Levitico 9 - Maung A Balita Biblia

Angisaklang na saray Bagat si Aaron

¹ Diad ontombuk ya agew kayari na samay sirimonya na panangikonsagra, si Moises tinawag toy Aaron tan saray anak ton lalaki tan saray pangulo na Israel.

² Inkuantod kinen Aaron, “Mangala ka na sakey a kilaw na bakan kalakyan tan sakey a kordiron kalakyan ya anggapoy deral na laman da tan ibagat mo ra ed Katawan, say baka bagat a para kasalanan tan say kordiro bagat a popoolan.

³ Insan ibagam ed saray totood Israel a mangala ray sakey a kanding a kalakyan, ta ibagat da a para kasalanan, sakey taon a baka tan sakey taon a kordiro ya anggapoy deral na laman da, ta isaklang da ran bagat a popoolan,

⁴ tan sakey a bakan kalakyan tan sakey a kordiron kalakyan ta ibagat da ran para kareenan. Ibagat da ra ya ed Katawan a katekep da so bagat a trigo ya inkames ed larak. Nepeg da yan gawaen ta say Katawan mampanengneng ed sikara natan.”

⁵ Inyakar dad arap na Tulda ira may amin ya ingganggan nen Moises ya awiten da, tan nantitipon diman iray amin ya Israelita ta igalang da so Katawan.

⁶ Inkuanen Moises, “Ingganggan na Katawan a gawaen yo ra yan amin, pian nipanengneng ed sikato so kagalangan to.”

⁷ Insan to inkuan ed kinen Aaron, “Lakad altar ta isaklang mo so bagat a para kasalanan tay say bagat a popoolan a mangekal na saray kasalanan mo tan saray kasalanan na saray totoo. Isaklang mo yan bagat a mangekal na saray kasalanan na saray totoo onung na ingganggan na Katawan.”

⁸ Linmad altar si Aaron tan pinatey to may kilaw na bakan kalakyan, ta isaklang a bagat a para saray kasalanan to.

⁹ Saramay anak to inyakar dad sikato so dala, indelnet tod samay dala so tamoro to, pinoranisan to may pinagkasaklur ed saray suyok na altar, tan inibung tod leksab na altar so keran dala.

¹⁰ Insan to pinoolan ed tapew na altar so taba, saray batuk, tan say sankaabigan a parti na altey, onung na ingganggan na Katawan ed kinen Moises.

¹¹ Balet pinoolan tod paway na kampo so karni tan say katat na samay ayep.

¹² Pinatey to may ayep ya ikanad bagat a popoolan a para sikaton dili. Saramay anak to inyakar dad sikato so dala, tan insibu ton amin ed saray apatiran dapag na altar.

¹³ Inter dad sikato so olo tan saray arum a tegteg na samay ayep, insan to ra pinoolan ed tapew na altar.

¹⁴ Inorasan to ray loob-loob tan saray kamanonur a sali, intapew to rad saray arum a kabyangan na samay bagat a popoolan, insan to ra pinoolan ed tapew na altar.

¹⁵ Kayari to ya, insaklang to ra may bagat na saray totoo. Inala to may kanding ya ibagat a para saray kasalanan da ray totoo, pinatey to, tan imbagat to a singa ginawa to ed samay bagat a pangekal na saray kasalanan to.

¹⁶ Inala to met imay ayep para bagat a popoolan tan insaklang to onung ed saray totontonen.

¹⁷ Inyapay to may bagat a trigo, angala na sankaakup ya arina tan pinoolan tod tapew na altar. (Kaaruman ya na inagew-agew a bagat a popoolan.)

¹⁸ Pinatey to may bakan kalakyan tan samay karniron kalakyan, ta ibagat ira a para kareenan; sakey yan bagat a para saray totoo. Saramay anak ton lalaki inyakar dad sikato so dala, tan insibo to ed apatiran dapag na altar.

^19-20 Si Aaron intapew tod saray pagew na samay baka tan samay karniro iray taba, say mataban ikol, say taban kinmulyaput ed saray loob-loob, saray batuk, tan say sankaabigan a parti na altey insan to ra inyakar ya amin ed altar. Pinoolan tod tapew na altar iray taba

²¹ tan inyapay ton nidoma-doman rigalod Katawan a para saray papari ira so pagew tan saray kamanonur a sali, onung na ingganggan nen Moises.

²² Nen asumpal nen Aaron ya insaklang iray amin a bagat, inyatagey to ray lima to tan impaarap to rad katoowan, tan binindisionan to ra, insan linmasur.

²³ Si Moises tan si Aaron linmoob irad dalem na samay Tuldan Ayamay Katawan; nen pinmaway ira binindisionan da ray katoowan tan pinmatnag ed amin a totoo so kagalangan na Katawan.

²⁴ Kabebekta say Katawan angipelag na apoy, tan inoput ton pinoolan imay bagat a popoolan tan saramay taba ed tapew na altar. Nen anengneng ya na saray totoo, inmeyag iran amin tan dinmakmomo ra ya anggad dalin.