Kanta nen Solomon 5 - Maung A Balita Biblia

Say Laki

¹ Linmoob ak la ed tanamanan ko, O inarok, O nobiak. Manaala ak na saray tanaman kon balsamo tan mira; manaakan ak na dilok ed obung na bayaung; oniinom ak na alak ko tan say gatas ko. Mangan tan inom kayo, sikayo ran manangaro, anggad nabuek kayo na aro!

Saray Bibii Say Kumapat a Kanta Say Bii

² Nen akaogip ak, abangon so liknaan ko. Akogip kon tinmoktok ed puirta so inarok. Paloob mo ak pa, O inarok, say pinablik ya aliling toy malimlimgas a malapati. Abasa na linaew so olok, apoyut na kelpa so buek ko.

Say Laki Say Bii

³ Nanlakseb ak la; akin et mankawes ak ni lamet? Nilinisan ko la ray salik; akin et dotakan ko ra lamet?

⁴ Say inarok impeket tod puirta so lima to, nidomay liknaan ko lapud asingger la.

⁵ Akaparaan ak la a mamaloob ed sikato. Apoyukan la na mira so intiron limak, ambasa-basa na mira iray gamet ko, nen inegnaan ko may lokasay puirta.

⁶ Nilukasan koy puirta ta onloob so inarok, balet naandipat la. Agaylay panlabay kon dengelen so bosis to! Inanap ko, balet ag ko nalmo; tinawag ko, balet anggapoy narengel kon ebat to.

⁷ Arumog ak na saray guardian manliliber ed siudad; kinabil da ak tan sinugatan da ak; pinipilat na saray guardiad padir na siudad so kolibemben ko.

⁸ Isipan yod siak, O bibiid Jerusalem, no narumog yo may inarok, ibaga yod sikato a makapoy ak lapud panangaro.

Saray Bibii

⁹ Sankagangganaan ed saray bibii, domad arum a lalaki so inarom? Anto tay nidoman talonggaring to a makasengeg na pansipan mid sika?

Say Bii

¹⁰ Guapo tan mabiskeg so inarok; nidoma ed saray sanlibon lalaki.

¹¹ Malagansa so lupa to tan pino-pino; kolet tan andeket a singa wawak so buek to.

¹² Saray mata to et balibali ran singa saray malapatid abay na managagos a kolus, saray malapatin nanames ed gatas tan manalalagey ed gilig na managagos a sobul.

¹³ Saray aping to et singa ra marakerakep a tanamanan, a napno na saray tanaman ya ambalbalingit. Singa saray lirio iray bibil to; ambasa-basa ra na mira.

¹⁴ Maimimos iray gamet to, tan akasingsing na saray nambato. Say laman to et singa pino-pinon garing, ya akotepan na saray sapiro.

¹⁵ Saray ulpo to et singa ra lusek ya alabastro, nilira ed balituk a patoonan. Matalonggaring a singa Kapalandeyan na Libano ya atatagey iray kiew dan sidro.

¹⁶ Masamsamit ya anguban so sangi to; panliketan koy amin a nipaakar ed sikato. Onya so kapara na inarok, O bibiid Jerusalem.