Juan 15 - Maung A Balita Biblia

Si Jesus so Tuan Sengeg na Ubas

¹ “Siak so tuan sengeg na ubas, tan si Amak so managtanaman.

² Ekalen toy balang sangan ag mambunga tan palinan to so sangan mambubunga, pian lalon ondakel so bunga to.

³ Malinis ki la lapud salitan imbagak ed sikayo.

⁴ Mansiansia kid siak tan mansiansia ak ed sikayo. Ag makapambungay sanga no ag mansiansiad sengeg. Ontan met, ag kayo makapambunga no ag kayo mansiansiad siak.

⁵ “Siak so sengeg na ubas, sikayo ray sanga. Say mansiansiad siak tan siak ed sikato, mambungay dakerakel. Ta no andi ak, anggapoy nagawaan yo.

⁶ Say ag mansiansiad siak, nibantak ed paway tan namagaan a singa sanga. Natipon tan nibantak ed apoy ira yan klasiy sanga, pian napoolan ira.

⁷ No mansiansia kid siak tan mansiansiad sikayo ray salitak, kerew kayo na antokaman a labay yo, et nagamuran yo.

⁸ No mambunga kayoy dakel, napagalangay Amak tan napatnagan a disipulo ta kayo.

⁹ No panoy panangaroy Ama ed siak, ontan met so panangarok ed sikayo; mansiansia kayod arok.

¹⁰ No onuren yo ray ganggan ko, mansiansia kayod arok; singa siak, oonuren ko ray ganggan nen Amak, kanyan mansiasiansia ak ed aro to.

¹¹ “Imbagak ira yad sikayo, pian niwala ed sikayo so liket ko, tan nayadyari so liket yo.

¹² Sikato yay ganggan ko: manaarowan kayo a singa panangarok ed sikayo.

¹³ Anggapoy toon babaleg so panangaro tod saray kakaaro to nen say toon mangibagat na bilay to para sikara.

¹⁴ Kakaaro ta kayo, no onuren yo ray ganggan ko.

¹⁵ Ag ta ki la ipapasen ya aripen natan, ta ag kabat na aripen so gagawaey katawan to. Ipapasen ta ki lan kakaaro, lapud impaamtak ed sikayo ray amin a nadngel kod Amak.

¹⁶ Ag yo ak pinili; pinili tan tinoro ta kayon onla tan mambungay maando. Diad ontan, iter na Ama so amin a bengatlan kerewen yod ngaran ko.

¹⁷ Saya sirin so ganggan kod sikayo: manaarowan kayo.”

Say Pamosul na Sankamundoan

¹⁸ “No bosulen kayoy sankamundoan, nepeg yon nunoten a binosul ta ak ya inmona.

¹⁹ No kayaryan kayoy sankamundoan, aroen kayoy sankamundoan lapud kayaryan to kayo. Balet natan aliwa kayon kayaryay sankamundoan, no ag ta pinili ta kayon nanlapud sankamundoan, kanyan bobosulen kayoy sankamundoan.

²⁰ Nunot yoy imbagak ed sikayo: ‘Anggapoy aripen a palabsanan toy katawan to.’ No pinairap da ak, pairapen da ki met. No inonur day salitak, onuren da met so salita yo.

²¹ Balet gawaen da yan amin ed sikayo lapud siak, ta ag da kabat so angibakid siak.

²² No ag ak linma dia tan nambabangat, anggapo komuy kasalanan da. Natan balet; anggapo lay nibaraan dad kasalanan da.

²³ Say mambosul ed siak, bosulen to met so Amak.

²⁴ Anggapo komuy kasalanan da no ag ak nanggagawad pegley da na saray kimey ya anggapo niy toon akagawa. Balet natan anengneng da ray ginagawak, et siansian bobosulen da ak tan say Amak.

²⁵ Balet nakaukolan yan nagawa, pian nasumpal so nisulat ed Ganggan da, ‘Binosul da ak ya anggapoy makasengeg.’

²⁶ “Say Mananulong, a salanti say Ispiritu na katwaan, onsabin manlapud Ama. Ibakik ed sikayon manlapud Ama, tan sikatoy mantasin nipaakar ed siak.

²⁷ Tan mantasi kayo met na nipaakar ed siak, ta kaiba ta ki lan nanlapud gapo.