Kanta nen Solomon 7 - Maung A Balita Biblia

Say Laki

¹ Nidoma-domay indengan mon bii! Agaylay abig na saray salim ya akasandalya. Singa kinorti na marunong ya iskotur iray malimpek ya ulpom.

² Awalaan ka na poseg a singa malim limpek a losur, ya ag balut nanaandian na masamit ya alak. Say balangbang mo et singa aberber a trigon pinalot, tan apaliberan na saray lirio.

³ Singa siping ya ulsa iray susom, singa ra duaran korso.

⁴ Singa torin garing so beklew mo. Saray matam et singa saray dipositoway danum ed Hesbon, diad asingger ed puirta na saman a matalonggaring a siudad. Matondiris so eleng mon singa torid Libano ya ososdungan toy Damasco.

⁵ Akatangar a singa Palandey na Carmelo so olom. Singa sankarakpan ya abel a balangaan so nilapir a buek mo; say karakpan to makasagyat na imanoy ari.

⁶ Agaylay simpit mo, agaylay gangganam; sigput so gayagan iiter na panangarom.

⁷ Singa kiew a palmira so alagey mo, tan singa amunggol a bunga to iray susom.

⁸ Kalaben ko so kiew a palmira tan borboren ko ray bunga to. Para siak singa munggol na ubas iray susom, singa balingit na mansanas so ingas mo,

⁹ tan singa sankasamitan ya alak so sangim. Ontan sirin onagos komun a balibali so alak ed inarok, onagos ed saray bibil tan saray ngipen to.

Say Bii

¹⁰ Kayaryan ak na inarok, tan pampilalekan to ak.

¹¹ Gala, inarok, ta ompaway ta ed kaalogan tan mansanlabi tad man.

¹² Ombangon ta a masakbay ta nengnengen tay kaubasan nengnengen ta ra no kasi onsisimit la ra, no kasi ombubuskag la ray rosas da, tan no kasi manrorosas la ray kiew a granada. Iter kod man ed sika so panangarok.

¹³ Naangub mo so balingit na saray tanaman a mandragoras, tan walad abay na puirta ta iray masasamit a bunga. Insinup kon para sika so daan tan balo a ligliwa.