Josue 9 - Maung A Balita Biblia

Pinalikdo na saray taga Gabaon si Josue

¹ Saray impanatalo na Israel et akabatan na amin ya ari ed sagur na Jordan diad saray kapokdulan, diad saray alusadsar, tan diad saray patar ed gilig na Dayat na Mediteraneo ya anggad Libano diad baybay; sikara ya so ari da ray Heteo, saray Amorreo, saray Cananeo, saray Pereseo, saray Heveo, tan saray Jebuseo.

² Nanmomoyung ira yan amin a mibakal ed kinen Josue tan saray Israelita.

³ Balet nen saray Heveo a sikaray totood Gabaon et nadngelan day ginawa nen Josue ed Jerico tan Ai,

⁴ ninunot dan palikdoen si Josue. Angaala ray kakanen tan pinapano ray beneg na asno ra na saray napipilat lan sako tan saray sakaban a katat a pananginay alak.

⁵ Nansosolung iray apilat-pilat a kawes tan dagdaan la ran sandalya a dinadait la. Amaga-maga tan abootan la ray tinapay a binabalon da.

⁶ Insan ira linmad kampod Gilgal tan kuandad kinen Josue tan saray lalaki na Israel, “Arawdawiy nanlapwan min dalin. Labay min mipaknaan kayod sikami.”

⁷ Balet inkuan ed sikara na saray lalaki na Israel, “Akin et mipaknaan kamid sikayo? Angangko asingger dia so panaayaman yo.”

⁸ Inkuandad kinen Josue, “Sikami ray aripen yo.” Tinepet ed sikara nen Josue, “Siopa kayo? Nanlapwan yo?”

⁹ Insan da tinongtong ed sikato yan istorio: “Arawdawin dalin so nanlapwan mi, lapud nadngelan miy nipaakar ed Katawan a Dios yo. Nadngelan miy amin a ginagawa to ed Egipto

¹⁰ tan say ginawa to ed saray duaran ari da ray Amorreo diad bokig na Jordan: Si Ari Sehon na Hesbon tan si Ari Og na Basan a manaayam ed Astarot.

¹¹ Saray pangulo mi tan amin da ray totoon manaayam ed dalin mi et imbaga rad sikami a mangala kamiy abasto a para biahi tan onla kamin onabet ed sikayo. Imbilin dad sikami a manlingkur kamid sikayo tan kerewen mi a mipaknaan kayod sikami.

¹² Nengneng yo ra yay tinapay mi. Nen onsiput kamid man ed abung mi ya onabet ed sikayo, ampetang ni ra. Balet natan amaga-maga tan abootan la ra.

¹³ Nen pinano mi ra yan katat a pananginay alak, balo ni ra, balet natan apilat la ra. Apilat la ray kawes tan saray sandalya mi lapud bayag na impankurang mi.”

¹⁴ Saray lalakid Israel angawat iray pigaran kakanen a nanlapud saramay taga Gabaon, balet ag da la ya impanon ed Katawan.

¹⁵ Akipaknaan si Josue na pikakaaro ed saray totoon taga Gabaon tan inabuloyan to ran mambilay. Sinambaan na saray pangulo da ray Israelita a tooren day impipaknaan da.

¹⁶ Kalabas na taloy agew manlapud samay agawan paknaan, naamtaan na saray Israelita a saramay akipaknaan dan totoo et manaayam iran tua ed asingger a pasen.

¹⁷ Kanyan saray totood Israel ginapwan day pinmaway et kayariy taloy agew, akasabi ra ed saray siudad a panaayaman na saray totoo: Gabaon, Kafira, Beerot, tan Kiryat-jearim.

¹⁸ Balet ag ira nayarin pateyen na saray Israelita, lapud walay sinambaan ed sikara na saray pangulo ra, diad ngaran na Katawan a Dios na Israel. Amin a totoo et nanriklamo rad saray pangulo nipaakar ed saya,

¹⁹ balet inmebat ira, “Walay sinambaan mid sikara diad ngaran na Katawan a Dios na Israel. Ag ti la ra natan nadiwit.

²⁰ Nepeg ti ran pambilayen lapud sikatoy insipan mi; no diwiten tayo ra, dusaen itayo na Dios.

²¹ Abuloyan yo ran mambilay, balet nepeg ya ikiewan tan iyasolan da itayo.” Sikatoya so imbaga na saramay pangulo.

²² Ingganggan nen Josue a niakar ed sikato ra may totood Gabaon, insan to tinepet ed sikara, “Akin et pinalikdo yo kami? Imbaga yod sikami a taga kayo arawdawin pasen, anta manaya dia kayo labat manaayam.

²³ Lapud sayan ginawa yo, insamba kayo na Dios. Mansiansian aripen iray totoo yo, manalay kiew tan manasol ira para santuario na Dios ko.”

²⁴ Inmebat ira, “Ginawa mi ya, lapud naamtaan mi a say Katawan a Dios yo et tuan ingganggan toy aripen ton Moises ya iter tod sikayo yan intiron dalin tan pateyen yo ray totoon manaayam dia legan a mankukurang kayo. Ginawa mi ya lapud antakot kamid sikayo, ompan pateyen yo kami.

²⁵ Natan wala kamid silong na pakayari yo; gawa yod sikami so isisipen yon manepeg.”

²⁶ Kanyan onya so ginawa nen Josue: inyagel to ra tan ag to inabuloyan iray totood Israel a pateyen da ra.

²⁷ Balet impagmaliw to ran aripen a managalay kiew tan managasol na danum na saray totood Israel; sikara met so manangiter na kiew tan danum a para altar na Katawan. Anggad sayan panaon itutuloy da ni yan kimey ed pasen a pinili na Katawan a pangigalangan ed sikato.