Kanta nen Solomon 4 - Maung A Balita Biblia

Say Laki

¹ Agaylay gangganam, O inarok! Inmagayep iray matam ya asakbungan na bilom. Saray buek mo et singa olup na kanding a manggagalaw ed alusadsar na kapokdulan na Galaad.

² Ampoti-poti ray ngipen mo; singa ra karniron kapankatli tan kapanames. Anggapon balut so ngileb mo tan balibaliy impanpepetekan da ray ngipen mo.

³ Singa ambalbalangan laso so bibil mo; agaylay dakep da no mansasalita ka. Manilengsileng iray aping mon asakbungan na bilom.

⁴ Say beklew mo et singa tori nen David, malimpek tan pino-pinoy baog to; walay kuintas ton singa akasabit a sanlibon samper na sondalo.

⁵ Saray susom et singa ra saray korso; singa ra siping ya ulsa a mamangakan ed kawalaan da ray lirio.

⁶ Manayam ak ed palandey na mira, diad pokdul na insinso, ya anggad onsiplug so palayupoy na dagem na kabwasan tan onandipat lay kabilongetan.

⁷ Agaylay gangganam, O inarok; agaylay inkayadyarim!

⁸ Mila kad siak a manlapud Kapalandeyan na Libano, O nobiak; gala ta taynan ta so Libano. Akseb kan manlapud toktok na Palandey na Amana, manlapud Palandey na Senir tan Palandey na Hermon, a panaayaman na saray lion tan saray liopardo.

⁹ Say linggis na matam tan say kuintas ya akasolung ed sika, O inarok tan nobiak, et atanggoyur day pusok.

¹⁰ Agaylay samit so panangarom, O inarok tan nobiak. Masamit ni so panangarom nen say alak; anggapoy makapipara ed pabalingit mo.

¹¹ Walad bibil mo so taway na dilo, O inarok; gatas tan dilo a para siak so dilam. Walad kawes mo so amin a balingit na Libano.

¹² Say inarok, say nobiak, et sakey a niamut a tanamanan, ya apaliberan na padir, sakey a sobul a kayaryan na sakey a too;

¹³ ontutubod man iray tantanaman. Ontutubo ran singa saray tanaman a granada tan mambubunga ray sankaabigan a bunga. Daakan iray pabalingit a hina tan nardo,

¹⁴ saray sapron, kalamus, tan sinamon, odino amin a klasiy insinso. Ontutubod man iray mira, aloe tan amin a sankabalingitan a pabalingit.

¹⁵ Sobul so manasalog na samay tanamanan, say sobul na managagos a danum, on, say sobul a managagos a manlalapud Kapalandeyan na Libano.

Say Bii

¹⁶ Bangon ka, Dagem ed Baybay. Dagem ed Abalaten, siplug ka ed tanamanan ko; panom na balingit so dagem. Paonlam pad tanamanan to so inarok ta mangan na saray sankaabigan a bunga.