

⁹ Inlako la komuy mabli, insan inter ed saray mairap-bilay so nanlakoan!”

¹⁰ Amta nen Jesus so ibabaga ra, kanyan inkuanto, “Akin et balbalawen yo yan bii? Maabig tan marakep yan ginawa tod siak.

¹¹ Ta kaiba yo lawas iray mairap-bilay balet ag yo ak lawas kaiba.

¹² Kinalboan toy laman ko na pabalingit a pangiparaan na pangipompon ed siak.

¹³ Natan, tandaan yo ya! Inerman ed sankamundoan so pangipulongan na sayan Maung a Balita, nasalitay ginawa to yan bii a pakanudnunotan ed sikato.”

Si Judas Akisipan ya Iyawat toy Jesus

¹⁴ Say sakey ed saray labinduan disipulo salanti samay manngaran na Juda Iscariote et linmad saray manonan papari

¹⁵ tan inkuanto, “Antoy iter yod siak no iyawat koy Jesus ed sikayo?” Imbilangan day talomplon kuartan pilak tan inter dad sikato.

¹⁶ Kanyan nanlapud saman, ginapoan nen Judas so mananap na pankanawnawan mangyawat ed kinen Jesus.

Say Kaonuran ya Impipaskua nen Jesus ed saray Disipulo to

¹⁷ Diad ononan agew na Pistay Tinapay ya Anggapoy Libadura, linma ray disipulo ed kinen Jesus tan tinepet da, “Iner so labay mon pangiparaanan miy panganan moy Paskua?”

¹⁸ Inmebat si Jesus, “Laka yod sakey a toon wadman ed siudad tan ikuanyod sikaton ibabagay Maistro: ‘Asingger lay oras ko. Diad abung moy pamaskuan ko tan saray disipulok.’”

¹⁹ Inonur da ra may disipulo so ganggan nen Jesus, tan imparaan day Pandem na Paskua.

²⁰ Kasabi na labi, dinmongod pananganan si Jesus tan saray disipulo to.

²¹ Leleg dan mangakan inkuanen Jesus, “Kuankod sikayo: mantraidor ed siak so sakey ed sikayo.”

²² Agolon maung so kalakal da ra may disipulo, tan sinansakey dan tinepet, “Siak kasi, Katawan?”

²³ Inmebat si Jesus, “Say kabansag kon mangisasawsaw na lima tod aralem a plato, sikatoy mantraidor ed siak.

²⁴ Ompatey so Anak na Too, onung na ibabagay Masanton Sulat, balet kaskasian so toon mantraidor ed Anak na Too! Magmaung ni komun ya ag la nianak!”

²⁵ Si Judas, a sikatoy traidor, tinepet to, “Maistro, siak kasi?” Inmebat si Jesus, “Sika lan dili so mangibabaga.”

Say Pandem na Katawan

²⁶ Nen peles dan mangakan, angalay tinapay si Jesus. Kasumpal ton akisalamat ed Dios, pinipisag to, insan to inter ed saray disipulo to tan kuanto, “Ala yo ya tan akan yo; sikato yay laman ko.”

²⁷ Insan inala toy kupa, tan kasumpal ton akisalamat ed Dios, inter tod sikara tan inkuanto, “Inom kayon amin ed sayan kupa,

²⁸ ta sikato yay dalak a mamaneknek ed impisipanay Dios, say dalak ya onterter a para amayamay a totoo, pian napirdona ray kasalanan.

²⁹ Kuankod sikayo ya ag ko lan balut oninom na sayan tabul na ubas ya anggad agew na iyinom koy balon tabul na ubas ed Panarian na Amak a kaiba ta kayo.”

³⁰ Anganta ray sakey ya imno, insan ira linma ed Palandey na Kaolibaan.

Impasakbay nen Jesus so Pangibori nen Pedro ed sikato

³¹ Inkuanen Jesus ed sikara, “Diad saya met lamlamang a labi, ibatikan tan taynan yo ak ya amin, ta ibabagay Masanton Sulat, ‘Pateyen na Dios so pumapastol, et nataytayak iray karniro.’

³² Balet kayari na iyolik ed bilay, onaan ta kayon onlad Galilea.”

