Malakias 2 - Maung A Balita Biblia

¹ Say Katawan a Makapanyarin-amin kuantod saray papari, “Para sikayo yan ganggan!

² Nepeg yo ak a pagalangan diad panamegley na gagawaen yo. No ag yo dengelen so ibabagak ed sikayo, isamba ta kayo. Isambak iray bengatlan panlalapwan na pambilay yo. Diad tuay tua insambak la ra, lapud leleglemewen yoy ganggan ko.

³ Dusaen ko ray anak yo tan ingorangur ko ray lupa yo ed saray taiy ayep ya ibabagat yo—insan kayo nibantak ed bunton na taiy ayayep.

⁴ Insan nakabatan yo ya inter kod sikayo yan ganggan, pian ag naderal so impisipanan kod saray paparin kabyangan iray boleg nen Levi.

⁵ “Diad saman ya impisipanan ko imbagak ya itdan ko ray bilay tan kareenan, et inter kod sikara ya pian pagalangan da ak. Diad saraman a panaon pinagalangan da ak tan tinakotan da ak.

⁶ Imbabangat day onung ed katonungan, ya aliwan say kapikewetan. Nambilay iran makapaliket ed siak; ag da labat ginawa so katonungan, no ag ta tinutulongan da ni ingen iray arum a totoo ed itonda rad panggaway kaogsan.

⁷ Nepeg ya ibangat na saray papari so tuan pakapikabat ed Dios. Nepeg ya onlad sikaran mangamta na linawak iray totoo, lapud sikaray ibabaki na Katawan a Makapanyarin-amin.

⁸ “Balet natan, inmarawi kayo ed tuan dalan, sikayo ran papari. Inggolo na bangat yo a nanggagaway kaogsan iray amayamay a totoo.

⁹ Kanyan abuloyan kon balawen kayo na saray totood Israel lapud ag yo oonuren so linawak, tan no bangatan yo ray totook wala ray lalabien yo.”

Say Ag Inkamatoor na Totoo ed Dios

¹⁰ Ag ta saksakey so ama tayo? Ag ta saksakey a Dios so amalsad sikatayon amin? Akin sirin et ag tayo susumpalen so sipan tayod sakey tan sakey, tan akin et babalawen tayoy impisipanan na Dios ed saray lalaki tayo?

¹¹ Ag tinoor na saray totood Juda so sipan dad Dios tan nanggagawa rad Jerusalem tan diad intiron bansa na mabambanday a bengatla. Dinotakan da so Timplo ya inaro na Katawan. Saray lalaki et angaasawa ra na saray bibiin mangigagalang ed saray diriyos na arum a bansa.

¹² Ekalen komun na Katawan ed olupan na saray Israelita so siopaman a nanggawad saya, tan ag to la ran balut pibiangen ed saray bagat ya isasaklang na bansa tayo ed Katawan a Makapanyarin-amin.

¹³ Niay sakey nin gagawaen yo. Aamesen yo na lua yo so altar na Katawan, manaakis tan managogul kayo lapud ag to la aawaten iray bagat ya iyaakar yod sikato.

¹⁴ Tetepeten yo no akin et ag to la ra aawaten iray bagat yo. Say makasengeg et lapud amta ton dineral yoy sipan yod bii ya inasawa yo nen malangwer kayo ni. Sikatoy katambayan yo, balet dineral yoy sipan yod sikato, anggaman ya insipan yod arap na Dios a matoor kayod sikato.

¹⁵ Ag ta say Dios impankasakey to kayod laman tan ispiritu? Antoy getma tod saya? Say getma to et say pananak yo na saray petepeteg a totooy Dios. Kanyan apiapiger yon imanoen ya anggapoy anggan sakey ed sikayo so maneral na sipan to ed asawa to.

¹⁶ “Kabosul koy pansiyan na sanasawa,” kuay Katawan a Dios na Israel. “Ag ko labay a balut a sakey ed sikayo et gawaen tod asawa to itan a maruksan bengatla. Alwaran yo sirin ya ag yo dederalen so sipan yon matoor kayod asawa yo.”

Asingger lay Agew na Sintinsia

¹⁷ Pinasawa yoy Katawan lapud panagsalita yo. Balet tetepeten yo, “Panoy impamasawa mid sikato?” Pinasawa yo diad impangikuanyo, “Ipapasen na Katawan a Makapanyarin-amin a maung iray manggagaway kaogsan; diad tuay tua labalabay to ra.” Odino diad panamegley na panetepet yo, “Kawalaay Dios a nepeg a matonung?”