Lucas 10 - Maung A Balita Biblia

Imbaki nen Jesus iray Pitomplo tan Dua

¹ Kasumpal to ya, nampili si Jesus na pitomplo tan duan totoo. Pinaona to ra ed saray baley tan lugar a laen to, tan impanoolup to ran sandederwa.

² Inkuantod sikara, “Amayamay so aaniyen, balet dagdaiset iray manani. Kerew yod akankiey aaniyen a mangibaki niy arum a manani.

³ Laka yo la! Ibaki ta kayon singa saray karniro ed pegley da ray asod katakelan.

⁴ Ag kayo manaawit na pitaka, bayung, o sapatos. Ag kayo tonda-tondad dalan a mangigalang ed anggan siopa.

⁵ Kaloob yod anggan dinan ya abung ikuanyo nin onaan, ‘Manari komuy kareenan ed sayan abung!’

⁶ No walay manaayam diman a manangarod kareenan, natilak ed sikatoy kareenan a pilalek yon manari. No anggapo, ompawil ed sikayoy kareenan a pilalek yon manari.

⁷ Manayam kayod saman ya abung; akan tan inom yoy iparongo rad sikayo, ta nepeg a bayaran so kumikimey. Ag kayo salat a salat na panayaman yon abung.

⁸ No awaten da kayon malikeliket ed sakey a baley, akan yoy iparongo rad sikayo,

⁹ paabig yo ray mansasakit, tan ikuanyod saray totood man, ‘Inmasingger lad sikayo so Panariay Dios.’

¹⁰ Balet no ag da kayo awaten ed sakey a baley, paway kayod saray daladalan tan ikuanyo,

¹¹ ‘Anggan say dabuk na baley yo a pinmepeket ed saray sali mi, ipagpag mi a tanday maoges a ginawa yo. Balet, tandaan yo ya, inmasingger lay Panariay Dios!’

¹² Kuankod sikayo a no Agew na Okum, lalon anlemew so dusa na baley na Sodoma nen sayan baley!”

Saray Baley ya ag Magbabawi

¹³ “Pakaskasi ka, Corazin! Pakaskasi ka met, Betsaida! Ta no dimad Tiro tan Sidon so akagawaan na sarayan milagro, abayag la ra komuy taga diman a nankawes na sako tan nampulapol na dapul ed laman da, a pakanengnengay impangibeneg dad saray kasalanan da!

¹⁴ Diad Agew na Okum, lalon anlemew so dusa da ray taga Tiro tan Sidon nen say sikayo.

¹⁵ Tan sika, Capernaum, labay moy niatagey ya anggad tawen? Nibantak ka ni inged impirno!”

¹⁶ Inkuantod saray disipulo to, “Siopamay ondengel ed sikayo, siak so dengelen to. Siopamay mangipolisay ed sikayo, siak so ipolisay to; tan say mangipolisay ed siak, say angibakid siak so ipolisay to.”

Pinmawil ira may Pitomplo tan Duan Disipulo

¹⁷ Makakaliket a pinmawil ira may pitomplo tan duan disipulo. “Katawan,” inkuanda, “pati saray dimonyo onuren da kami no iganggan mi ran onekal diad ngaran mo.”

¹⁸ Inmebat si Jesus, “Anengneng koy Satanas a naplag a singa kirmat a nanlapud tawen!

¹⁹ Dengel kayo! Initdan ta kayoy pakaoley ya onggatin ed saray oleg tan alakdan, tan maneral na amin a pakayari nen Satanas. Anggapoy makarigsod sikayo.

²⁰ Balet ag kayo manliliket lapud oonuren kayo ray maoges ya ispiritu. Manliket kayo ingen lapud nisulat ed tawen iray kangaranan yo.”

Nanggayagay Jesus

²¹ Diad saman ya oras, si Jesus pinagayagay Ispiritu Santo. Inkuanen Jesus, “Misalamat ak ed sika, Ama, Katawan na tawen tan dalin, ta inyamut mo ra yan bengatla ed saray makabat tan makatalus, tan impaamtam ed saray totoon mapaabeban singa saray ogogaw. On, Ama, agawa ya ta sikatoy nilabay mo.

