Levitico 10 - Maung A Balita Biblia

Say Kasalanan di Nadab tan Abiu

¹ Di Nadab tan Abiu a lalakin anak nen Aaron inala ra so pananginay insinso na balang sakey ed sikara, kinargaan da ra na ngalab, tinapewan da ra na insinso, insan da ra inyapay ed Katawan. Balet aliwa yan masanton apoy, ta say Katawan ag to ra ingganggan ya iyapay da.

² Kabebekta say Katawan angipelag na apoy tan pinoolan to ra ya anggad ag da impatey ed arap to.

³ Insan inkuanen Moises ed kinen Aaron, “Sikato yay sasalitaen na Katawan nen inkuanto, ‘Amin da ray manlingkur ed siak nepeg a pagalangan day inkasantok; ipatnag kod saray totook so kagalangan ko!’” Balet ag inmesel si Aaron.

⁴ Tinawag nen Moises ira di Misael tan Elzafan a lalakin anak nen Uziel a pangamaen nen Aaron, tan kuantod sikara, “Gali dia ta alsa yo ray bangkay na kakapinsan yo diad masanton Tulda, tan iyakar yo rad paway na kampo.”

⁵ Kanyan dinmago ra tan say kawes ya akasolung ed saramay bangkay so nanlibitan da nen impaway da rad kampo, onung na ingganggan nen Moises.

⁶ Insan inkuanen Moises ed kinen Aaron tan diad saray lalakin anak to a di Eleazar tan Itamar, “Ag yo papaolyan ya agotgot so buek yo, odino pipilaten iray kawes yo diad pangipanengneng yon maneermen kayo. No gawaen yo ompatey kayo, tan say Katawan mampasnuk ed amin ya Israelita. Balet amin a kapara yon Israelita et naabuloyan iran manermen, lapud sayan patey a say makasengeg et say apoy ya impelag na Katawan.

⁷ Ag kayo ontataynan ed lolooban na Tulda, ta no ontaynan kayo ompatey kayo, lapud nisaklang kayo diad panamegley na ilalana a larak na Katawan.” Kanyan ginawa ra so imbaga nen Moises.

Saray Totontonen a para saray Papari

⁸ Say Katawan kuantod kinen Aaron,

⁹ “Sika tan saray lalakin anak mo et ag nepeg ya onloob ed Tuldan Ayaman ko kayari yon oninom na alak odino arum nin mabayanin inomen, ta no gawaen yo ya, ompatey kayo. Sikato ya so sakey a ganggan a nepeg a sumpalen na amin a kabyangay boleg mo.

¹⁰ Nepeg yon pambiigan so bengatlan kayaryan na Dios tan say bengatlan kayaryan na karaklan; nepeg yo met a pambiigan so malinis tan say marotak onung ed ganggan.

¹¹ Nepeg yo met ya ibangat ed saray totood Israel iray amin a ganggan ya inter kod sikara diad panamegley nen Moises.”

¹² Si Moises inkuantod kinen Aaron tan saray nakdaan a lalakin anak to a di Eleazar tan Itamar, “Ala yoy bagat a trigo ya akeraan ed bagat a popoolan ed Katawan, gawa yon tinapay ya anggapoy libadura insan yo kanen ed abay na altar, lapud masanton tuloy yan bagat.

¹³ Akan yod sakey a masanton pasen; sikato ya so betang yo tan saray lalakin anak yo ed bagat a popoolan ed Katawan. Sikato ya so ingganggan ed siak na Katawan.

¹⁴ Balet sikayo tan saray anak yon lalaki tan bibii et nayarian yon kanen so pagew tan say kamanonur a sali a nisaklang a nidoma-doman rigalo ed Katawan a para saray papari. Nayarian yo ran kanen ed sakey a pasen a malinis onung ed ganggan. Sarayan bagat et niiter irad sikayo a parti ran nabebetangan yo ed saray bagat a para kareenan ya isaklang na saray totood Israel.

¹⁵ Awiten da so kamanonur a sali tan say pagew no isaklang a bagat a popoolan ed Katawan so taba. Sarayan parti et kayaryan yo ra ed ando lan ando, sikayo tan saray anak yo, onung na ingganggan na Katawan.”

¹⁶ Si Moises tinepet to so nipaakar ed samay kanding ya ibagat para kasalanan, et naamtaan to ya apoolan la. Lapud saya, akapasnuk si Moises ed kinen Eleazar tan si Itamar. Inkuantod sikara,

¹⁷ “Akin et ag yo inakan ed masanton pasen imay bagat a para kasalanan? Masanton tuloy iman, et say Katawan inter tod sikayo pian napaandi toy kasalanan na amin da ray Israelita.

¹⁸ Bangta say dala to et ag niakar ed dalem na masanton Tulda, nepeg komun ya inakan yod man imay bagat onung na ingganggan ko.”

¹⁹ Inmebat si Aaron, “Natad sayan agew say totoo angisaklang irad arap na Katawan na bagat dan para kasalanan tan bagat a popoolan, balet siansian makapasinagem so agawad siak. No angan ak natan ed samay bagat a para kasalanan, makapaliket ya kasi ed Katawan?”

²⁰ Akaliket si Moises nen nadngel to yan ebat nen Aaron.