Mateo 25 - Maung A Balita Biblia

Say Alimbawan nipaakar ed Samploran Mamarikit

¹ “Diad satan ya agew, say Panariay tawen aliling toy samploran mamarikit ya angala ray sansasakey a lamparaan, tan pinmaway iran mangabet ed nubio.

² Kulang na kalakal so limarad sikara, tan makalakal so limara.

³ Inawit day lamparaan da ra may kulang na kalakal, balet ag ira nambaloy larak.

⁴ Balet saramay makalakal inawit da ray lamparaan da tan nambalon iray larak.

⁵ Ag sinmabid dugan oras so nubio, kanyan mantomeg ira, insan ira akaogip.

⁶ “Kapegleyan lay labi nen walay ingal, ‘Wadya lay nubio! Gali dia ta abet yo!’

⁷ Binmangon a tampol ira may samploran mamarikit tan imparaan da ray lamparaan da.

⁸ Inkuanda ra may kulang na kalakal ed saramay makalakal, ‘Itdan yo kami pay larak yo, ta nanaerep la ray lamparaan mi.’

⁹ ‘Andi,’ ebat da ra may makalakal, ‘ta ompan ag ondugad para sikatayon amin. Say maung lakayo lan manaliw ed saray manlalakoy larak.’

¹⁰ Linma sirin ira may kulang na kalakal tan legan dan manasaliw, sinmabiy nubio. Saramay limaran makalakal, lapud akaparaan la ra, akiolup irad nubio a linmoob ed pambansalan. Kaloob da, nikaput so puirta.

¹¹ “Insan sinmabi ra may kulang na kalakal tan inkuanda, ‘Katawan, katawan, lokasan mo kami pa!’

¹² Balet inmebat imay nubio, ‘Kuankod sikayo, ag ta kayo kabat!’”

¹³ Inkuanen Jesus a pamasamput, “Manalwar kayo sirin, ta ag yo amtay agew odino say oras.”

Say Alimbawan nipaakar ed Taloran Aripen

¹⁴ “Say Panariay tawen aliling toy sakey a toon onlan mambiahi. Tinawag to ray aripen to tan impia toy kayaryan tod sikara.

¹⁵ Initdan to ray kuarta onung ed pakayariy balang sakey. Initdan toy liman liboy pisos so sakey ya aripen, duan liboy sakey, tan sanliboy sakey. Insan la linma.

¹⁶ Samay akaawat na liman liboy pisos innigosio ton tampol, tan akatuboy liman liboy pisos.

¹⁷ Ontan met so ginawa to may akaawat na duan libo, tan akatuboy duan liboy pisos.

¹⁸ Samay akaawat na sanlibo balet, inkotkot tod dalin, ta inyamut to may kuartay amo to.

¹⁹ “Kasumpal na andokey a panaon, pinmawil imay amo ra tan akikuintaan ed sikara.

²⁰ Linma may naitdan na liman liboy pisos tan inkuanto, ‘Amo, nia may inter mod siak a liman liboy pisos. Nia met so liman liboy pisos a tinubok!’

²¹ Inkuanto may amo, ‘Maabig so ginawam, maung tan matoor ya aripen! Lapud napampiaan kad melag a kantidad, ipiak ed sikay baleg a kantidad. Gala, ta miliket kad amom!’

²² Linma met imay naitdan na duan liboy pisos tan inkuanto, ‘Amo, nia may inter mod siak a duan liboy pisos. Nia met so duan liboy pisos a tinubok!’

²³ Inkuanto may amo ‘Maabig so ginawam, maung tan matoor ya aripen! Lapud napampiaan kad melag a kantidad, ipiak ed sikay baleg a kantidad. Gala, ta miliket kad amom!’

²⁴ Tinmombuk imay naitday sanliboy pisos, tan inkuanto, ‘Amo, amtak a mapeget ka. Amtak a manaani kad ag yo nantaneman, tan manggagapas kad ag mo nampasekan.

²⁵ Antakot ak ed sika, kanyan inyamut kod dalin, imay kuartam. Nia la may sanliboy pisos yo!’

²⁶ Inkuanto may amo, ‘Maoges tan mangiras ya aripen! Amtam a manaani ak ed ag ko nantaneman tan manggagapas ak ed ag ko nampasekan, anto?

²⁷ Indipositom komun sirin ed bangko so kuartak, pian walay tubo to no onsabi ak.

²⁸ Ala yoy kuartan walad sikato tan iter yod samay aripen a wala lay samplon liboy pisos to.

²⁹ Ta say toon wala lay bengatlad sikato, naaruman niy walan bengatlad sikato; balet say toon anggapoy bengatlad sikato, naala so anggan samay dagdaiset a bengatlan walad sikato.

³⁰ Nipaakar ed sayan anggapoy kanan aripen, ibantak yod kabilongetan ed paway. Diman onnangis tan onngalatenget iray ngipen to.’”

Say Okum

³¹ “No onsabin Ari so Anak na Too a kaiba to ray amin ya anghil, onyorung ed mapagalang a trono to.

³² Mantitipon ed satay amin a katoowan ed arap to. Pambibiigan to rad duaran grupo, a singa say pastol ya ibibiig to ray karniro ed saray kanding.

³³ Ipasen tod nikawanan to ray karniro tan diad nikawigi to, saray kanding.

³⁴ Insan ikuay Ari ed saramay walad nikawanan, ‘Gali dia, sikayo ran binindisionay Amak! Tawir yoy panarian a niparaan a para sikayo, nanlapu lad inkiletneg na mundo.

³⁵ Ta narasan ak et pinakan yo ak, napgaan ak et pinainom yo ak, sakey ak a sangkaili et pinatuloy yo ak ed abung yo.

³⁶ Nen anggapoy nisulong ko initdan yo ak na kawes, nen mansasakit ak inasikaso yo ak, tan nen wala ak ed prisowan binisita yo ak.’

³⁷ Onebat ed satan ira may matonung a totoo, ‘Katawan, kapigay impakanengneng mid sikan narasan et pinakan mi ka, o napgaan et pinainom mi ka?

³⁸ Kapigay impakanengneng min sangkaili ka et pinatuloy mi kad abung mi, o anggapoy nisulong mo et initdan mi kay kawes?

³⁹ Kapigay impakanengneng mid sikan mansasakit o apriso et binisita mi ka?’

⁴⁰ Onebat so Ari ed sikara, ‘Kuankod sikayo: nen ginawa yo yad anggan sakey a sankamelagan ed sarayan agagik, ginawa yod siak!’

⁴¹ “Insan ikuantod saray walad nikawigi to, ‘Arawi kayod siak, sikayo ran insambay Dios! Lakayod apoy ya andi-anggaan a niparaan ed Diablo tan saray anghil to!

⁴² Ta narasan ak et ag yo ak pinakan, napgaan ak et ag yo ak pinainom.

⁴³ Sakey ak a sangkaili et ag yo ak pinatuloy ed abung yo. Anggapoy nisulong ko et ag yo ak initday kawes. Nansakit tan apriso ak et ag yo ak binisita.’

⁴⁴ Insan onebat ira, ‘Katawan, kapigay impakanengneng mid sikan narasan o napgaan, o sakey a sangkaili, o anggapoy nisulong, o mansasakit, o apriso, et ag mi ka tinulongan?’

⁴⁵ Onebat so Ari ed sikara, ‘Kuankod sikayo: nen ag yo tinulongan so sakey a sankamelagan ed saraya, ag yo ak tinulongan.’

⁴⁶ Sikara ya sirin so onlad dusan andi-anggaan; saray matonung so panagbilay da sikaray onlad bilay ya andi-anggaan.”