Levitico 8 - Maung A Balita Biblia

Say Inkakonsagra di Aaron tan saray Anak ton Lalaki

¹ Say Katawan kuantod kinen Moises,

² “Iyakar mod lolooban na Tuldan Ayamay Katawan si Aaron tan saray anak ton lalaki; piawit mod man iray kawes na pari, saray larak ya ilalana, say kilaw na bakan kalakyan ya ibagat a para kasalanan, saray duaran karniron kalakyan, tan say sambaskit a tinapay ya anggapoy libadura.

³ Insan mod man tawagen iray amin ya Israelita.”

⁴ Sinumpal nen Moises ira may ingganggan na Katawan, et nen akapantitipon la ray katoowan,

⁵ inkuantod sikara, “Ingganggan na Katawan so gawaen ko natan.”

⁶ Si Moises inyakar tod arap ira di Aaron tan saramay anak ton lalaki, insan to ra inames onung ed ganggan.

⁷ Kayari to ya, insolung tod kinen Aaron so kawes ya antikey so taklay tan say tunika insan to binalkesay abel so awak nen Aaron. Insolung tod sikato so ipod tan tinapewan tod awak na balibalin inabel a balkes.

⁸ Insolung tod sikato so apis na pagew tan inyan to dia so Urim tan Tummim.

⁹ Insan to impatoon ed olo to so turban, tan diad arap na sayan turban impeket toy balituk ya arkos, say masanton tanda na inkisaklang, onung na ingganggan na Katawan ed kinen Moises.

¹⁰ Insan inala nen Moises imay larak a panaglana tan nilanaan to may Tuldan Ayamay Katawan tan amin a wadman ed dalem to, et diad onya insaklang to ran amin ed Katawan.

¹¹ Angalay daiset ed samay larak tan amimpito ton inwalsik ed altar tan diad saray kagawaan to, diad talyasi, tan say ansagan to a pangisaklang to rad Katawan.

¹² Kinonsagra toy Aaron diad impangikalbo tod olo to na larak a panaglana.

¹³ Kayari to ya, insoblay ton pinaonlad arap ira may lalakin anak nen Aaron tan sinolungan to ray kawes ya antikey so taklay. Insan to ra binalabalan ed awak, tan siningeran toy kaoloan da na sakub na toktok na olo, onung na ingganggan na Katawan.

¹⁴ Insan si Moises inyakar to may kilaw na bakan kalakyan ya ibagat a para kasalanan, et si Aaron tan saray lalakin anak to intapew dad olo na samay baka iray kalimaan da.

¹⁵ Pinatey nen Moises imay baka tan inala to na dala. Insan diad panamegley na tamoro to pinoporanisan to na dala iray pinagkasaklur ed saray soyuk na altar pian nisaklang to. Kayari to ya, inibung tod leksab na altar so keran dala. Diad onya insaklang to tan nilinisan to onung ed ganggan.

¹⁶ Inala nen Moises iray amin a taba na saray loob-loob, say sankaabigan a parti na altey, tan saray batuk a pati taba ra, insan to ra pinoolan ed tapew na altar.

¹⁷ Inala to ray amin ya akeraan ed samay baka pati say katat to, say laman to, tan say pait to, insan to ra pinoolan ed paway na kampo onung na ingganggan na Katawan.

¹⁸ Kayari to ya, si Moises inyakar to may karniron kalakyan a para bagat a popoolan. Insan si Aaron tan saray lalakin anak to intapew dad oloy ayep iray kalimaan da.

¹⁹ Pinatey nen Moises imay karniro tan insibo tod apatiran kapag na altar so dala.

^20-21 Tinetegteg to may karniro, inorasan to na danum iray loob-loob tan saray kamanonur a sali, insan to pinoolan to so olo, say taba, tan amin ni ran atilak a parti na samay karniro, onung na ingganggan na Katawan. Sayan bagat et sakey a bagat a popoolan, tan makapaliket ed Katawan so balingit to.

²² Insan inyakar nen Moises imay kumadwan karniron kalakyan para pangikonsagrad saray papari. Insan si Aaron tan saray lalakin anak to intapew dad oloy ayep iray kalimaan da.

²³ Pinatey nen Moises imay karniro tan angala na daiset a dala insan to imponaris ed gilig na kawanan a layag nen Aaron, diad kawanan a tangan na lima to tan diad kawanan a tangan na sali to.

²⁴ Insan to inyakar ed arap ira may lalakin anak nen Aaron tan pinoranisan to na dala iray gilig na kawanan a kalayagan da, diad kawanan a tangan na kalimaan da, tan diad kawanan a tangan na kasaliyan da. Insan si Moises inwalsik tod apatiran dapag na altar so keran dala.

²⁵ Inala toy taba, saray mataban ikol, amin a taban kinmulyaput ed saray loob-loob, say sankaabigan a parti na altey, saray batuk a pati taba ra, tan say kamanonan kawanan a sali.

²⁶ Insan to angalay sakey a tinapay ed samay baskit a kawalaay tinapay ya anggapoy libadura a nisaklang ed Katawan, sakey a tinapay ya inlutod larak, tan sakey a maimpis a tinapay tan intapew to ra ed samay taba tan diad samay kamanonan kawanan a sali.

²⁷ Inyan to ra yan amin a kakanen diad saray lima nen Aaron tan diad lima na saramay anak to tan inyapay da a nidoma-doman rigalo ed Katawan.

²⁸ Insan inala nen Moises ira may kakanen a walad lima ra, intapew to rad bagat a popoolan, insan to ra pinaoolan ed tapew na altar. Sikato yay bagat a panangikonsagra. Sikato yay bagat a popoolan tan makapaliket ed Katawan so balingit to.

²⁹ Insan inala nen Moises so pagew tan inyapay ton sakey a nidoma-doman rigalo ed Katawan. Sikato yay parti a kayaryan nen Moises ed samay karniron inkanad impangonsagra. Ginawa nen Moises so onung na ingganggan na Katawan.

³⁰ Inala nen Moises imay larak ya ipopoyuk tan angala na daiset a dala a walad tapew na altar tan inwalsik tod kinen Aaron tan diad saramay anak to; winalsikan to met iray kawes da. Diad onya inkonsagra to rad Katawan pati saray kawes da.

³¹ Inkuanen Moises ed kinen Aaron tan saray anak ko, “Iyakar yod lolooban na Tuldan Ayamay Katawan so karni, lambung yo, tan akan yod aman a pati say tinapay a walad baskit na saray bagat na panangikonsagra, onung na ingganggan na Katawan.

³² Poolan yoy amin a nakeraan a karni tan tinapay.

³³ Diad loob na pitoran agew ag kayo ontataynan ed lolooban na Tulda, ya anggad nasumpal so sirimonyay panangikonsagra.

³⁴ Ingganggan na Katawan so ginawa tayo natan, pian naekal so kasalanan yo.

³⁵ Diad loob na pitoran agew nepeg a manayam kayod mad lolooban na Tulda diad agew tan labi tan gawa yoy ingganggan na Katawan. No ag yo sumpalen, ompatey kayo. Sikato ya so ingganggan na Katawan ed siak.”

³⁶ Kanyan si Aaron tan saramay anak to sinumpal day amin ya ganggan na Katawan diad panamegley nen Moises.