Kanta nen Solomon 3 - Maung A Balita Biblia

¹ Labi-labin kokogkogipen kod dokulan so inarok; aanapen ko, balet ag ko narumog.

² Binmangon ak tan linma ak ed kaliber-liber na siudad, nanakar-akar ak ed saray dalan tan diad saray plasa. Inanap ko lan inanap so inarok, balet ag ko narumog.

³ Anengneng ak na saray guardia nen manaakar-akar iran mambantay ed siudad. Tinepet kod sikara, “Anengneng yoy lakin inarok?”

⁴ Kataynan kod arapan da, arumog koy inarok. Binembenan ko tan ag ko inikbanan ya anggad niyakar kod abung nen inak, tan pinaloob kod kuarton nianakan ko.

⁵ Isipan yod siak, sikayon bibiid Jerusalem; mansamba kayod ngaran na mabatik ya ulsa tan diad ayep a korso ta ag yo kami sisigensigenen ed arowan min dua.

Say Kumatlon Kanta Say Bii

⁶ Anto yay onsasabin singa lusek na asewek a manlalapud kalawakan, abalingitan na insinso tan mira, say insinson ilalako da ray nigosianti?

⁷ Onsasabiy Solomon; sankasakbat dad trono to; anemaplon sondalo so mangguaguardiad sikato; sankamaungan ira yan sondalo ed Israel.

⁸ Amin da et marunong iran mangikana na ispada; matalonggaring iran mibabakal. Akaawit so balang sakey ed sikara na ispada, sipaparaan iran mibakal anggan labiy idogpay kalaban.

⁹ Si Solomon sankasakbat dad trono to a ginawad sankaabigan a kiew.

¹⁰ Saray lusek na trono et naokupan ira na pilak; abordaan na balituk so abel a sakbung to. Say kotsun to et naapisan na ambalbalangan abel, a lapud aro inabel na saray bibiin taga Jerusalem.

¹¹ Bibiid Sion, gali dia ta nengneng yoy Ari Solomon. Akakorona na koronan intoon nen ina to diad samay agew na impankasal to, diad samay agew na impanliket tan impanggayaga to.