Juan 8 - Maung A Balita Biblia

Say Biin Narel a Mikakaloguran

¹ [Sinmempet lay balang sakey ed abung to, balet linmay Jesus ed Palandey na Kaolibaan.

² Kabkabwasan nen pinmawil ed Timplo. Minongkug na dakel a totoo, kanyan inmirung tan binangatan to ra.

³ Kabebekta inyakar na saray iskriba tan saray Pariseo so sakey a biin narel a mikakaloguran, tan pinaalagey dad pegley na totoo.

⁴ Inkuandad kinen Jesus, “Maistro, sayan bii narel a mikakaloguran.

⁵ Onung ed Ganggan nen Moises nepeg a tupaken iray manggagaway onyan kasalanan anggad ag da ipatey. Antoy kuan mo?”

⁶ Tinepet da yan panubok ed sikato, pian walay nidalem dan sumlang ed sikato. Balet tinmuek si Jesus tan impansulat toy tamoro tod dalin.

⁷ Nen intuloy dan tepetan lan tepetan si Jesus, tinmangwa tan kuantod sikara, “Siopaman ed sikayoy anggapoy kasalanan, sikatoy ononan manupak ed sikato.”

⁸ Tinmuek lamet tan impansulat toy tamoro tod dalin.

⁹ Nen nadngel da ya, tinmaynan iran sansakey, manlapud sankamasikenan ed sikara. Atilak a bukor si Jesus tan samay bii a wadman nin manalalagey ed arap nen Jesus.

¹⁰ Tinmangway Jesus tan tinepet to, “Iner so nakar da? Anggapoy anusad sika?”

¹¹ “Anggapo, Katawan,” kuanto may bii. Inkuanen Jesus, “Ag ta ka met dusaen. Nayarian mo lay onsempet. Ag ka lan balut sirin mankakasalanan.”]

Si Jesus so Silew na Sankamundoan

¹² Nansalita lamet si Jesus ed saray totoo. Inkuanto, “Siak so silew na sankamundoan. Say ontombuk ed siak walad sikatoy silew a mangiiter na bilay tan ag manakar ed kabilongetan.”

¹³ Inkuan na saray Pariseo ed sikato, “Tatasian moy laman mon dili. Aliwan tua tay ibabagam.”

¹⁴ Inmebat si Jesus, “Anggan tatasian koy laman kon dili, katwaay ibabagak, lapud amtak so nanlapwan tan say laen ko. Balet ag yo amta no iner so nanlapwan tan laen ko.

¹⁵ Manisintinsia kayo onung ed pananintinsiay too, balet anggapoy sisintinsiaan kon too.

¹⁶ No bilang ta manintinsia ak, dugay panintinsiak ta ag ak mambukbukor. Say Ama ya angibakid siak et kaibak a manintinsia.

¹⁷ Sakey ni, nisulat ed Ganggan yo a no mantukoyay pantasiy duaran too, tuay pantatasi ra.

¹⁸ Siak tan say Ama ya angibakid siak so mantatasid siak.”

¹⁹ Kanyan tinepet dad sikato, “Iner so kawalaan nen Amam?” Inmebat si Jesus, “Ag yo ak amta odino si Amak. No amta yo ak, naamtaan yo met komun si Amak.”

²⁰ Imbalikas nen Jesus ira ya nen mambabangat ed Timplo, diad pasen a kawalaay kahon a pananginay kuartan ibabagat. Anggapoy angerel ed sikato lapud ag ni asabiy oras to.

Ag kayo Makaonla ed Laen ko

²¹ Inkuan lamet nen Jesus ed sikara, “Onla ak la et anapen yo ak, balet ompatey kayod saray kasalanan yo. Ag kayo makaonla ed laen ko.”

²² Kanyan inkuan da ray Judio, “Mambikkel kasi lapud imbaga ton ag itayo makaonlad laen to?”

²³ Inkuantod sikara, “Taga kayo leksab, balet taga ak tagey. Taga kid sayan mundo, siak balet andi.

²⁴ Kanyan imbagak ed sikayon ompatey kayod saray kasalanan yo. Talagan ompatey kayod saray kasalanan yo no ag yo sisiaen a ‘Siak si Siak’.”

²⁵ “Siopa ka a?” tinepet dad sikato. Inkuanen Jesus, “Siak imay imbagak lad sikayo nen saman ni.

²⁶ Dakel so nayarin ibagak tan isintinsiak nipaakar ed sikayo. Balet matwa so angibakid siak tan ibabagak ed sankamundoan so nadngel kod sikato.”

²⁷ Ag da atalusan a say sasalitaen tod sikara et nipaakar ed Ama.

²⁸ Kanyan inkuanen Jesus ed sikara, “No nibitin yo lay Anak na Too, nakabatan yo lad satan a ‘Siak si Siak’. Naamtaan yo met ya anggapoy gagawaen kon manlalapud siak a dili, no ag ingen sasalitaen koy imbangat na Amak.

²⁹ Kaibak so angibakid siak. Ag to ak tinaynan a mambukbukor, ta gagawaen ko lawas iray makapaliket ed sikato.”

