Levitico 5 - Maung A Balita Biblia

Saray Kason Mankaukolan na saray Bagat a Para Kasalanan

¹ Say bagat a para kasalanan et nakaukolan ed saray onggendan a kaso. No say sakey a too et tinawag na korti a mantasi et ag to ibaga so nipaakar ed anengneng odino nadngel to, nepeg a nadusa.

² No say sakey a too et ag to ginagalan adiwit so bengatlan marotak onung ed ganggan, a singa bilang say inatey ya ayep, magmaliw a marotak tan nankasalanan diad bektan abirbir to so agawa to.

³ No say sakey a too et ag to ginagalan adiwit so bengatlan marotak a nanlapud too, anggan anton bengatla, sikatoy nankasalanan diad bektan abirbir to so agawa to.

⁴ No say sakey a too et nansamban andi-nunotan, ya anggan antoy kipaakaran, sikatoy nankasalanan diad bektan abirbir to so ginawa to.

⁵ No say sakey a too et nankasalanan na anggan dinan ed saray abitla, nepeg ton ipatua so kasalanan to,

⁶ tan say dusay kasalanan to et say pangibagat tod Katawan na sakey a kabatyan a karniro odino kanding. Say pari isaklang to so bagat a para kasalanan to yan too.

⁷ No say sakey a too et ag to nayarian so mangibagat na kordiro odino kanding lapud irap na bilay to, mangyakar ed Katawan na duaran palekpek odino duaran malangwer a malapati a pinagkabayar na kasalanan to; say sakey ibagat para kasalanan tan say sakey isaklang a bagat a popoolan.

⁸ Iyakar to ra ed pari, tan say pari onaen ton isaklang so manok ya ibagat para kasalanan. Yesyesen tod beklew balet ag to ekalen so olo.

⁹ Insan to iwalsik ed dapag na altar so daiset a dala to. Say arum a dala ipaterter tod leksab na altar. Sikato yay bagat a pangekal na kasalanan.

¹⁰ Insan to isaklang imay sakey a manok a sakey a bagat a popoolan, onung ed saray totontonen. Diad onya say pari isaklang to so bagat a para kasalanan na sakey a too, et napirdona yan too.

¹¹ No ag nayarian na sakey a too so mangibagat na duaran palekpek odino duaran malangwer a malapati lapud irap na bilay to, mangyakar na sakey kilon arina a bagat ton para kasalanan. Ag to laukan na larak na oliba odino insinso, lapud bagat a para kasalanan.

¹² Iyakar tod pari imay arina, insan samay pari mangalay sankaakup ed samay arina a pakapatnagan a nibagat lan amin ed Katawan imay arina. Diad tapew na altar poolan ton bagat a popoolan imay sankaakup ya arina. Sikato ya so bagat a mangekal na kasalanan.

¹³ Diad onya say pari isaklang to so bagat a para kasalanan na sakey a too, et napirdona yan too. Say soluk ed samay arina kayaryan na pari, a singa say gawaen ed bagat a trigo.

Saray Bagat a Pambayar

¹⁴ Say Katawan inter tod kinen Moises iray onggendan a totontonen.

¹⁵ No say sakey a too et nankasalanan ya ag to ginagala lapud ag to impangiter na saray babayaran a masantod Katawan, nepeg a mangyakar na sakey a kalakyan a karniro odino kanding ya anggapoy deral na laman to, ta ibagat to a pambayar. Say bili na sayan bagat kuintaen onung ed panagkuinta ed santuario.

¹⁶ Nepeg ya iter toy ag to abayaran tan pasolukan to na kakalima. Iter to ya ed pari, tan say pari ibagat to so ayep a pangekal na kasalanan to yan too, et napirdona yan too.

¹⁷ No say sakey a too et ag to ginagalan asumlang so sakey ed saray ganggan na Katawan, nankasalanan tan nepeg a nadusa.

¹⁸ Nepeg a mangyakar ed pari na sakey a kalakyan a karniro odino kanding ya anggapoy deral na laman to, ta ibagat to a pambayar. Say bili na sayan bagat kuintaen onung ed panagkuinta ed santuario. Say pari isaklang to so bagat a pangekal na ag ginagalan kasalanan to yan too, et napirdona yan too.

¹⁹ Sakey yan bagat a pambayar ed kasalanan a ginawa to sumpad Katawan.