Jeremias 23 - Maung A Balita Biblia

Say Ilalon Onsabi

¹ Makapataktakot so isintinsia na Dios ed saray manoley a manederal tan mangikakayat ed saray totoo to.

² Sikato yay kuan na Katawan a Dios na Israel nipaakar ed saray manoley a sikara komuy angasikasod saray totoo to, “Intaytayak yo ray totook tan pinataynan yo ra; ag yo ra inasikaso. Dusaen ta kayo natan lapud saray maoges a ginagawa yo.

³ Tiponen ko ray totook ya akeraan manlapud saray bansan angikay-kayatan kod sikara, tan ipawil ko rad dilin dalin da. Nawalaan iray amayamay ya anak tan ondakel so bilang da.

⁴ Manoro ak na saray manoley a manasikasod sikara. Ag la rad satan ontakot odino nataktakot, tan anggapod sikaray nabalang. Siak, say Katawan, so nansalita.”

⁵ Say Katawan kuanto, “Onsabiy panaon a mamili ak na ari a matonung a kabyangay boleg nen David. Sayan ari manoley a sikakabat tan gawaen tod intiron dalin so katonungan tan kaptekan.

⁶ No sikato so ari, arawid kaatapan iray totood Juda, tan mambilay ed kareenan iray totood Israel. Natawag na, ‘Say Katawan a Kilalaban tayo.’

⁷ “Onsabiy panaon,” kuay Katawan, “a saray totoo et ag la ra mansamba a kuanda, ‘Nitay mabilay a Dios ya angipaway ed dalin na Egipto ed saray totood Israel.’

⁸ Ingen mansamba ra a kuanda, ‘Nitay mabilay a Dios ya angipaway na saray totood Israel ed baybay a bansa tan angipaway met ed sikara ed saray amin a bansa ya angikayatan tod sikara.’ Insan irad satan manayam ed dilin dalin da.”

Say Sinalita nen Jeremias Nipaakar ed saray Propita

⁹ Nalmay so pusok, tan manggiwgiw ak. Lapud Katawan, lapud saray matonung a salita to, singa ak toon abuek, sakey a toon mapalaloy nainom ton alak.

¹⁰ Say dalin napno na saray totoon aliwan matoor ed Katawan; nambilay iran maoges tan andi-kakanaay impangikana rad pakayari ra. Lapud impangisamba na Katawan nagmaliw a maneermen so dalin tan amagaan iray pastolan.

¹¹ Say Katawan kuanto, “Anggapoy Dios da iray propita tan saray papari; apesgaan ko ran manggagaway kaogsan ed dalem na Timplo.

¹² Andanglel tan ambilonget so dalanen da; pakaronyasen tan patumbaen ko ra. Iyakar kod sikaray deral; onsasabiy panaon na kadusa ra. Siak, say Katawan, so nansalita.

¹³ Anengneng koy kasalanan na saray propitad Samaria; nampropisiya rad ngaran nen Baal, tan imbalang da ray totook ya Israelita.

¹⁴ Balet lalon maoges so anengneng kon gagawaen na saray propitad Jerusalem: mikakaloguran ira tan mantitila ra; tutulongan dan manggawa na makapoy iray totoo, kanyan anggapoy ontondan manggaway kaogsan. Para say siak, singa ra Sodoma; say kaogsan da singa kaogsan na saray totood Gomorra.

¹⁵ “Kanyan sirin, siak, say Katawan a Makapanyarin-amin, kuanko nipaakar ed saray propita ed Jerusalem: Pakanen ko ray ampait a tanaman, tan painomen ko ra na samal a danum, lapud inkayat dad intiron dalin so kaogsan.”

¹⁶ Say Katawan a Makapanyarin-amin kuantod saray totood Jerusalem, “Ag yo dedengelen so ibabaga na saray propita, ta iitdan da kayo labat na saray maapan ilalo. Ibabaga ra labat ed sikayo iray walad kanunotan da, aliwan saray imbagak.

¹⁷ Ibabaga ra lawas ed saray totoo ya ag ondedengel na saray salitak, a maung ya amin so pansumpalan da. Ibabaga rad balang sakey ya anawet so puso to ya ag balut nadiwit na deral.”

¹⁸ Inkuanko balet, “Anggapod sarayan propita so akapikabat ed niamut a kanunotan na Katawan. Anggapod sikaray akadngel odino akatalus ed salita to odino dinmengel o angasikaso ed imbaga na Katawan.