³⁰ Nen sasalitaen nen Jesus ira ya, dakel iray anisiad sikato.

Say Katwaan so Mangibolus ed sikayo

³¹ Kanyan inkuanen Jesus ed saray Judion anisiad sikato, “No mansiansia kayon mangonur ed salitak, petepeteg kayon disipulok.

³² Nakabatan yoy katwaan, tan say katwaan ibolus to kayo.”

³³ Inmebat irad sikato, “Kabyangan kamiy boleg nen Abraham, tan ag kamin balut naaripey siopaman. Panoy pangibagam a nabolus kami?”

³⁴ Inmebat si Jesus, “Ibabagak ed sikayoy katwaan: balang sakey a mankasalanan aripey kasalanan.

³⁵ Say aripen ag mansiansian kabyangay pamilya, balet say anak kabyangan ya anggad angga na pamilya.

³⁶ Kanyan no imbolus ki lay Anak, petepeteg a nablus ki la.

³⁷ Amtak a kabyangan kayoy boleg nen Abraham. Anggaman ontan pampilalekan yo ak a pateyen, lapud ag yo awatey salitak.

³⁸ Sasalitaen koy anengneng kod Amak, balet gagawaen yo ray imbaga nen ama yo.”

³⁹ Inmebat irad sikato, “Si Abraham so ama mi.” Inkuanen Jesus ed sikara, “No tuan anak kayo nen Abraham, aligen yo komun iray gawa to.

⁴⁰ Balet siak a toon mangibabagay katwaan a nadngel kod Dios, pampipilalekan yo ak a pateyen. Ag ya ginawa nen Abraham!

⁴¹ Gagawaen yo ray ginawa nen ama yo.” Inmebat irad sikato, “Aliwa kamin anak ed paway. Say Dios labat so Ama mi.”

⁴² Inkuanen Jesus, “No tuan say Dios so ama yo, aroen yo ak komun, ta nanlapu ak ed Dios tan natan wadya ak. Ag nanlapud siak a bukor so inyakar ko dia, no ag ta imbaki ak na Dios.

⁴³ Akin et ag yo natatalusay ibabagak? Lapud ag ki ondengel na salitak.

⁴⁴ Say Diablo so ama yo, kanyan labay yon gawaen iray pilalek na ama yo. Sikatoy managpatey na too nanlapu lad gapo. Sumlang ed katwaan lawas, lapud anggapoy katwaan ed sikato. Ogali toy mantila, lapud sikatoy matila tan sikatoy ama na panagtila.

⁴⁵ Ag yo ak sisiaen lapud ibabagak so katwaan.

⁴⁶ Siopad sikayoy makapaneknek a nankasalanan ak? Akin sirin et ag yo ak sisiaen, anta ibabagak ed sikayoy katwaan?

⁴⁷ Say anak na Dios dedengelen to ray salitay Dios. Aliwa kayon anak na Dios, kanyan ag yo dedengelen iray salita to.”

Si Jesus tan si Abraham

⁴⁸ Inmebat iray Judio ed kinen Jesus, “Ag kasi tuay ibabaga min Samaritano ka, tan inaponan kay dimonyo?”

⁴⁹ Inmebat si Jesus, “Ag ak inaponay dimonyo. Papagalangan koy Amak, balet ag yo ak papagalangan.

⁵⁰ Siak ag ko aanapey kitandurok. Walay manaanap yan para siak tan sikato naaniy manintinsia.

⁵¹ Ibabagak ed sikayoy katwaan: say mangonur na salitak ag balut ompatey.”

⁵² Inkuan da ray Judio ed sikato, “Ag kami la manduaruwa natan ya inaponan kay dimonyo! Inatey si ama min Abraham tan saray propita, balet ibabagam, ‘Say mangonur na salitak ag balut ompatey.’

⁵³ Matalonggaring ka ta nen si ama min Abraham? Inatey, tan saray propita inaatey met ira. Anto tay pangipapasen mod sikan dili a?”

⁵⁴ Inmebat si Jesus, “No idayew koy laman kon dili, anggapoy kakanaay dayew ko. Idayew ak na Amak, a sikatoy kuanyon Dios yo.

⁵⁵ Ag yo ni akabatan, balet kabkabat ko. No ibagak ya ag ko kabat, matila ak met a singa sikayo. Balet kabkabat ko tan oonuren koy salita to.

⁵⁶ Nanliket si ama yon Abraham nen akabatan ton nanengneng toy agew ya isabik. Anengneng to tan nanliket.”

⁵⁷ Lapud saya inkuan da ray Judio, “Anggapo niy limamploy taon mo, anengneng mo lay Abraham?”

⁵⁸ “Ibabagak ed sikayoy katwaan,” kuanen Jesus, “Kasakbayan a nianak si Abraham, ‘Siak et Siak.’”

⁵⁹ Lapud saya, nandokdok iray baton panupak dad kinen Jesus, balet sinmanib insan la pinmaway ed Timplo tan tinmaynan.