Mateo 10 - Maung A Balita Biblia

Saray Labinduan Disipulo

¹ Tinawag nen Jesus iray labinduan disipulo to, tan initdan to ray pakayarin mamaekal ed saray maoges ya ispiritu tan mamaabig ed saray sakit tan liliknaen.

² Nia so kangaranan da ray labinduan apostol: si Simon a tatawagey Pedro tan si Andres ya agi to; saray sanagin Santiago tan Juan ya anak nen Zebedeo;

³ si Felipe tan si Bartolome; si Tomas, tan si Mateo a sumisingil na buis; si Santiago ya anak nen Alfeo, tan si Tadeo; si Simon a Patriota, tan

⁴ si Judas Iscariote a pinmaway a traidor.

Imbaki nen Jesus iray Labinduan Apostol

⁵ Imbaki nen Jesus ira yan labindua tan onyay imbilin tod sikara: “Ag kayo oonla ed lugar da ray Hintil; ontan met ya ag kayo oonlad anggan anton baley da ray Samaritano.

⁶ Laka yo ingen ed saray abalang a karnirod bansay Israel.

⁷ Ipulong yod sikara, ‘Asingger lay Panarian na tawen!’

⁸ Paabig yo ray mansasakit tan pabilay yo ray inaatey. Paabig yo met iray akating tan paekal yo ray dimonyo. Angawat kayon anggapoy bayar, kanyan mangiter kayo met ya anggapoy bayar.

⁹ Ag kayo mangibubulsa na balituk, pilak, o gambang a kuarta.

¹⁰ Ag kayo met manaawit na bayung ed pambiahi yo, ni kawes, ni sandalya, ni anggan baston. Ta say kumikimey nepeg ya itdan na pambilay to.

¹¹ “No onsabi kayod sakey a baley o bario, mananap kayoy toon manepeg a pipundoan yo; miayam kayod sikato ya anggad ag yo itaynan ed saman a lugar.

¹² Kaloob yod sakey ya abung ikuanyo, ‘Manari komuy kareenan ed sayan abung!’

¹³ No manepeg iray totood saman ya abung, itilak yoy impaabet yon kareenan ed sikara; balet no ag da kayo awaten, babawi yo.

¹⁴ No walad sikaray ag mangawat o ag ondengel ed sikayo, taynan kayod saman ya abung o baley tan pokpok yoy dabuk ed sali yo.

¹⁵ Tandaan yo ya! Diad Agew na Okum, anlemew ni so dusa da ray taga Sodoma tan Gomorra nen saray taga satan a baley!”

Saray Kairapan ya Onsabi

¹⁶ “Dengel kayo! Ibabaki ta kayon singa karniro ed pegley da ray asod katakelan. Nakaukolan a maalwar kayo a singa saray oleg tan mauyamo kayo a singa saray malapati.

¹⁷ Manalwar kayo, ta wala ray totoon mangerel tan mangidalem ed sikayod korti. Siplatan da kayod saray sinagoga ra.

¹⁸ Lapud itombuk yod siak, salaysayen da kayod arap na saray arari tan arum ni ran manoley, pian napaneknekan yod sikara ran saray Hintil so Maung a Balita.

¹⁹ No iyakar da kayod korti, ag kayo mapaga no antoy ibaga yo, o no panoy pangibaga yo. Diad satan ya oras, onsabid kanunotan yoy ibaga yo.

²⁰ Ta aliwan sikayoy mansalita; say Ispiritu na Ama yo so mansalitad panamegley yo.

²¹ “Papatey na saray totoo iray agagi ran dili. Papatey na saray kaamaan iray anak da; ontan met a labanan tan papatey na saray anak iray atateng da.

²² Lapud itotombuk yod siak, bosulen kayoy amin a totoo. Balet nilaban so toon mansiansian anggad kasamputan.

²³ No pairapen da kayod sakey a baley, batik kayod sananey. Kuankod sikayo: kasakbayan a naakar yoy amin a baley na Israel, onsabi lay Anak na Too.

²⁴ “Anggapoy babangatan a palabsanan toy bumabangat to; anggapo met so aripen a palabsanan toy amo to.

²⁵ Kanyan masarag lan magmaliw so babangatan a singa say bumabangat to, tan say aripen a singa say amo to. No Beelzebul so ipangaran dad panguloy pamilya; nagkalalon aliwliway ipangaran dad saray kabyangan na pamilya to!”

No Siopay nepeg a Takotan

²⁶ “Ag yo sirin tatakotan iray totoo. Anggapoy asakuban ya ag ompaway, tan anggapoy akaamut ya ag nakabatan.

²⁷ Say ibabagak ed sikayod ambilonget, olit yon maliwawa; tan say iyeesaes kod sikayo, ibando yon manlapud toktok na saray abung.

²⁸ Ag yo tatakotan iray mamatey na laman ya ag da balet napatey so kamarerwa. Say Dios so takotan yo, ta nayarian ton deralen ed impirno so kamarerwa tan laman.

²⁹ Nasaliw yoy duaran anuyaw na mamurmura, balet anggapoy anggan sakey ed sikara so napelag no ag iyabuloy na Ama yo.

³⁰ Anggan say buek na olo yo et abilang ira.

³¹ Kanyan ag kayo natatakot, ta mabli kayo ni nen saray amayamay ya anuyaw!”

Say Pamirbir ed Cristo

³² “Siopamay mamirbir ed siak ed arap na saray totoo, birbiren ko met ed arap na Amak a walad tawen.

³³ Balet siopamay mangiborid siak ed arap na totoo, iborik met ed arap na Amak ed tawen.”

Aliwan say Kareenan no ag say Ispada

³⁴ “Ag yo iisipen a linma ak dian mangiter na kareenan ed dalin. Andi! Linma ak dian awit koy ispada, aliwan say kareenan.

³⁵ Ta linma ak dian panlalabanen ko ray anak a lalaki tan saray kaamaan da, saray anak a bibii tan saray kainaan da, saray manugang a bibii tan saray katolangan dan bibii.

³⁶ Saray kalaban na sakey a too et saray kabyangan na pamilya to lamlamang.

³⁷ “Siopamay babaleg so panangaro tod ama o ina to nen say panangaro tod siak et ag manepeg ed siak. Ontan met, siopamay babaleg so panangaro tod anak ton laki o bii nen say panangaro tod siak, ag manepeg ed siak.

³⁸ Siopamay ag to sakbatey krus to tan ontombuk ed siak, ag manepeg a disipulok.

³⁹ Siopamay alablabas so pangaaro tod bilay to, nabalang to ni ingen; siopamay makabalang na bilay to nisengeg ed siak, naalmo to ni ingen.”

Saray Tumang

⁴⁰ “Say mangawat ed sikayo awaten to ak met, tan say mangawat ed siak awaten to met so angibakid siak.

⁴¹ Say mangawat ed sakey a propita, lapud inkapropita to, minabang ed tumang na saman a propita. Say mangawat ed maung a too, lapud inkamaung to, minabang ed tumang na saman a too.

⁴² Tandaan yo ya! Say mangiter na anggan sakey a bason ambetel a danum ed sakey ed saray sankaabebaan a disipulok, lapud sikatoy disipulok, walay awaten ton awaten a tumang to.”