Mateo 17 - Maung A Balita Biblia

Naoman so Nengneng nen Jesus

¹ Kasumpal na anem agew, intagar nen Jesus si Pedro tan saray sanagin Santiago tan Juan, insan tinmakdang ira ed atagey a palandey.

² Nen wadman ira naimatunan da a naoman so nengneng nen Jesus: sinminag a singa agew so lupa to tan pinmotin singa liwawa so kawes to.

³ Insan anengneng na sarayan taloran disipulo si Moises tan si Elias a mitotongtong ira ed kinen Jesus.

⁴ Kanyan kuanen Pedro ed kinen Jesus, “Maung, Katawan, a wadya itayo. No labay mo, manggawa ak na taloran ayaman dia: sakey so para sika, sakey so para si Moises, tan sakey so para si Elias.”

⁵ Mansasalita niy Pedro nen tinarungan iray maliwliwawan lorem tan walay bosis a nanlapud man ya inkuanto, “Sikato yay inararok ya Anak a pakaliliketan ko—dengel kayod sikato!”

⁶ Diad ontan lan inkataktakot da ra may disipulo ed samay bosis, tinmakba rad dalin.

⁷ Inmasingger si Jesus, kinablit to ra tan inkuanto, “Alagey kayo, tan ag kayo natatakot.”

⁸ Nen tinmangwa ra, anggapo lay anengneng da no ag si Jesus labat.

⁹ Nen onlalasur iran nanlapud palandey binilin ira nen Jesus, “Ag yo ibabalitad siopaman yan naimatunan yo, anggad ag ni inmolid bilay so Anak na Too.”

¹⁰ Tinepet ed satan na saramay disipulo, “Akin et ibabaga da ray iskriba a nakaukolan ya ononan onsabi ni diay Elias?”

¹¹ “Tua ya ononan onsabiy Elias,” kuanen Jesus, “tan pasimbaloen ton amin iray bengatla.

¹² Balet kuankod sikayo: Wadya lay Elias, balet ag binirbir na totoo tan ginawa rad sikatoy labalabay da. Ontan met so pamairap dad Anak na Too.”

¹³ Atalusan da lad saman a si Juan a Managbinyag so labay ton ibaga.

Pinaabig nen Jesus so Ogaw ya Inaponay Dimonyo

¹⁴ Nen pinmawil ira asabian day amayamay a totoo. Sinmingger so sakey a too, nantalimukor ed arap nen Jesus

¹⁵ tan inkuanto, “Katawan, kasian moy anak kon laki, ta dumurulot tan mapalaloy kakairapan to. Naynay a natumbad apoy tan napelag ed danum no onsigi.

¹⁶ Inyakar kod saray disipulom, balet ag da napaabig.”

¹⁷ Inmebat si Jesus: “Agaylay kinaoges tan ag yo panisiad Dios, sikayon totood sayan panaon! Anggad kapigan kasiy piolup-olup kod sikayo? Anggad kapigan kasiy pananos kod sikayo? Iyakar yo pa dia tay ogaw.”

¹⁸ Nampasnukan nen Jesus imay dimonyo, kanyan inmekal ed samay ogaw. Tan manlapud saman a bekta, inmabig.

¹⁹ Linma ray disipulod kinen Jesus tan tinepet dad sikato nen anggapoy arum a makadngel, “Akin et ag mi napaekal imay dimonyo ed samay ogaw?”

²⁰ Inmebat si Jesus, “On, ta kulang so pananisia yo. Tandaan yo ya! No walay pananisia yon anggan singa kamelag na bokel na mustasa, nayarian yon ibagad sayan palandey ya onalis, et onalis a tua. Anggapoy ag yo nagawaan!”

Asalita Lamet nen Jesus so Ipatey to

²² Nen nantitipon iray disipulo ed Galilea, kuanen Jesus ed sikara, “Ngalngali la niawat so Anak na Too ed lima da ray totoo.

²³ Pateyen da, balet onolid bilay diad kumatlon agew.” Naermenan ed satan iray disipulo.

Say Pambayar na Buis a para Timplo

²⁴ Nen sinmabid Capernaum si Jesus tan saray disipulo to, inmasingger iray sumisingil na buis a para Timplo ed kinen Pedro tan tinepet da, “Mambabayar tay Maistro yoy buis a para Timplo?”

²⁵ “On!” ebat nen Pedro. Kasabi tod abung, tinepet a tampol nen Jesus ed sikato, “Simon, antoy kuanmod saya? Siopay mambayar na lisinsia o buis ed saray ari na sayan mundo? Saray mibabaley o saray sangkaili?”

²⁶ “Saray sangkaili,” ebat nen Pedro. Inkuanen Jesus, “No ontan sirin, ag nakaukolan a mambayar na buis iray mibabaley.

²⁷ Balet pian anggapoy nibaga rad sikatayo, lakad dayat ta mambanwit ka. Alam so onaan a siran nabanwit mo. Walay kuartan naalmom ed sangi to a dugan ibayar tan buis a para Timplo. Alam, ta ibayar mo.”