Levitico 3 - Maung A Balita Biblia

Saray Bagat a Para Kareenan

¹ No say sakey a too et mangisaklang ed Katawan na bagat a para kareenan tan sakey ed saray baka to so ibagat to, nepeg a sakey a kalakyan odino kabatyan ya anggapoy deral na laman to.

² Say too itapew tod olo na samay ayep so lima to tan pateyen tod diad lolooban na Tuldan Ayamay Katawan. Saray paparin anak nen Aaron isibo rad apatiran dapag na altar so dala to may baka,

³ insan saray onggendan a parti na ayep isaklang dan bagat a popoolan ed Katawan: amin a taba ed saray loob-loob,

⁴ saray duaran batuk a pati taba ra, tan say sankaabigan a parti na altey.

⁵ Saray papari poolan da ra yan amin diad tapew na altar a pati saray bagat a popoolan. Makapaliket ed Katawan so balingit na sayan bagat.

⁶ No sakey a karniro odino sakey a kanding so ibagat a para kareenan, nayarin sakey a kalakyan odino kabatyan, balet nepeg ya anggapoy deral na laman to.

⁷ No say sakey a too et mangibagat na sakey a karniro,

⁸ itapew tod olo na samay ayep so lima to tan pateyen to ed arapan na Tulda. Saray papari isibo rad apatiran dapag na altar so dala to may ayep

⁹ tan saray onggendan a parti na ayep isaklang dan bagat a popoolan ed Katawan: say taba, say mataban ikol a pinotut ed abay na tenten, amin a taban kinmolyaput ed saray loob-loob,

¹⁰ saray batuk a pati taba ra, tan say sankaabigan a parti na altey.

¹¹ Say parin mangibabagat poolan to ra yan amin ed tapew na altar a sakey a bagat a popoolan ed Katawan.

¹² No say sakey a too et mangibagat na kanding,

¹³ itapew tod olo na samay ayep so lima to tan pateyen to ed arapan na Tulda. Saray papari isibo rad dapag na altar so dala to

¹⁴ tan saray onggendan a kabyangan na laman na ayep et ibagat dan popoolan ed Katawan: amin a taba na saray loob-loob,

¹⁵ saray batuk a pati saray taban kinmolyaput ed saraya, tan say sankaabigan a parti na altey.

¹⁶ Say pari poolan to ra yan amin ed tapew na altar a sakey a bagat a makapaliket ed Katawan. Amin a taba kayaryan na Katawan.

¹⁷ Anggapoy Israelita a nayarin mangan na taba odino dala; sayan totontonen et nepeg a sumpalen na amin ya Israelita ed anggan kapigan tan iner man a panaayaman da.