Jeremias 29 - Maung A Balita Biblia

Say Sulat nen Jeremias ed saray Judion walad Babilonia

¹ Sinulat ko ray pangulo, saray papari, saray propita, tan amin a totoon dinakep nen Nabucodonosor ed Jerusalem tan inyakar to ran priso ed Babilonia.

² Ginawak yan sulat nen akataynan lad Jerusalem ira di Ari Joakin, say ina to, saray opisyal ed palasio, saray pangulod Juda tan Jerusalem, saray marunong a mankimey tan saray panday.

³ Inter ko so sulat ed kindi Elasa a lakin anak nen Safan tan Gemarias a lakin anak nen Hilcias a sikaray imbaki nen Ari Sedekias na Juda ed kinen Ari Nabucodonosor na Babilonia. Onyay tanul na sulat:

⁴ “Say Katawan a Makapanyarin-amin a Dios na Israel kuantod saray amin a totoon inyabuloy ton nadakep nen Nabucodonosor diad Jerusalem tan inyakar to ran priso ed Babilonia:

⁵ ‘Mamaalagey kayoy kaabungan yo tan manayam kayod man. Mantanaman kayo tan akan yo ray naani yo.

⁶ Mangasawa tan miasawa kayo pian nawalaan kayo ray anak. Insan yo pangasawaen tan piasawaen iray anak yo, pian nawalaan met iray anak. Nakaukolan ya ondakel so bilang yo ya aliwan ondaiset.

⁷ Mankimey kayo a pankaabigan na saray siudad a nampaiprisoan kod sikayo. Ipikasi yo ed siak ira ta no maaligwas ira, maaligwas kayo met.

⁸ Siak, say Katawan a Dios na Israel, papasakbayan ta kayon ag kayo papapalikdo ed saray propitan kaiba yod tan, odino saray arum ya ipapasen day sikaran dili a nayarian dan ibagay nagawa ed arapen a panaon. Ag yo aasikasoen iray kogkogip da.

⁹ Titilaan da kayo ed ngaran ko. Ag ko ra imbaki. Siak, say Katawan, so nansalita.’

¹⁰ “Say Katawan kuanto, ‘Kayari na pitomploy taon a panoley na Babilonia ed sikayo, ipanengneng koy panangarok ed sikato tan sumpalen koy sipan ko a papawilen ta kayod dalin yo.

¹¹ Siak labat so makaamta na saray planok ed sikayo. Sarayan plano et makaiter ed sikayo na aligwas, aliwan deral; saray planon mamatwa ed iilaloan yon nagawa ed arapen a panaon.

¹² Insan kayo ontawag ed siak ed satan. Ondago kayod siak tan mikasi kayo, et ebatan ta kayo.

¹³ Anapen yo ak et narumog yo ak, lapud anapen yo ak ed intiron puso yo.

¹⁴ On, kuankod sikayo, narumog yo ak, insan papawilen ta kayod dalin yo. Tiponen ta kayo manlapud balang bansa tan balang lugar ya angikayatan kod sikayo, insan papawilen ta kayo ed dalin yo a dimay amadakepan kod sikayo. Siak, say Katawan, so nansalita.’

¹⁵ “Ibabaga yo, sikayo ran totoo, a say Katawan angiter ed sikayod tan ed Babilonia na saray propita.

¹⁶ Dengel yo so ibabagay Katawan nipaakar ed arin manoley a singa impanoley nen David, tan say nipaakar ed saray totood sayan siudad a sikaray kakanayon yon ag nipiolup ed sikayon adakep.

¹⁷ Ibabagay Katawan a Makapanyarin-amin, ‘Mangipadalan ak ed sikara na bakal, eras, tan salot, tan pagmaliwen ko ran singa saray bungay igos a diad mapalalon inkaboluk da, ag ira nayarin kanen.

¹⁸ Osilan ko ra na bakal, eras, tan salot, pian diad ontan saray totood amin a bansa ed mundo et nataktakot ira ed nanengneng da. Inerman a pasen a pangikayatan kod sikara, saray totood man et natalagnaw tan nataktakot ira ed agawad sikara. Ludlureyen da ra tan ikana ran sakey a samba so ngaran da.

¹⁹ Onyay nagawad sikara, lapud ag da inonur iray salitak ya impapaibagak ed sikara diad panamegley da ray propitan aripen ko. Ag ira dinmengel.

²⁰ Amin yon totoo ya impaibantak kod Babilonia, dengel kayod ibabagak, siak a Katawan.’

²¹ “Say Katawan a Makapanyarin-amin a Dios na Israel nansalita na nipaakar ed kinen Acab a lakin anak nen Colaya tan si Sedekias a lakin anak nen Maasias a titilaan da kayo ed ngaran to. Imbaga na Katawan, ya ipalima to rad pakayari nen Ari Nabucodonosor na Babilonia a mangipapatey ed sikarad arap yo.

²² No saray totoon niakar a priso ed Babilonia manlapud Jerusalem et labay dan isamba so sakey a too, ikuanda, ‘Gawaen na Katawan komun ed sika so singa ginawa tod kindi Sedekias tan Acab, a say ari na Babilonia et inkakalut to ran mabilay.’

²³ Onyay nagawad sikara, lapud ambelabelat so ginagawa ran kasalanan—akikaloguran irad asaway kapara ran too, tan nantila rad ngaray Katawan. Sumpa yad linaway Katawan; amta to ray ginagawa ra, tan sikatoy tasi sumpad sikara. Say Katawan so nansalita.”

Say Sulat nen Semaya

^24-25 Say Katawan a Makapanyarin-amin a Dios na Israel impaikuantod siak ed kinen Semaya a taga Nehelam, “Diad ngaran mo nansulat kad amin a totood Jerusalem tan kinen Sofonias a lakin anak nen Maasias a pari tan diad amin a papari. Diad samay sulat mo inkuanmod kinen Sofonias:

²⁶ ‘Say Katawan ginawa to kan pari a sinmalat ed kinen Joiada tan sika natan so manonan opisyal na Timplo. Kanepegan mon pabalur na golunggolung tan pasolungay kuilyon balatyang so beklew na balang sakey a manluko-lukowan a mampropisiya.

²⁷ Akin et ag mo ya ginawa ed kinen Jeremias a taga Anatot, ta nampropropisiya ed saray totoo?

²⁸ Nepeg a napatonda, ta imbaga tod saray Israelitan walad Babilonia a mabaybayag iran naprisod man, kanyan nepeg day mangipaalagey na kaabungan da, manayam irad man, mantanaman ira, tan pambilay day bungay tanaman da.’”

²⁹ Imbasa nen Sofonias yan sulat ed siak.

³⁰ Insan imbaga na Katawan ed siak

^31-32 ya impaibagak ed amin a priso ed Babilonia ya onya so inkuanto nipaakar ed kinen Semaya: “Siak, say Katawan, dusaen koy Semaya tan amin a kabyangay boleg to. Ag ko imbaki, balet nansalitad sikayon singa propita, tan impanisia to kayod tila. Anggapoy nakeraan a kabyangay boleg to ed sikayo. Ompatey la kasakbayan na panggawak na kaabigan da ray totook. Ag to la naimatunan, lapud imbaga tod sikaran labanan da ak. Siak, say Katawan, so nansalita.”