¹⁹ Singa bagyo so pasnuk to, singa makmaksil ya alimbusabos ya ombasig ed kaolowan da ray totoon maoges,

²⁰ tan ag ontonda ya anggad nasumpal toy labay ton gawaen. Diad saray agew ya onsabi natalutalusan ya na saray totoo to.”

²¹ Say Katawan inkuanto, “Ag ko imbaki ira yan propita, balet linma ran siansia. Nampropisiya ra ed ngaran ko anggaman ya anggapoy sinalitak ed sikara.

²² No akabatan da ray niamut a kanununotan ko, ayarian da komun ya impulong so salitak ed saray totook tan atanggoyur da ran mangibeneg ed saray maoges a panagbilay da tan saray maoges a gagawaen da.

²³ “Siak so sakey a Dios a kawalaan toy amin a pasen, aliwan saksakey a pasen labat.

²⁴ Anggapoy toon makaamut ed pasen ya ag kod man nanengneng. Ag yo ta amta a kawalaan koy amin a pasen ed tawen tan diad dalin?

²⁵ Amtak so imbabagbaga na saraman a propita a nampropropisiya na tila ed ngaran ko tan ipapapasen da a walay sinalitak ed sikara diad panamegley na saray kogip da.

²⁶ Kapigan kasiy itonda na sarayan propita ed pamalikdo rad saray totook diad panamegley na dilin tila ra?

²⁷ Abaloan da a diad panamegley na saray ibabaga ran kogip et lingwanan ak na saray totoo, a singa impangilingwan ed siak na saray lalaki ra tan impanlingkur dad kinen Baal.

²⁸ Say propitan walay kogip to nepeg ton ibaga a sakey labat a kogip, balet say propitan walad sikatoy salitak nepeg a matoor ton ipulong. Antoy piparaan na dayami ed ilik?

²⁹ Singa apoy so salitak, tan singa mantilyon manmekmek na saray bato.

³⁰ Sumpa ak ed saray propitan ikana da ray salita na kapara ran propita, insan da ipasen a salitak ira.

³¹ Sumpa ak met ed saray propita a salitaen da ray dilin salita ra, insan da ipasen a nanlapud siak ira yan salita ra.

³² Dengel yo so ibabagak, siak a Katawan! Sumpa ak ed saray propita a mangibabaga na saray kogip da a napnoy tila. Ibabaga da ra yan kogip da tan ibabalang da ray totook diad panamegley na saray panagtila ra tan panagpasirayew da. Ag ko ra imbaki odino ingganggan ya onla. Anggapon balut so nayarian dan itulong ed saray totoo. Siak, say Katawan, so nansalita.”

Say Makabelbelat ed Katawan

³³ Say Katawan inkuantod siak, “Jeremias, no say sakey ed saray totook odino sakey a propita odino sakey a pari et tepeten tod sika, ‘Anto so papaibaga na Katawan?’ ibagam ed sikato, ‘Sakey ka a makabelbelat ed Katawan, kanyan ibantak to ka.’

³⁴ No walay sakey a propita, odino sakey a pari, odino sakey ed saray totook so mangikana na sarayan salita, ‘Say makabelbelat ed Katawan,’ dusaen ko tan say pamilya to.

³⁵ Ingen say nepeg a tepeten na balang sakey a too ed saray kakaaro tan saray kakanayon to saya, ‘Antoy inebat na Katawan? Antoy imbaga na Katawan?’

³⁶ Kanyan ag da la nepeg ya ikana ira yan salita, ‘Say makabelbelat ed Katawan,’ ta no walay mangikana, pansakbaten kon tua na ambelat. Saray totoo pinikewet da ray salita na Dios da, say mabilay a Dios a Katawan a Makapanyarin-amin.

³⁷ Jeremias, tepet mod saray propita, ‘Antoy inebat na Katawan ed sikayo? Antoy imbaga na Katawan?’

³⁸ No ag da onuren so ganggan ko, ta ikana ra yan salita, ‘say makabelbelat ed Katawan,’ ibagam ed sikara

³⁹ ya andi-duaruwan alsaen ko ra, insan ko ra ibantak ed arawi, sikara tan say siudad ya inter kod sikara tan saray lalaki ra.

⁴⁰ Ipelag ko rad andi-anggaan a kababaingan tan kabandayan ya ag balut nalingwanan.”