Marcos 11 - Maung A Balita Biblia

Say Mapalabon Inloob nen Jesus ed Jerusalem

¹ Asingger la rad Jerusalem nen sinmabi rad alusadsar na Palandey na Kaolibaan, diad saray baley na Betfage tan Betania. Pinaona nen Jesus iray duaran disipulo to,

² tan binilin to ra, “Laka yod ontombuk a bario. Kasabi yod man narumog yon tampol so asnon akasinger tan ag nin balut kinabayoan. Okbar yo tan awit yo dia.

³ No walay mantepet no akin et ookbaran yo ikuanyod sikato, ‘Say Katawan nakaukolan to. Andi bali, ta paipawil to met la dian tampol.’”

⁴ Kanyan linma ra tan arumog day sakey ya asno ed dalan, ya akasinger ed puirta na sakey ya abung. Et nen ookbaran da may asno,

⁵ tinepet na saray totoon manalalagey diman, “Akin et ookabaran yo tan?”

⁶ Inmebat ira may disipulo, onung ed imbilin nen Jesus ed sikara, kanyan inabuloyan da ra.

⁷ Inyakar da may asno ed kinen Jesus, insapin da ray kolibemben da, insan kinmabayoy Jesus.

⁸ Saray dakel a totoo inyaaplag dad dalan iray kolibemben da. Saray arum nampopoter iray sangasangay kiew tan indadatak dad dalan.

⁹ Ineeyag da ray totoon walad onaan tan walad onur nen Jesus, “Hosanna! Bindisionan komuy Dios so onla dia ed ngaray Katawan!

¹⁰ Bindisionan komuy Dios so onsabin panarian nen David ya ama tayo! Nagalang komuy Dios a Sankatageyan!”

¹¹ Linmay Jesus ed Jerusalem tan linmoob ed Timplo. Ninengneng ton amin iray bengatlan wadman. Lapud onlalabi la, pinmaway tan linma ed Betania a kaiba to ray labinduan disipulo to.

Insamba nen Jesus so Kiew ya Igos

¹² Kaimbwasan, nen manaakar iran nanlapud Betania, narasan si Jesus.

¹³ Diad ag arawi anengneng toy mabolubolung a kiew ya igos. Inmasingger a mananap na bunga, balet kabolubolung lapud aliwa nin panagbungay igos.

¹⁴ Inkuanen Jesus ed samay kiew ya igos, “Anggapo lan balut so mangay bungam!” Nadngel ya na saray disipulo to.

Linmay Jesus ed Timplo

¹⁵ Kasabi rad Jerusalem linmoob si Jesus ed Timplo tan pinataynan to ray manlalako tan mansasaliw diman. Imbabalintuag to ray lamisaan da ray managsalat na kuarta tan saray yorungan da ray managlakoy malapati,

¹⁶ tan ag to inabuloyan ya ondalan ed loob na Timplo so siopaman a walay awit.

¹⁷ Insan imbangat tod saray totoo, “Nabasad Masanton Sulat a say Dios inkuanto, ‘Say abung ko natawag ya abung a panagpikasiyan na amin a katoowan.’ Balet ginawa yon ayaman da ray matatakew!”

¹⁸ Sayan inkagawa nadngelan na saray manonan papari tan saray iskriba, kanyan ginapoan day mananap na pakapatey dad kinen Jesus. Antakot irad sikato lapud mankelaw iray totoo ed saray bangat to.

¹⁹ Nen labi la, pinmaway lamet a nanlapud siudad si Jesus tan saray disipulo to.

Say Naaral ed Kiew ya Igos

²⁰ Nen manaakar irad kabkabwasan na ontombuk ya agew, anengneng dan amagaan ya anggad lamut imay kiew ya igos.

²¹ Anunotan nen Pedro may agawa tan inkuanto, “Katawan, nengneng mo, inatey imay igos ya insambam!”

²² Inmebat si Jesus ed sikara, “Tandaan yo ya! No manisia kayo ed Dios,

²³ nayarian yon ibagad sayan palandey, ‘Alis kad tan, tabuy kad dayat,’ et gawaen na Dios so ontan, no ag manduaruway puso yo tan manisia kayon nagawa.

²⁴ Kanyan kuankod sikayo ya antokaman a kerewen yod pikakasi yo, manisia kayo ya andi-saew a naawat yo et niiter ya amin ed sikayo.

²⁵ No onalagey kayon mampikasi, pirdona yo ray nankasalanan ed sikayo, pian pirdonaen met na Ama yon walad tawen iray kasalanan yo.”

Say Tepet a nipaakar ed Pankatonungan nen Jesus

²⁷ Pinmawil ira lamet ed Jerusalem. Nen manaakar si Jesus ed loob na Timplo, inmasingger iray manonan papari, saray iskriba, tan saray mamatakken na baley.

²⁸ Tinepet dad sikato, “Antoy pankatonungan mon manggawad saraya? Siopay angiter ed sika na pankatonungan a manggawad saraya?”

²⁹ Inmebat si Jesus ed sikara, “Wala pa labat so tepeten kod sikayo. No ebatan yo ak, ibagak ed sikayo no antoy pankatonungan kon manggawad saraya.

³⁰ Nanlapway pankatonungan nen Juan a maminyag: nanlapud Dios o nanlapud too?”

³¹ Nantetepetan ira, “Antoy iyebat tayo? No ibaga tayon nanlapud Dios, ikuantod sikatayo, ‘Akin et ag yo sinisiay Juan?’

³² Balet no ibaga tayon nanlapud too…” (Antakot irad saray totoo, tan manisia ran amin a si Juan et propita.)

³³ Kanyan inmebat irad kinen Jesus, “Ag mi amta.” Inkuanen Jesus ed sikara, “Ag ko met sirin ibagad sikayo no antoy pankatonungan kon manggawad saraya.”