Levitico 18 - Maung A Balita Biblia

Saray Sebel a Kagagawan nipaakar ed Pipiakdul

^1-2 Say Katawan kuantod saray Israelita diad panamegley nen Moises, “Siak so Katawan a Dios yo.

³ Ag yo aaligen iray kagagawa na saray Egipsio a nanayaman yo nen saman, odino saray kagagawa da ray taga dalin na Canaan a pangyaakaran kod sikayo natan.

⁴ Sumpal yo ray ganggan ko tan tombuk yo ray bilin kod sikayo. Siak so Katawan a Dios yo.

⁵ Tombuk yo ray ganggan tan saray bilin ya iter kod sikayo; makapansiansia kayon mambilay no onuren yo ra. Siak so Katawan.”

⁶ Say Katawan inter to ray onggendan a totontonen. Ag kayo miaakdul ed siopaman ya asingger a kanayon yo. Siak so Katawan.

⁷ Ag mo ipepelag ed kababaingan so amam lapud piakdul mod inam. Ag nepeg ya ipelag mod kababaingan so dilin inam.

⁸ Ag yo ipepelag ed kababaingan so amam lapud piakdul mod siopaman ya asawa to.

⁹ Ag ka miaakdul ed peteg ya agim a bii odino agim ed ama odino ina, anggaman a sasakey ya abung so binalegan yo.

¹⁰ Ag mo piaakdulan so apom a bii; ipelag to ka ya ed kababaingan.

¹¹ Ag ka miaakdul ed biin anak nen amam ed sananey a bii ta agim met ni lamlamang.

^12-13 Ag ka miaakdul ed panginaen mo, agi man na amam odino agi na inam.

¹⁴ Ag ka miaakdul ed asawa na pangamaen mo, ta panginaen mo met ni lamlamang.

¹⁵ Ag ka miaakdul ed biin manugang mo

¹⁶ odino diad ayrom.

¹⁷ Ag ka miaakdul ed anak odino apo na biin akiakdulan mo la; nayarin asingger a kanayon mo et maoges a tuloy so piakdul mod sikato.

¹⁸ Ag mo aasawaen so ayrom legan a mabilay niy asawam.

¹⁹ Ag ka miaakdul ed biin naliliberan, ta marotak onung ed ganggan.

²⁰ Ag ka miaakdul ed asawa na sananey a laki; pagmaliwen to kan marotak onung ed ganggan.

²¹ Ag mo aabuloyan a saray anak mo et nikana ra ed pangigalang ed diyos-diyos a Moloc, ta mangipelag ya ed kababaingan na ngaran na Dios.

²² Ag nepeg a say sakey a laki et miakdul ed kapara ton laki; kabosul ya na Dios.

²³ Ag nepeg a misiping ed ayep so sakey a laki odino bii; mabambanday yan kagagawa tan pagmaliwen to kayon marotak onung ed ganggan.

²⁴ Ag yo dodotakan so sikayon dili onung ed ganggan diad panamegley na sarayan kagagawa, ta saray paganon manaayam ed dalin a laen yo et sikara yay impanotak dad sikaran dili; pataynanen ira na Katawan pian nalooban yoy dalin da.

²⁵ Lapud saray kagagawa ra dinotakan da so dalin da, kanyan say Katawan dudusaen to so dalin tan gagawaen ton pagiten na sayan dalin iray totoon manaayam diman.

^26-27 Ginawa ra yan amin a mabambanday a kagagawa kanyan dinotakan day dalin, balet ag nepeg a gawaen yo ra ya. Amin yo, Israelita kayo man odino sangkaili, nepeg ya onuren yo ray ganggan na Katawan tan saray bilin to,

²⁸ et diad ontan say dalin ag to kayo pagiten, a singa impamagit tod saray pagano a nanayam diman kasakbayan na panayam yo.

²⁹ Ta siopamay manggawad sarayan mabambanday a kagagawa et ag la nibilang a sakey ed saray totoo na Dios.

³⁰ Say Katawan kuanto, “Sumpal yo ray ganggan ya iter kod sikayo tan ag yo aaligen iray kagagawa na saray totoon manaayam ed dalin a laen yo, tan ag yo dodotakan so sikayon dili diad panggawa yod dinan man ed saraya. Siak so Katawan a Dios yo.”