²² “Inter na Amak ed siak iray amin a bengatla. Anggapoy mikabat ed Anak likud ed Ama; anggapoy mikabat ed Ama likud ed Anak tan saray labay a pangipakabatan na Anak.”

²³ Insan inarap nen Jesus iray disipulo tan inkuantod sikaran anggapoy arum a makadngel, “Maliket kayo ta nanenengneng yo ray nanenengneng yo natan!

²⁴ Ta amayamay iray ari tan propita, kuankod sikayo, a nampiwarat a makanengneng na nanenengneng yo natan, balet ag da anengneng. Nampirawat met iran makadngel na narerengel yo natan, balet ag da nadngel.”

Say Maung a Samaritano

²⁵ Walay sakey a makabat ed Ganggan ya inmalagey ta labay ton suboken si Jesus. “Maistro,” tepet to, “antoy nepeg a gawaen ko pian nagamuran koy bilay ya andi-anggaan?”

²⁶ Inmebat si Jesus ed sikato, “Antoy nisulat ed Ganggan? Panoy pangipapatalus mo?”

²⁷ Inkuanto may too, “‘Arom so Katawan a Dios mo ed intiron pusom, intiron kamarerwam, intiron biskeg mo, tan intiron kanunotan mo’; tan, ‘Arom so kaabay mo a singa panangarom ed sikan dili.’”

²⁸ “Dugay ebat mo,” kuanen Jesus. “Onur mo itan et nagamuran moy bilay ya andi-anggaan.”

²⁹ Balet labay to may makabat ed Ganggan a bawiey kagalangan to, kanyan tinepet tod kinen Jesus, “Siopay kaabay ko?”

³⁰ Inmebat si Jesus, “Walay sakey a toon mampapaleksab a nanlapud Jerusalem tan oonlad Jerico. Diad dalan, sinabat na tutulisan, inala ray pati kawes ya akasolung ed sikato, pinepekpek da, insan da tinaynan a patey-pateyan.

³¹ Nibanan walay sakey a parin dinmalan diman. Nen anengneng to may too, pinaliisan to tan intuloy toy panaakar to.

³² Dinmalan met diman so sakey a Levita. Nen akasabid saman a pasen tan anengneng to may too, pinaliisan to tan intuloy toy panaakar to.

³³ Wala met so sakey a Samaritano a dinmalan diman. Nen akasabid saman a pasen tan anengneng to may too, akasian to.

³⁴ Inasinggeran to, kinalboan toy larak tan alak iray sugat to, tan binerber to ra. Insan pinakabayo tod dilin ayep to; inawit tod abung a pundowan, tan diman to inasikaso.

³⁵ Nen ontombuk ya agew, angaut na kuartad bulsa to, insan to inter ed samay inkargadoy abung a pundowan. Inkuanto, ‘Asikasom, ta kapawil ko dia, bayaran koy amin a nagastos mo nid panasikasom ed sikato.’”

³⁶ Insan tinepet nen Jesus ed samay makabat ed Ganggan, “Onung ed sikan dili, siopad saramay talora so nanggaway kanepegan na kaabay ed samay toon sinabat na saray tulisan?”

³⁷ “Samay angasid sikato,” ebat to may makabat ed Ganggan. Inkuanen Jesus, “Laka la, sirin, tan ontan met so gawaen mo.”

Binisita nen Jesus ira di Marta tan Maria

³⁸ Nen intuloy nen Jesus tan saray disipulo to so panaakar da, sinmabid sakey a bario. Walad may sakey a biin anangkailid sikato ed abung to. Marta so ngaran to,

³⁹ tan walay agi ton manngaray Maria. Si Maria inyorung tod saliyan na Katawan tan dinmengel ed saray bangat to.

⁴⁰ Si Marta, balet, nakekesawad pansisirbi to, kanyan naingungotan. Dinmagod kinen Jesus tan inkuanto, “Katawan, anggapo tay walad sika, a satay agik et palpaolyan to ak a mankikimey a bukor? Ibagam karid sikaton tulongan to ak!”

⁴¹ Inmebat so Katawan, “Sika, Marta, amayamay a bengatla so pampapagaan tan pansasakitan moy olo.

⁴² Saksakey so talagan nakaukolan! Pinili nen Maria so lalon maung a gawaen, tan ag ya naekal ed sikato.”