Jeremias 35 - Maung A Balita Biblia

Si Jeremias tan saray Recabita

¹ Nen si Joakim a lakin anak nen Josias so ari na Juda, say Katawan inkuantod siak,

² “Lakad boleg na saray Recabita tan misalita kad sikara. Insan inyakar mo rad sakey ed saray kuarto na Timplo tan itdan mo ray alak.”

³ Kanyan tinipon kon amin iray kabyangay boleg a Recabita—si Jaazanias (say lakin anak na sananey a Jeremias, a lakin anak nen Habasinias,) tan amin iray agagi tan anak ton lalaki—

⁴ insan intagar ko rad Timplo. Inyakar ko rad kuarto na saray disipulo nen propita Hanan a lakin anak nen Igdalias. Sayan kuarto et walad tagey na kuarto nen Maasias a lakin anak nen Sallum, sakey a manonan opisyal na Timplo. Asingger met yan kuarto ed saray kuarto na saray arum ya opisyal.

⁵ Insan angyan ak na saray kupa tan saray pitsir a napnoy alak diad arap na saray Recabita, tan kuankod sikara, “Inom kayo.”

⁶ Balet inmebat ira, “Ag kami oniinom na alak. Si laki min Jonadab ya anak nen Recab imbaga to a sikami tan saray kabyangay boleg mi et ag kamin balut oninom na alak.

⁷ Imbaga to met ed sikami ya ag kami mangipaalagey na saray abung odino ondalus ed dalin, tan ag kami mantanem ed kaubasan odino saliwen ira. Ingganggan to kamin manayam lawas ed saray tulda, pian mansiansia kamin singa sangkaili ed sayan dalin a panaayaman mi.

⁸ Inonur mi ray amin a bilin ed sikami nen Jonadab. Ag kami oniinom na alak, anggan saray kaasawaan mi, saray lalakin anak mi, odino saray bibiin anak mi.

^9-10 Ag kami mangipapaalagey na saray abung a a panayaman mi—manaayam kamid saray tulda—tan anggapoy kaubasan, kaalogan, odino bungay tanaman mi. Sigput min inonur iray ingganggan ed sikami nen laki min Jonadab.

¹¹ Balet nen nilooban nen Ari Nabucodonosor so bansa, ginetma miy onlad Jerusalem pian nibatikan mi ray taga Babilonia tan saray sondalon taga Siria. Sikato yay makasengeg no akin et manaayam kami diad Jerusalem.”

^12-13 Insan say Katawan a Makapanyarin-amin, say Dios na Israel, imbaga tod siak ya onla ak ed saray totood Juda tan Jerusalem tan ikuankod sikara so salita to, “Siak, say Katawan, tetepeten kod sikayo no akin et ag kayo ondengel ed siak tan ag yo onuren iray bangat ko.

¹⁴ Inonur na saray kabyangay boleg nen Jonadab so ganggan to ya ag ira oninom na alak, tan anggad natan anggapod sikaray oniinom na alak. Siak balet, ag yo ak oonuren anggaman ya ag ak ontotondan misasalitad sikayo.

¹⁵ Intutuloy koy mangibakid sikayo na amin da ray aripen a propita, tan imbaga rad sikayo a tondaan yo lay maoges a panagbilay yo tan manggawa ki lay kamaungan. Pinasakbayan da kayon ag mangigalang tan ag manlingkur ed saray arum a diriyos pian nayarian yoy mansiansian manayam ed dalin ya inter kod sikayo tan saray lalaki yo. Balet ag kayo dinmengel odino angasasikasod siak.

¹⁶ Saray kabyangay boleg nen Jonadab inonur day ganggan na laki ra, balet sikayon totoo ag yo ak inonur.

¹⁷ Kanyan, siak, say Katawan a Makapanyarin-amin a Dios na Israel, iyakar kon amin iray insipan kon deral ed sikayo ran totood Juda tan Jerusalem. Gawaen ko ya, ta ag kayo dinmengel nen akisalita ak ed sikayo, tan ag yo ak inebatan nen tinawag ta kayo.”

¹⁸ Insan imbagak ed saray kabyangay boleg nen Recabita a say Katawan a Makapanyarin-amin a Dios na Israel kuanto, “Inonur yoy ganggan nen laki yon Jonadab; sinumpal yo ray bangat to, tan ginawa yo ray amin ya ingganggan tod sikayo.

¹⁹ Lapud saya, siak, say Katawan a Makapanyarin-amin a Dios na Israel, isisipan ko a nawalaan lawas si Jonadab a lakin anak nen Recab na sakey a lakin kabyangay boleg to a manlingkur ed siak.”