Jeremias 13 - Maung A Balita Biblia

Say Linen a Pantalon a Potut

¹ Imbagad siak na Katawan a manaliw ak na linen a pantalon a potut, insan ko isolung; balet binilin to ak ya ag ko iiyan ed danum.

² Kanyan angaliw ak, insan ko insolung.

³ Insan akisalita lamet so Katawan ed siak. Inkuanto,

⁴ “Lakad Ilog na Eufrates ta iyamut mod abut diad saray baton-dampay imay potut a pantalon.”

⁵ Kanyan linma ak, ta inyamut ko ra ed abay na Eufrates.

⁶ Kalabas na amayamay ya agew imbagad siak na Katawan ya onla ak lamet ed Eufrates, ta alaen ko may pantalon ya impaiyamut tod siak diman.

⁷ Kanyan linma ak lamet ed Eufrates, et nen nalmok imay pasen ya angyamutan kod samay pantalon, anengneng kon aderal tan anggapo lay kana to.

⁸ Insan akisalita lamet so Katawan ed siak. Inkuanto,

⁹ “Onyay paneral kod panagpaatagey na Juda tan say ontan lan panagpaatagey na Jerusalem.

¹⁰ Sarayan totoon maoges et ag ira inmonur ed siak, tan lawas anawet so puso ra tan maoges ira tan inggalang tan nanlingkur irad arum a diriyos. Kanyan sirin, magmaliw iran singa sayan potut a pantalon ya anggapo lay kana to.

¹¹ Kanyan no panoy kaelet ed awak yan potut a pantalon, ontan met so kaelet a labay kon nepeg ya ipeket ed siak na amin a totood Israel tan Juda. Onyay ginawak pian magmaliw iran totook, tan mangiter iray dayew tan galang ed ngaran ko; balet ag da ak inonur.”

Say Garapon a Pananginay Alak

¹² Inkuay Katawan a Dios ed siak, “Jeremias, ibagam ed saray totood Israel a balang garapon et nepeg a napano na alak. Ibaga rad sika ya amta ra a balang garapon et nepeg a napano na alak.

¹³ Insan ibagam ed sikara a siak, say Katawan, pansawaen ko na alak iray totood sayan dalin anggad nabuek ira: saray ari a kabyangan iray boleg nen David, saray papari, saray propita, tan amin a totood Jerusalem.

¹⁴ Insan ko ra panbabasigan a singa saray garapon, matakken may malangwer. Ag nabaat na abagey, panangaro, odino panangasi so pamatey kod sikara.”

Say Pasakbay nen Jeremias Sumpad Panagpaatagey

¹⁵ Totood Israel, nansalita so Katawan! Mampaabeba kayo tan dengel kayod sikato.

¹⁶ Pagalangan yoy Katawan a Dios yo, kasakbayan a mangyakar na kabilongetan, tan natumtumba kayod kapalandeyan; kasakbayan a pagmaliwen ton ambilbilonget so iilaloan yon liwawa.

¹⁷ No ag kayo ondengel, maamut a manakis ak lapud panagpaatagey yo. Manakis ak na ampaipait, tan onagos so luak lapud nalan adakep iray totoo na Katawan.

¹⁸ Inkuan na Katawan ed siak, “Ibagam ed ari tan say ina to ya onakseb iran manlapud trono ra, lapud naplag manlapud olo ra iray marakerakep a korona ra.

¹⁹ Nilakob na saray sondalo iray baley ed abalaten na Juda; anggapo so toon makadalan ed saray baley. Nala ya amin iray totood Juda tan nibantak ira ed arum a bansa.”

²⁰ Jerusalem, nengneng mo! Onsasabin manlapud baybay iray kalaban mo! Kawalaan da ray totoon nipiad sikan asikasoen mo, saray totoom ya ikikinon mo?

²¹ Antoy ibagam no saray totoon abaloan mon kakaarom et dakepen tan oleyan da ka? Manirap kan singa biin manaanak.

²² No tepeten mo no akin et agawad sika ya, no akin et apilat-pilat so kawes mo tan sikay apasoot, say makasengeg et lapud mapalalo so kasalanan mo.

²³ Nasalatan ta na toon andeket so kolor na baog to, odino naekal ta na liopardo so batek na bago to? No nayarian da, naaralan yo, sikayon totood Jerusalem, so manggaway kaptekan, sikayon pasal yoy manggaway kaogsan.

²⁴ Say Katawan ikaykayat to kayon singa taep ya itiktikyab na dagem a manlalapud kabueran.

²⁵ Inkuan na Katawan a sikato yay magmaliw a kapalaran yo; sikato yay ginetma ton gawaen ed sikayo, lapud nilingwanan yo tan nanmatalek kayod saray tila-tilan diriyos.

²⁶ Say Katawan a dili so mamingbingkas na kawes yo, tan iparontal to kayod kababaingan.

²⁷ Anengneng kayo na Katawan ed panggagawa na saray bengatlan kabosul to. Anengneng to kayon tinmotombuk ed saray paganon diriyos diad saray kapokdulan tan saray kaalogan, singa kayo lakin mantitiyam na asawa na kaabay to, odino singa kayo kabayon kalakyan a mangoosil na kabatyan. Totood Jerusalem, pakaskasiy kipapasen yo! Kapigan kasiy pagmaliw yon malinis?