Lucas 4 - Maung A Balita Biblia

Say Impanuksoy Diablo ed kinen Jesus

¹ Sinmiput si Jesus ed Jordan a napnoy Ispiritu Santo, tan inyakar ed kalawakan na Ispiritu.

² Tinutuksod man na Diablo ed loob na apataploy agew. Ag angan a balut legan to yan panaon kanyan kasumpal to, narasan a maung.

³ Inkuay Diablo ed sikato, “No sikan talagay Anak na Dios, iganggan mod sayan bato a magmaliw a tinapay.”

⁴ Inmebat si Jesus, “Ibabagay Masanton Sulat, ‘Aliwa labat a tinapay so pambilay na too!’”

⁵ Insan inyakar na Diablo ed atagtagey a pasen tan diad sakey a bekta, impanengneng tod sikatoy amin a nanarian ed intiron mundo.

⁶ “Iter kod sikay amin a pakayari tan kayamanan na sarayan nanarian,” inkuay Diablo. “Ta nipalima yan amin ed siak, tan nayarian kon iter ed siopaman a labay ko.

⁷ Kanyan no ondakmomo ka tan mangigalang kad siak, kien mo la ra yan amin.”

⁸ Inmebat si Jesus, “Ibabagay Masanton Sulat, ‘Igalang moy Katawan a Dios mo, tan sikato labat so panlingkuran mo!’”

⁹ Inyakar na Diablo si Jesus ed toktok na Timplod Jerusalem tan inkuanto, “No sikan tuay Anak na Dios, tabuy ka!

¹⁰ Ta ibabagay Masanton Sulat, ‘Iganggan na Dios iray anghil ton mangasikasod sika’;

¹¹ tan ‘Ampayaen da kad saray lima ra, pian diad bato anggan saray salim ag mo nitopa.’”

¹² Balet inkuanen Jesus, “Ibabaga met na Masanton Sulat, ‘Ag mo tutuksoen so Katawan a Dios mo!’”

¹³ Kasumpal na Diablo a ginaway anggaay nayarian to a manuksod kinen Jesus, linma la tan nanalagar na pankanawnawan panukso to lamet.

Inggapo nen Jesus so Mampulong ed Galilea

¹⁴ Pinmawil ed Galilea si Jesus, tan walad sikatoy pakayari na Ispiritu Santo. Kinmayat ed amin a kaliber-liber a pasen so balitan nipaakar ed sikato.

¹⁵ Nambabangat ed sinagoga ra, tan indadayew na amin a totoo.

Ag da Inawat ed Nazaret si Jesus

¹⁶ Sinmempet si Jesus ed Nazaret, say baley a binalegan to. Onung na kaogaliyan to, linmoob ed sinagoga nen Agew na Panagpainawa. Inmalagey a mambasay Masanton Sulat,

¹⁷ tan say libro nen propita Isaias so inter dan basaen to. Binoskag tod pasen ya onyay akasulat:

¹⁸ “Walad siak so Ispiritu na Katawan, ta pinili to ak a mampulong na Maung a Balita ed saray mairap-bilay. Imbaki to ak a mangibalitad saray apriso a nabolus la ra, tan saray bulag a makanengneng la ra. Imbaki to ak met a mangibalitad saray napapairap a nainawaan la ra,

¹⁹ tan mangipakabat na manepeg a taon a pangilabay Katawan.”

²⁰ Nilokut nen Jesus imay nambasaan to, insan to inderew ed samay manlilingkur ed sinagoga. Inmirung, tan sankanengneng na amin a totoo.

²¹ Inkuantod sikara, “Asumpal ed sayan agew so ibabaga to yan parti na Masanton Sulat a nadngel yo.”

²² Indayew na amin a totoo, tan mankelaw irad saray mararakep a salita to. “Aliwa tan sikato ya may anak nen Jose?” tepet da.

