Jeremias 19 - Maung A Balita Biblia

Say Nabtag a Banga

¹ Imbagad siak na Katawan ya onla ak a manaliw na banga. Imbaga tod siak a manawag ak na pigaran mamasiken na saray totoo tan pigaran mamatakken a papari,

² ta itagar ko rad patar na Ben-hinnom diad kapaway na Puirta na Langa. Diman ko ipulong so salita na Katawan ya iter tod siak.

³ Imbagad siak na Katawan ya ikuanko, “Dengel kayo, arari na Juda tan sikayon totood Jerusalem, ed labay kon ibaga, siak a Katawan a Makapanyarin-amin a Dios na Israel. Mangyakar ak ed sayan pasen na deral, et onkaningking so layag na balang sakey a makadngel ed sayan deral.

⁴ Gawaen ko ya, lapud inkaindan ak na saray totoo tan dinotakan da yan pasen diad impangibabagat da dia ed saray arum a diriyos—saray diriyos ya ag da kabat, sikara, saray lalaki ra, o saray ararid Juda. Sayan pasen dinelap da na dala da ray anggapoy kasalanan a totoo,

⁵ tan nampapaalagey iray altar a para si Baal, pian makapampool ira na saray anak dan isaklang a bagat a popoolan. Ag ko ya ingganggan ed sikara; ag balut anggan sinmibang ed kanunotan ko.

⁶ Kanyan sirin, onsabiy panaon a sayan pasen et ag la natawag na Tofet odino Patar na Hinom. Ingen natawag a Patar na Panagpateyan.

⁷ Diad sayan pasen deralen kon amin iray plano na saray totood Juda tan Jerusalem. Panaloen kod sikara iray kalaban da tan pateyen ko rad bakal. Iter kon buagen na saray manok tan saray ayayep ed katakelan iray bangkay da.

⁸ Iyakar kod sayan siudad so onyan makapasinagem a deral pian balang sakey ya ondalan et natalagnaw tan nikelawan.

⁹ Lakoben na saray kalaban da yan siudad tan pateyen da ray totoo to. Makapasinagem a tuloy yan panlakob, kanyan saray totoo kanen da ray anggan anak da tan manaakanan ira.”

¹⁰ Insan imbagad siak na Katawan ya ibetag kod arap na saray totoon akilad siak imay banga,

¹¹ tan ibagak ed sikara a say Katawan a Makapanyarin-amin inkuanto, “Betagen ko ra yan totoo tan sayan siudad a singa pametag ed sakey a banga pian ag lan balut natoop. Saray totoo ipompon da anggan diad Tofet iray inaatey da lapud anggapoy arum a pasen a pangipomponan.

¹² Isisipan ko a gawaen kon singa Tofet yan siudad tan saray manaayam diman.

¹³ Magmaliw a marotak a singa Tofet iray kaabungan ed Jerusalem tan saray kaabungan na saray ararid Juda, tan saray kaabungan a diad saray toktok da so nampopoolan na saray insinson para saray bitewen, tan diman met so angibungan na saray iinomen a bagat ed saray diriyos.”

¹⁴ Insan tinaynan koy Tofet ya angibakian na Katawan ed siak a pangibawagan koy salita to. Linma ak a nanalagey ed patio na Timplo tan imbagak ed amin a totoo

¹⁵ a say Katawan a Makapanyarin-amin a Dios na Israel et inkuanto, “Iyakar ko lad sayan siudad tan diad amin a kaliber-liber to ran baley iray amin a dusan imbagak a gawaen ko, lapud anawet so puso yo tan ag kayo ondengel ed ibabagak.”