³³ Inkuanen Pedro ed sikato, “Anggan taynan da kan amin, ag ta kan balut taynan!”

³⁴ Inmebat si Jesus, “Tandaan mo ya! Kasakbayay ikukaok na lalung ed sayan labi, mamitlon ibagam ya ag mo ak kabat.”

³⁵ Balet inmebat si Pedro, “Ag kon balut ibagan ag ta ka kabat, anggan kaiba ta kan pateyen da!” Onya met so imbaga na amin da ray arum a disipulo.

Nampikasi si Jesus ed Getsemani

³⁶ Intagar nen Jesus iray disipulo to ed sakey a lugar a manngaray Getsemani. Inkuantod sikara, “Yorung kayo dia, ta onla ak diman a mampikasi.”

³⁷ Intagar to ra balet di Pedro tan saray duaran anak nen Zebedeo. Insan agunigon a maung tan apagaan

³⁸ tan kuantod sikara, “Agaylay ermen ko tan ngalngalik la ipatey. Dia kayo tan mipuyat kayod siak.”

³⁹ Kaarawi toy daiset, dinmakmomo a sinmabid dalin so lupa to tan nampikasi, “Amak, no nayari komun, ipaliis mo siak yan kupay kairapan! Balet aliwan say linawak, no ag ingen say linawam, so nasumpal.”

⁴⁰ Pinawil to ra may taloran disipulo, tan asabian to ran akaogip. Inkuantod kinen Pedro, “Ag yo ta nayariay mipuyat ed siak ya anggan saksakey oras?

⁴¹ Mampuyat tan mampikasi kayo, pian ag kayo napelag ed tukso. Sipaparaan so ispiritu, balet makapoy so laman.”

⁴² Pinmidwan inmarawi si Jesus tan nampikasi, “Amak, no ag nipaliis yan kupay kairapan likud ya inomen ko, say linawam so nasumpal.”

⁴³ Pinawil to lamet iray disipulo to tan asabian to ran akaogip, ta mapalaloy pakakaogip da.

⁴⁴ Tinaynan to ra lamet nen Jesus tan inmarawi. Mikatlo la yan pampikasi to, tan nampaparay imbaga to.

⁴⁵ Pinmawil ed saray disipulo to tan inkuanto, “Akaogip tan mamapainawa kayo ni anggad natan? Nengneng yo! Sinmabi lay oras a niawat so Anak na Too ed lima da ray makasalanan.

⁴⁶ Bangon kayo, ta onla ti la. Wadya lay toon mantraidor ed siak!”

Say Impangerel dad kinen Jesus

⁴⁷ Mansasalita niy Jesus nen sinmabi si Judas a sakey ed saray labinduan disipulo. Kaiba to ray amayamay a totoon sankaawit da ray ispada tan pekpek. Sarayan totoo imbaki na saray manonan papari tan saray mamatakken na baley.

⁴⁸ Samay traidor initdan to ray kakaiba to na pakabirbiran da: “Say anguban ko sikato man so aanapen yo. Erel yo!”

⁴⁹ Kasabi nen Judas, dinago ton tampol si Jesus tan inkuanto, “Say kareenay walad sika komun, Maistro,” insan to inanguban.

⁵⁰ Inkuanen Jesus ed sikato, “Kaaro, gawam lay inakaran mo dia!” Sinmingger ira may totoo, siningkat day Jesus, insan da binembenay malet.

⁵¹ Walay sakey a kaiba nen Jesus a binagut toy ispada to tan sinigbat toy aripen na Pangulon Pari, et apingolan.

⁵² Inkuanen Jesus ed sikato, “Ikaluban mo la tay ispadam, ta say mangikanay ispada, ispada met so pateyan to.

⁵³ Ag mo ta amtan nayarian koy onkerew na tulong ed Amak, tan mangibakin tampol dia na masoluk a labinduan batalyon na anghil?

⁵⁴ Balet no ontan, panon a nasumpal so ibabagay Masanton Sulat ya onyay nagawa?”

⁵⁵ Insan inkuanen Jesus ed saramay totoo, “Akin et sankaawit yo ray ispada tan pekpek a mangerel ed siak? Tulisan ak sirin? Inagew-agew ak a nanyoyorung a nambangat ed Timplo, balet ag yo ak inerel.