²³ Kanyan inkuantod sikara, “Andisaew ya ibaga yod siak imay oliran: ‘Doktor, tambal moy laman mon dili!’ Ikuanyo met ni, ‘Gawam met ed dilin baley mo ray abalitaan min ginagawam ed Capernaum!’”

²⁴ Insan intuloy to, “Kuankod sikayo: anggapoy propitan naawat ed dilin baley to.

²⁵ Balet kuankod sikayo ya amayamay so balon bibii ed Israel nen panaon nen Elias. Diad saman, taloy taon tan kapaldua ya ag inmoran a balut, kanyan walay balbaleg ya eras ed lapag na saman a dalin.

²⁶ Balet ag nibakiy Elias ed anggan siopad sikara. Nibaki inged sakey a balon bii ed Sarepta, sakey a baley ed Sidon.

²⁷ Ontan met amayamay iray akating ed Israel nen panaon nen propita Eliseo, balet anggapoy inmabig ed sikara. Si Naaman labat a taga Siria so inmabig.”

²⁸ Mapalaloy pasnuk na amin da ra may totoon wadmad sinagoga nen nadngel da ya.

²⁹ Inmalagey ira, insan da impaway ed siudad. Inyakar dad toktok na nipalandey a pasen ya angipaalageyan na siudad da, insan da ipepelag.

³⁰ Balet linmabas ed pegley da, tan linma la.

Say Lakin Inaponay Maoges ya Ispiritu

³¹ Linmay Jesus ed Capernaum, diad Galilea, ta nambangat diman nen Agew na Panagpainawa.

³² Mankelaw irad panagbangat to, ta walay pakaoley so salita to.

³³ Walad man ed sinagoga so sakey a lakin inaponay ispiritu na maoges a dimonyo. Ineyaeyag to,

³⁴ “Antoy pibabalian mod sikami, Jesus a taga Nazaret? Linma ka dian maneral ed sikami? Kabat ko no siopa ka: sika so Masanto na Dios!”

³⁵ Ingganggan nen Jesus imay maoges ya ispiritu, “Ag ka maingal! Ekal kad sikato!” Tinumba na dimonyo may laki ed arap na amin a totoo, insan inmekal ya ag to pinasakitan.

³⁶ Mankelaw ira ya amin tan nantetepetan ira, “Anto ra ya kasin salita? Walay pakaoley tan pakayari to yan too a mangganggan ed saray maoges ya ispiritu, et oonuren da!”

³⁷ Kinmayat ed saman a pasen so balitan nipaakar ed kinen Jesus.

Amayamay iray Pinapaabig nen Jesus

³⁸ Tinmaynan si Jesus ed sinagoga tan linmad abung nen Simon. Atagey so petang na biin katolangan nen Simon, kanyan imbaga rad kinen Jesus.

³⁹ Dinago nen Jesus tan nanalagey ed abay na dinokulan to, insan to ginanggan ya onekal imay petang. Nakal so petang to may bii, binmangon a tampol, tan nansirbid sikara.

⁴⁰ Kaselek na agew, amin iray manliliknay anggan anton sakit inyaakar na saray kakaaro ra ed kinen Jesus. Intatapew toy lima tod balang sakey ed sikara, tan pinapaabig to ran amin.

⁴¹ Pinmapaway iray dimonyo ed amayamay a totoo. Nen ompapaway ira, iniingal da, “Sikay Anak na Dios!” Balet binano ra nen Jesus, tan ag to ra abuloyan a mansalita, lapud amta ran sikato so Cristo.

Nampupulong ed saray Sinagoga si Jesus

⁴² Nen asabiy kabwasan, inmalis si Jesus tan linmad nisolinek a pasen. Inanap na totoo, et nen nalmo ra, popokpokan dan ag ni komun ontaynan.

⁴³ Balet inkuantod sikara, “Nakaukolan kon ipulong met ed arum iran baley so Maung a Balitan nipaakar ed Panariay Dios, ta sikato yay makasengeg na angibakiay Dios ed siak.”

⁴⁴ Kanyan nampupulong si Jesus diad saray sinagoga ed Judea.