Levitico 6 - Maung A Balita Biblia

¹ Say Katawan inter tod kinen Moises iray onggendan a totontonen.

² Nakaukolan so pangisaklang na sakey a bagat no say sakey a too et nankasalanan ed Katawan lapud ag to impangipawil na indipositod sikato na kapara ton Israelita, odino lapud impanakew tod sikato na bangatla odino lapud impansaol tod sikato,

³ odino lapud impangibori to ed nalmo ton bengatla ya abalang tan nansamba ni ingen ya ag to nalmo.

^4-5 No say sakey a too et nankasalanan na anggan dinan ed saray abitla, nepeg a bayaran toy inala tod sinasaol a polaing. Diad agew a sikatoy naamtaan a nankasalanan, nepeg a bayaran to may angalaan to tan pasolukan to na kakalima.

⁶ Mangyakar ed pari na sakey a kalakyan a karniro odino kanding ya anggapoy deral na laman to, ta ibagat ton pambayar ed Katawan. Say bili na sayan bagat kuintaen onung ed panagkuinta ed santuario.

⁷ Say pari ibagat to so ayep a pangekal na kasalanan to yan too, et napirdona yan too.

Saray Bagat a Popoolan

⁸ Say Katawan ingganggan toy Moises

⁹ ya iter tod kinen Aaron tan saray lalakin anak to iray onggendan a totontonen a nipaakar ed saray bagat a popoolan. Say bagat a popoolan et nepeg ya itilak a sanlabi ed tapew na altar, tan nepeg a mandarlang lawas so apoy.

¹⁰ Insan say pari ya akasolung na linen a tunika tan linen a pantalon a potut ekalen to ray dapul ya atilak ed altar tan iyan to ra ed dapag na samay altar.

¹¹ Insan mansalat na kawes tan iyakar tod paway na kampo ira may dapul diad pasen a malinis onung ed ganggan.

¹² Nepeg a mandarlang lawas so apoy ed tapew na altar tan ag balut paolyan a naerep. Kapag kabwasan sungloran na pari so apoy, apigeren ton ilira iray bagat a popoolan a walad tapew na altar, tan poolan toy taba na bagat a para kareenan.

¹³ Nepeg a mandarlang lawas so apoy ed tapew na altar tan ag balut paolyan a naerep.

Saray Bagat a Trigo

¹⁴ Saray onggendan a totontonen et nipaakar ed saray bagat a trigo. Say sakey ed saray paparin anak nen Aaron et isaklang tod Katawan diad arap na altar so bagat a trigo.

¹⁵ Alaen toy sankaakup ed samay arinan pinatoroan na larak, tan amin ya insinson walad tapew to, insan poolan to ra ed tapew na altar a pakapatnagan a nibagat lan amin ed Katawan imay arina; makapaliket ed Katawan so balingit na sayan bagat.

^16-17 Kanen na saray papari so akeraan ed samay arina. Nepeg a gawaen a tinapay ya anggapoy libadura tan kanen ed masanton pasen, diad solar na Tuldan Ayamay Katawan. Say Katawan inter to yad saray papari a nabebetangan da ed saray bagat a popoolan. Masanton tuloy yan bagat, a singa saray bagat a para kasalanan tan saray bagat a pambayar.

¹⁸ Diad amin a panaon ya onsabi siopaman ed saray lalakin kabyangay boleg nen Aaron et nayarin mangan ed saray akeraan ed bagat a trigo tan sikatoy betang da lawas ed saray bagat a popoolan ya insaklang ed Katawan. Siopamay arum a maniwit ed sayan bagat napasakitan na pakayari na inkasanto na bagat.

¹⁹ Say Katawan inter tod kinen Moises iray onggendan a totontonen

²⁰ a nipaakar ed pangikonsagrad kinen Aaron tan saray lalakin anak to. Diad agew na pangikonsagrad siopaman ed sikara, sikatoy mangibagat ed Katawan na sakey kilon arina (singa karakel na samay inagew-agew a bagat a trigo), say kapaldua diad kabwasan tan say kapaldua diad labi.

²¹ Nepeg a nikames ed larak imay arina tan niluto ed bibingkaan, pingpinglisen, insan isaklang a bagat a trigo ed Katawan; makapaliket ed Katawan so balingit na sayan bagat.

²² Diad amin a panaon ya onsabi sayan bagat et nepeg ya isaklang na balang kabyangan na boleg nen Aaron a manlilingkur a sakey a Pangulon Pari. Nepeg a sigput a napoolan yan bagat ya isaklang ed Katawan.

²³ Anggapoy nayarin kanen ed bagat a trigo ya isaklang na pari; amin et nepeg a poolan.

Saray Bagat a para Kasalanan

²⁴ Say Katawan ingganggan toy Moises

²⁵ ya iter tod kinen Aaron tan saray anak to iray onggendan a totontonen a nipaakar ed saray bagat a para kasalanan. Say ayep ya ibagat a para kasalanan et pateyen ed nibaybay na altar a dimay panamateyan ed saray ayayep ya ibagat a popoolan. Masanton tuloy yan bagat.

²⁶ Say parin mangibagat ed samay ayep kanen tod masanton pasen, diad solar na Tuldan Ayamay Katawan.

²⁷ Siopaman odino antokaman a makadiwit ed laman na samay ayep napasakitan na pakayari na inkasanto to. No napolasian na dala na samay ayep so dinan man a kawes nepeg ya ipesak ed masanton pasen.

²⁸ Dinan man a bangan panlambungan ed karni na samay ayep nepeg a betagen, tan no gansan kaldiro so ikana, nepeg a gisigisen insan orasan na danum.

²⁹ Siopamay lakin kabyangan na pamilyay pari et nayarian toy mangan ed sayan bagat; masanton tuloy yan bagat.

³⁰ Balet no walay dala a niakar ed dalem na Tulda tan nikana ed sirimonya a pangekal na kasalanan, say ayep ya akandala et ag nepeg a kanen; nepeg a poolan.