Levitico 24 - Maung A Balita Biblia

Say Panasikaso ed saray Lamparaan

¹ Say Katawan imbaga tod kinen Moises

² ya iganggan to ray Israelita a mangiter iray puro tan sankaabigan a larak na oliba ta ikanad saray lamparaan ed dalem na Tulda, pian naynay a mandarlang so silew.

³ Kapag labi si Aaron selselan to ra tan pansiansiaen to ran mandarlang ya anggad kabwasan, diad arap na Katawan ed paway na kurtinad arap na Kaban na Sipanan a walad dalem na Sankasantosan a Pasen. Sayan totontonen et nepeg a tombuken ya anggan kapigan man a panaon.

⁴ Si Aaron et asikasoen to ray lamparaan a walad saray panangipatoonan a puron balituk tan pampagaan to a mandarlang iran naynay ed arap na Katawan.

Say Tinapay a Nisaklang ed Dios

⁵ Mangala kayoy samplora tan kapalduan kilon arina, ta manggawa kayoy labinduan tinapay.

⁶ Idatak yo a duaran dasig iray tinapay, anemira ed kapag dasig, diad tapew na lamisaan ya inokupan na puron balituk tan walad arap na Katawan.

⁷ Mangyan kayo na daiset ya insinso ed kapag dasig, a pakapatnagan a sikatoy bagat a popoolan ed Katawan, a mangalay pasen na tinapay.

⁸ Kapag Agew na Panagpainawa, anggan kapigan man a panaon, say tinapay nepeg ya ilira ed arap na Katawan. Sikato yay andi-anggaan a susumpalen na saray totood Israel.

⁹ Say tinapay kayaryan nen Aaron tan saray kabyangay boleg to, tan kanen da ed masanton pasen, lapud masanton tuloy yan parti na bagat a popoolan ed Katawan, a para saray papari.

Say Matonung tan Maptek a Panagdusa

^10-11 Walay lakin say ama to et sakey ya Egipsio tan say ina to et sakey ya Israelitan manggaray Selomit ya anak nen Dibri a kabyangay tribu nen Dan. Diad kampo sayan laki akikolkol ed sakey ya Israelita. Legan na pankokolkol dan dua inayew toy Katawan imay laki, kanyan inyakar dad kinen Moises,

¹² impabantayan da, tan nanalagar ira no antoy ibaga na Katawan a gawaen dad sikato.

¹³ Say Katawan kuantod kinen Moises,

¹⁴ “Ipaway yod kampo itan a too. Balang sakey a toon akadngel ed impanayew tod Katawan et itapew to ray lima to ed olo na satay too a pangipaneknek ton sikatoy nankasalanan, insan amin ya Israelita tupaken da ya anggad ompatey.

¹⁵ Insan ibagam ed saray totood Israel a siopamay mansalita na maoges sumpad Dios nepeg a pandusaan toy maoges a ginawa to

¹⁶ tan pateyen. Siopamay Israelita odino sangkaili a manaayam ed dalin da ray Israelita a mansalita na maoges sumpad Katawan nepeg a tupaken na amin ya Israelita ya anggad ompatey.

¹⁷ “Siopamay mamatey na kapara ton too, nepeg a pateyen,

¹⁸ tan siopamay mamatey na ayep na kapara ton too, nepeg a salatan to. Say bilay bayaran na bilay.

¹⁹ “No sinugatan na sakey a too so kapara ton too, nepeg a gawaen ed sikato so ginawa to.

²⁰ No amoter na pokel na kapara ton too, nepeg a poteren met so pokel to; no anokit na mata na kapara ton too, nepeg a sukiten met so mata to; no angekal na ngipen na kapara ton too, nepeg ya ekalen met so ngipen to. No anugat na kapara ton too, nepeg a sugaten met a singa impanugat to.

²¹ Siopamay amatey na ayep na kapara ton too nepeg a salatan to, balet siopamay mamatey na kapara ton too, nepeg a pateyen.

²² Sayan ganggan et para sikayon amin ya Israelita tan saray sangkailin manaayam ed dalin yo, lapud siak so Katawan a Dios yo.”

²³ Nen nibaga la ya nen Moises ed saray totood Israel, impaway dad kampo may laki tan tinupak da ya anggad inatey. Diad onya saray totood Israel ginawa ra so ingganggan na Katawan ed kinen Moises.