Kanta nen Solomon 6 - Maung A Balita Biblia

Saray Bibii

¹ Sankagangganaan ed amin da ray bibii, iner so nakar na inarom? Ibagam ed sikami no iner so inarap ton dalan, pian natulongan mi kan mananap ed sikato.

Say Bii

² Say inarok et linmad tanamanan to, a tutuboan na saray kiew a balsamo. Pankakabkaben tod tanamanan iray karniro to,

³ Kayaryan ko so inarok, tan siak so kayaryan to; pankakabkaben to ray karniro to ed kawalaan da ray lirio.

Say Kumaliman Kanta Say Laki

⁴ O inarok, maganggana kan singa Tirza; balibali kan singa siudad na Jerusalem; makapakelaw kan singa sarayan duaran matalonggaring a siudad.

⁵ Ag mo inenengneng ed siak iray matam; ompepeket irad siak kanyan ag ak makagalaw. Saray buek mo et singa olup na kanding a manggagalaw ed alusadsar na kapokdulan na Galaad.

⁶ Ampoti-potin singa karniron kapanames iray ngipen mo. Anggapon balut so ngileb mo tan balibaliy impanpepetekan da ray ngipen mo.

⁷ Manilengsileng iray aping mo ya asakbungan na bilom.

⁸ Anggaman anemaplo so riyna na ari, walomploy iyaamung ton bibii, tan ag nabilang iray eegnaan ton mamarikit,

⁹ balet siak, saksakey so inarok, tan singa balibalin malapati. Bukbukor to so biin anak nen ina to; nidoma-domay panangaro nen ina to ed sikato. Amin da ray bibii et onnenengneng irad sikato tan idadayew da; saray riyna tan saray bibiin iyaamung et ikankanta ray dayew to.

¹⁰ Siopa yay singa palbangon so kalilinggis to? Maganggana tan maliwliwan singa agew odino say bulan.

¹¹ Linma ak ed kakiewan ya almindra ta nengnengen kod patar iray malangwer a tanaman, saray balon bulong na ubas tan saray rosas da ray kiew a granada.

¹² Manggiwgiw ak; impanpilalek mo ak a mangaro, a singa say pampilpilalek a mibakal na kutsiro na karwahi.

Saray Bibii

¹³ Sayaw ka, sayaw ka, biin taga Sulam. Bantayan mi ka legan mon onsasayaw. Akin et labay yo ak a bantayan legan kon onsasayaw ed nanleetan na saray nandarasig a managbantay?