⁵⁶ Balet agawa yan amin pian nasumpal so ibabaga ray propita ed Masanton Sulat.” Nagsibatik ya amin iray disipulo tan tinaynan dan bukbukor si Jesus.

Si Jesus ed arap na Sanidrin

⁵⁷ Saramay angerel ed kinen Jesus inyakar dad abung nen Caifas a Pangulon Pari, a nantitiponan da ray iskriba tan saray mamatakken na baley.

⁵⁸ Tinmombuk si Pedro ed kinen Jesus, balet walad bandad arawi. Tinmuloy ya anggad solar na Pangulon Pari tan inmirung diman a kaiba to ray guardia, pian naimatunan toy kasumpalan.

⁵⁹ Ginawa na saray manonan papari tan amin a kabyangay Sanidrin so anggaay nayarian da a mananap na ipakasalanan dad kinen Jesus, pian napapatey da.

⁶⁰ Balet ag ira akarumog, anggaman ya amayamay iray namparontal a nantilan sumpad kinen Jesus. Diad kaonuran, walay duaran pinmarontal

⁶¹ tan inkuanda, “Inkuanto yan too, ‘Sarag kon gebaen so Timplo na Dios, insan ko ipaalagey ed loob na taloy agew.’”

⁶² Inmalagey imay Pangulon Pari tan inkuantod kinen Jesus, “Anggapoy iyebat mod sayan ipapakasalanan dad sika?”

⁶³ Balet ag inmesel si Jesus. Inkuanto lamet imay Pangulon Pari, “Diad ngaran na Dios a mabilay, pansambaen ta ka: ibagam ed sikami no talagan sikay Cristo ya Anak na Dios.”

⁶⁴ Inmebat si Jesus, “Sika lan dili so mangibabaga. Balet kuankod sikayon amin a manlapud natan, nanengneng yoy Anak na Too ya akayorung ed nikawanay Dios a Makapanyarin-amin. Nanengneng yo met ya onsasabin walad saray lorem na tawen!”

⁶⁵ Kadngel na Pangulon Pari ed saya, ginebyas ton pinilat so kawes to tan inkuanto, “Nansalitay sumpad Dios! Ag tayo la nakaukolay arum ni ran tasi! Nadngel yoy kaogsay salita ton sumpad Dios!

⁶⁶ Antoy kuanyo?” Inmebat ira, “Nankasalanan, tan nepeg a pateyen.”

⁶⁷ Insan da niluklukdaay lupa to, tan kinakabil da. Inkuanda ray nantatampal ed sikato.

⁶⁸ “Mampropisiya ka, Cristo! Ibagam pa no siopay anampal ed sika?”

Imbori nen Pedro si Jesus

⁶⁹ Wadman nin manyodyorung ed solar si Pedro nen inasinggeray bii a sakey ed saray katulong na Pangulon Pari tan inkuanto, “Kaiba ka met nen Jesus a taga Galilea.”

⁷⁰ Balet imbori nen Pedro ed arap day amin a wadman. Inkuanto, “Ag ko amta tay ibabagam.”

⁷¹ Insan linmad puirtay solar. Naimano met diman na sananey a biin katulong, tan kuantod saramay lalakin wadman, “Akilkila met yan too ed kinen Jesus a taga Nazaret.”

⁷² Imbori nen Pedro lamet tan inkuanto, “Sambaan ko ya ag ko amta tan a too!”

⁷³ Ag abayag, sinmingger ed kinen Pedro ira may lalakin manalalagey diman tan inkuanda, “Sakey kan talaga ed sikara, anto? Nabirbir la ed panagsalitam!”

⁷⁴ Balet nansamba lamet si Pedro a kuanto, “Nitay Dios, anggan dusaen to ak no mantitila ak. Talagan ag ko kabat itan a too!” Diad saman a bekta, kinmukaok so sakey a lalung.

⁷⁵ Insan anunotan nen Pedro may sinalita nen Jesus ed sikato, “Kasakbayay ikukaok na lalung, ibori mo ak a mamitlo.” Pinmaway si Pedro tan inmakis na ampaipait.