Josue 11 - Maung A Balita Biblia

Tinalo nen Josue si Jabin tan saray Kagampi to

¹ Nen nadngelan nen Ari Jabin na Hazor so balitan nipaakar ed impanatalo na Israel, nampabakian to si Ari Jobab na Madon, saray arari na Simron tan Acsaf,

² tan saray ararid kapokdulan a pasen diad baybay, diad Patar na Jordan ya abalaten na Dayat na Galilea, diad alusadsar iran pasen, tan diad gilig na dayat ya asingger ed Dor.

³ Nampabakian to met iray Cananeon manaayam ed duaran dapag na Jordan, saray Amorreo, saray Heteo, saray Pereseo, tan saray Jebuseo a wala rad kapokdulan a pasen, ontan met ed saray Heveo a manaayam irad alusadsar na Palandey na Hermon diad dalin na Mizpa.

⁴ Sinmabi ran kaiba da ray amin a sondalo ra, a singa ra karakel na buer ed gilig na dayat. Wala met iray amayamay a kabayo tan karwahi ra.

⁵ Nanmomoyung ira yan arari tan nankakasakey iran nankampo ed abay na kolus na Merom, ta bakalen day Israel.

⁶ Say Katawan kuantod kinen Josue, “Ag kayo natatakot ed sikara. Diad onyan oras nabwas apatey ko la ran amin para Israel. Lopuy yo ray kabayo ra tan poolan yo ray karwahi ra.”

⁷ Kanyan si Josue tan amin a totoo to dinogpaan dan bigla iray kalaban da diad kolus na Merom.

⁸ Say Katawan impanalo to ray Israelita; dinogpaan da ray kalaban da tan inosilan da ra ya anggad Misrefotmaim tan Sidon diad baybay, tan anggad patar na Mizpa diad bokig. Tinmuloy so bakal ya anggad anggapoy nakdaan a mabilay ed saray kalaban.

⁹ Ginawa nen Josue ed sikara so onung na ingganggan na Katawan; nilolopuy to ray kabayo ra tan pinopoolan to ray karwahi ra.

¹⁰ Insan pinmawil si Josue, dinakep toy Hazor tan pinatey toy arid man. (Diad saman a panaon say Hazor so sankabiskegan ed amin da ray nanarian.)

¹¹ Pinapatey da ray amin a totood man; anggapoy inkera ran mabilay, tan pinoolan da so siudad.

¹² Adakep nen Josue ira yan amin a siudad tan saray arari ra tan pinapatey da ray amin a totoo ra, onung na ingganggan nen Moises ya aripen na Katawan.

¹³ Balet saray Israelita ag da pinoolan iray siudad a nipaalagey ed atagey iran pasen, likud labat ed Hazor a pinoolan nen Josue.

¹⁴ Saray totood Israel inaala ray amin a mabmabli ran kagawaan tan saray ayayep ed sarayan siudad tan kinakayaryan da la ra. Balet pinapatey da ray amin a totoo; anggapoy akeraan a mabilay.

¹⁵ Say Katawan inter tod kinen Moises ya aripen iray ganggan to, et si Moises inter to ra yan ganggan ed kinen Josue, tan si Josue inonur to ran amin. Sinumpal to ray amin ya ingganggan na Katawan ed kinen Moises.

Saray Dalin ya Asakop nen Josue

¹⁶ Adakep nen Josue iray amin a dalin—saray kapokdulan tan saray alusadsar diad baybay tan diad abalaten, say intiron dalin ed Gosen tan diad ampetang iran pasen ed niabalaten to, ontan met ed Patar na Jordan.

^17-18 Limaknab so asakop ton dalin manlapud Palandey na Halak diad abalaten ya asingger ed Edom, anggad Baalgad diad baybay, diad patar na Libano ya abalaten na Palandey na Hermon. Abayag ya akibakal si Josue ed saray arari ed sarayan pasen, balet adakep to ran amin tan pinapatey to ra.

¹⁹ Say siudad labat ya akikaarod saray totood Israel et say Gabaon a panaayaman na pigaran Heveo. Amin da ray arum a siudad et atalo ra ed bakal.

²⁰ Say Katawan so amaawet na kapusoan da pian ag ira onsener a mibakal ed saray Israelita, kanyan sigput iran naderal tan napatey ya andi-panangasi. Sikato ya so ingganggan na Katawan ed kinen Moises.

²¹ Diad sayan panaon si Josue linma tan pinapatey to ray alan a tatawagen ira na Anakim a manaayam ira ed kapokdulan a dalin na Hebron, Debir, Anab, tan diad amin a kapokdulan a pasen na Juda tan Israel. Pinapatey iran amin nen Josue tan sigput ton dinederal iray siudad da.

²² Anggapoy atilak ya Anakim ed dalin na Israel; balet wala ray pigaran atilak ed Gaza, Gat, tan Asdod.

²³ Adakep nen Josue so intiron dalin, onung na ingganggan na Katawan ed kinen Moises. Inter nen Josue so dalin ed saray Israelita; inaapag tod balang tribu. Tinmonda ray bakal kanyan nainawaan iray totood Israel.