Jeremias 18 - Maung A Balita Biblia

Si Jeremias diad Abung na Managgaway Banga

¹ Inkuan na Katawan ed siak,

² “Lakad abung na manggaway banga, ta iparengel kod man ed sikay salitak.”

³ Kanyan linma ak diman tan anengneng kon mankikimey ed dalig to may managgaway banga.

⁴ Kapag naaliwa so bangan kikimeyan to, alaen to may damili tan gawaen ton sananey ya ikakana.

⁵ Insan inkuan na Katawan ed siak,

⁶ “Ag ko ta nagawaan ed sikayo, totood Israel, so singa samay ginawa na manggaway banga ed damili? Bebembenan ta kayod limak a singa pambebemben na managgaway banga ed damili.

⁷ No diad anggan anton panaon ikuankon baguten, ibasig, odino deralen koy dinanman a bansa o nanarian,

⁸ balet kabebekta saman a bansa et ikaindan toy kaogsan to, omanen koy imbagak a kanunotan kon gawaen ed saman a bansa.

⁹ Balet no ikuankon iletneg odino ipaalagey koy dinanman a bansa o nanarian,

¹⁰ balet kabebekta saman a bansa et manggaway kaogsan, omanen koy imbagak a kanunotan ko a gawaen ed saman a bansa.

¹¹ Natan sirin, ibagam ed saray totood Juda tan saray taga Jerusalem a walay getmak a sumpaen ira tan ipaparaan koy panusak ed sikara. Ibagam ed sikara a tondaan da lay maoges a panagbilay da—salatan da lay kabibilay da tan bengatlan gagawaen da.

¹² Say iyebat da, ‘Andi! Akin ey? Paaweten mi so puso mi tan gawaen miy maoges onung na kaliktan mi!’”

Impolisay na saray Totoo so Katawan

¹³ Say Katawan kuanto, “Tepet mod balang bansa: Wala lay agawan singa onya nen saman? Nanggaway makapasinagem a bengatla iray totood Israel!

¹⁴ Nanaandian ta na yilo iray mabaton niatagey a pasen ed Libano? Nanaekatan kasi ray ambetel a kolus ed palandey to?

¹⁵ Balet nilingwanan ak na saray totook; mampopool iray insinso ed saray talintaoy diriyos. Niparokul irad dalan a nepeg dan dalanen, ag da la dadalanen iray gendat a dalan; ondadalan irad saray dalan ya anggapo ray tanda.

¹⁶ Ginawa ran makapataktakot yan dalin, a nabalaw ya anggad angga. Nataktakot ya amin iray ondalan, lapud saray nanengneng da; ipeyeng-peyeng day olo rad pankelaw da.

¹⁷ Ikaykayat kod arap na saray kalaban da iray totook, a singa ra dabuk ya insiplug na dagem a nanlapud bokig. Ibeneg ko ra tan ag ko ra tulongan no onsabiy deral.”

Pankokomplut a sumpad Jeremias

¹⁸ Insan inkuan na saray totoo, “Pankokomplutan tayo lay Jeremias! Wala ray paparin mangibangat ed sikatayo, saray makabat a totoon manimbawad sikatayo, tan saray propitan mangibaga na salitay Katawan. Akusaen tayo, tan tondaan tayo lay ondengel ed ibabaga to.”

¹⁹ Kanyan nampikasi ak, “Katawan, dengel mo pay ibabagak, tan dengel mo no antoy ibabaga da ray totoo nipaakar ed siak.

²⁰ Kaogsan ta so tumang na kamaungan? Balet angotkot iray abut a kapelagan ko. Nunot mo a sinmingger ak ed sika tan insalitaan ko ra nipaakar ed sikara, pian onkepa so pasnuk mod sikara.

²¹ Balet natan, Katawan, gawam pan ompatey ed eras iray anak da; ipapatey mo pa rad bakal. Iyabuloy mo pan nabalo ray bibii tan naandid mundo ray anak da; gawam pan ompatey ed salot iray lalaki, tan diad bakal iray lalakin walad kalangweran.

²² Mangibaki ka pa na olup da ray totoon bigla-biglan mangakokos ed logan na saray kaabungan da; paeyag mo rad takot. Angotkot iray abut a kapelagan ko, tan angyan iray patit a pangerel dad siak.

²³ Balet, Katawan, amtam so pankokomplut dan pamatey ed siak. Ag mo pa pipirdonaen so kaogsan da; ag mo poponasen so kasalanan da. Ipatombam ira diad katalo ra; dusam ira legan a mamapasnuk ka.”