Levitico 7 - Maung A Balita Biblia

Saray Bagat a Pambayar

¹ Saray onggendan a totontonen et nipaakar ed saray bagat a pambayar, masanton tuloy ira.

² Say ayep a para sayan bagat et nepeg a pateyen diad nibaybay na altar a dimay panamateyan ed saray ayep ya ibagat a popoolan, tan say dala to et isibo ed saray apatiran dapag na altar.

³ Amin a taba ekalen tan ibagat ed tapew na altar: say mataban ikol, say taban kinmolyaput ed saray loob-loob,

⁴ saray batuk a pati taba ra, tan say sankaabigan a kabyangan na altey.

⁵ Say pari poolan tod tapew na altar iray amin a taba a sakey a bagat a popoolan ed Katawan. Sakey yan bagat a pambayar.

⁶ Siopamay lakin kabyangan na pamilyay pari et nayarian toy mangan ed sayan bagat, balet nepeg a kanen ed sakey a masanton pasen, lapud masanton tuloy yan bagat.

⁷ Walay sakey a totontonen a nepeg a sumpalen ed pangisaklang na bagat a para kasalanan tan diad bagat a pambayar: say karni kayaryan na pari ya angibagat.

⁸ Say katat na ayep a nisaklang a bagat a popoolan et kayaryan na pari ya angibagat.

⁹ Amin a bagat a trigo a nilutod ornowan odino diad kawali odino diad bibingkaan et kayaryan na pari ya angibagat.

¹⁰ Balet amin ya ag niluton bagat a trigo, nilaukan man na larak odino andi, kayaryan na amin a lalakin anak nen Aaron tan nepeg a mampaparay betang na sakey ed sikara.

Saray Bagat a Para Kareenan

¹¹ Saray onggendan a totontonen et nipaakar ed pangisaklang ed Katawan na saray bagat a para kareenan.

¹² No say sakey a too et mangisaklang na sayan bagat a pisalamat tod Dios, nepeg a tekepan to na bagat a tinapay ya anggapoy libadura: nayarin makapal a tinapay a nikames ed larak na oliba, odino maimpis a pinoranisay larak na oliba, odino tinapay a nikames ed dakel a larak.

¹³ Mangyapay met ni na saray tinapay a walay libadura.

¹⁴ Mangiter na sakey a pisag na balang nengneng na tinapay tan iyapay tod Katawan; kayaryan ya na parin mangala na dala na samay ayep tan isibo tod altar.

¹⁵ Say karni na ayep nepeg a kanen ed agew ya impangibagat; nepeg ya anggapoy nakeraan ya anggad kabwasan.

¹⁶ No say sakey a too et mangyakar na bagat a para kareenan, a panumpal tod sipan to odino pangibagat tod mabulos a linawa, aliwan amin et nepeg a kanen diad agew ya impangibagat, no ag ingen say nakeraan nayarin kanen ed ontombuk ya agew.

¹⁷ Nepeg a poolan so antokaman a karnin nakeraan ed kumatlon agew.

¹⁸ No walay karnin kinan ed kumatlon agew, say Dios ag to awaten so bagat na samay too. Sayan bagat ag nipasen a manepeg a bagat na samay too, no ag ingen sakey bagat a marotak, tan nadusa so siopamay mangan ed sayan bagat.

¹⁹ No say karni et nidiwit ed antokaman a marotak onung ed ganggan, ag nepeg a kanen, no ag ingen poolan. Siopamay malinis onung ed ganggan nayarin mangan ed samay karni,

²⁰ balet no say toon marotak onung ed ganggan et mangan ed samay karni, sikatoy nipasen ya aliwa lan sakey ed saray totoo na Dios.

²¹ Ontan met, no say sakey a too et mangan ed karni na sayan bagat kayari ton diniwit so bengatlan marotak onung ed ganggan, manlapu man ed too odino ayep, nipasen ya aliwa lan sakey ed saray totoo na Dios.

²² Say Katawan inter tod kinen Moises iray onggendan a totontonen

²³ a nepeg a sumpalen na saray totood Israel. Ag nepeg a kanen so taba na baka, karniro, odino kanding.

²⁴ Nepeg ya ag kanen so taba na ayep ya inatey a bukor odino pinatey na ayep ed takel, balet nayarin ikana ed arum a pamaakaran.

²⁵ Siopamay mangan na taba na ayep ya ibagat a popoolan ed Katawan, et nipasen ya aliwa lan sakey ed saray totoo na Dios.

²⁶ Anggan iner so panaayaman na saray Israelita, ag da nepeg a kanen so dala na manok odino ayep.

²⁷ Siopamay onsumlang ed sayan ganggan nipasen ya aliwa lan sakey ed saray totoo na Dios.

²⁸ Say Katawan inter tod kinen Moises iray onggendan a totontonen

²⁹ a nepeg a sumpalen na saray totood Israel. Siopamay mangisaklang na bagat a para kareenan nepeg a manyakar na kabyangan na laman na samay ayep a rigalo tod Katawan.

³⁰ Sikaton dili so mangawit na sayan bagat a popoolan. Awiten to so taba tan pagew na samay ayep tan iyapay ton rigalo ed Katawan.

³¹ Say pari poolan tod tapew na altar imay taba, balet samay pagew kayaryan na saray papari.

³² Say kawanan a kamanonur ya ulpo na samay ayep et niiter

³³ ed pari a mangisaklang na dala tan taba na bagat a para kareenan.

³⁴ Say pagew na ayep tan say kawanan a kamanonur ya ulpo to et sakey iran rigalo ya inalay Katawan ed saray Israelita tan inter tod saray papari. Sikato ya so nepeg ya iter na saray Israelita ed saray papari kapigan man a panaon.

³⁵ Sikato yay parti na bagat a popoolan so niiter ed kinen Aaron tan saray anak ton lalaki nen nikonsagra ran papari na Katawan.

³⁶ Diad saman ya agew say Katawan ingganggan to ray totood Israel ya iter dad sikara so sayan parti na bagat. Sikato yay sakey a totontonen a nepeg ya onuren na saray totood Israel kapigan man a panaon.

³⁷ Sikara ya sirin so totontonen a para saray bagat a popoolan, saray bagat a trigo, saray bagat a para kasalanan, saray bagat a pambayar, saray bagat a pangikonsagra, tan saray bagat a para kareenan.

³⁸ Diad Palandey na Sinai diad kalawakan, say Katawan inter to ra yan ganggan ed kinen Moises diad samay agew ya imbaga tod saray totood Israel a mangibagat ira.