Jeremias 21 - Maung A Balita Biblia

Nipasakbay so Katalo na Jerusalem

¹ Si Ari Sedekias na Juda imbaki tod siak si Pasur a lakin anak nen Malakias tan si Sofonias, say pari a lakin anak nen Maasias ta impakerew to;

² “Isalitaan mo kami pa ed Katawan, ta babakalen kami nen Ari Nabucodonosor na Babilonia. Angangko manggawa para sikatayo na sakey ed saray milagro to, tan pasooten ton paseneren si Nabucodonosor.”

³ Insan akisalitay Katawan ed siak, tan imbagak ed saramay totoon nibakid siak

⁴ ya ibaga rad kinen Sedekias a say Katawan a Dios na Israel kuanto, “Sedekias, taloen ko ray sondalom a pilalabanen mo sumpad ari na Babilonia tan saray sondalo to. Ibunton kod pegley na siudad iray armas yo.

⁵ Siak a dili so onlaban ed sikayo diad intiron biskeg ko, pasnuk ko, petang na olok, tan sanuk ko.

⁶ Pateyen ko so balang sakey a manaayam ed sayan siudad; ompatey ed makapataktakot a salot iray amin a totoo tan ayayep.

⁷ Balet sika, saray opisyal mo, tan saray totoon ag inatey ed bakal, eras, tan salot et ipadakep ta kayon amin ed Ari Nabucodonosor tan saray kalaban yo a malabay a mamatey ed sikayo. Papatey to kayo nen Nabucodonosor. Anggapoy ikera tod sikayo; ag to kasian odino abageyen so siopaman ed sikayo. Siak, say Katawan, so nansalita.”

⁸ Insan imbaga na Katawan ed siak ya ikuankod saray totoo, “Dengel kayo! Siak, say Katawan, itdan ta kayoy pankanawnawan mampili ed dalan a mamaarap ed bilay odino dalan a mamaarap ed patey.

⁹ Siopamay manayam ed dalem na siudad ompatey ed bakal, eras, odino salot. Balet siopamay ompaway tan onsukod saray taga Babilonia, ya ondodogpa ra natan ed siudad et ag ompatey. Say bilay da labat so nayarian dan iyagel.

¹⁰ Ginetmak la ya ag ko iyagel yan siudad, no ag ta deralen ko. Nipalima ed ari na Babilonia tan poolan ton temeken. Siak, say Katawan, so nansalita.”

Say Sintinsia ed saray Manoley ed Juda

^11-12 Imbagad siak na Katawan ya ikuankod saray manoley ed Juda, saray kabyangay boleg nen Ari David, ira yan salita, “Dengel kayod ibagak, siak a Katawan. Ipakana yon inagew-agew so katonungan. Iyagel yoy toon nasasaol ed lima na manasaol ed sikato. No ag yo ya gawaen, saray maoges a gagawaen yo papetangen day olok tan onliub a singa apoy ya ag naerep.

¹³ Sika, Jerusalem, manyodyorung kad pasen ya atagey nen saray patar, a singa baton-dampay ya atagey nen say palanas a dalin. Balet, siak, say Katawan, labanan ta ka. Ibabagam ya anggapoy makadogpa ed sika odino makaloob ed kawalaan mo.

¹⁴ Balet, dusaen ta ka lapud ginawam. Poolan koy palasiom, tan say apoy temeken to met ya amin iray walad kaliber-liber to. Siak, say Katawan, so nansalita.”