Jeremias 11 - Maung A Balita Biblia

Si Jeremias tan say Sipanan

¹ Inkuan na Katawan ed siak,

² “Dengel mo ra yan ibabaga na sayan sipanan. Ibagam ed saray totood Juda tan saray taga Jerusalem,

³ a siak, say Katawan a Dios na Israel, et insambak so balang sakey ya ag ontotoluk ed saray ibabaga na sayan sipanan.

⁴ Sayan sipanan et ginawak ed saray lalaki ra nen impaway ko rad Egipto, say dalin a singa palbaan na balatyang ed sikara. Imbagak ed sikara ya onuren da ak tan sumpalen da ray ingganggan kod sikara. Imbagak ed sikara a no ontoluk ira magmaliw iran totook tan siak so Dios da.

⁵ Diad ontan sumpalen koy insipan kod saray lalaki ra, ya iter kod sikara so mayaman tan mataban dalin a kayaryan da la natan.” Inkuanko, “Ontan pa komun, Katawan.”

⁶ Insan inkuan na Katawan ed siak, “Lakad saray siudad na Juda tan diad saray dalan na Jerusalem. Ibawag mod man iray salitak, tan ibagam ed saray totood man ya ondengel irad ibabagay sipanan tan onuren da.

⁷ Nen impaway ko ed Egipto iray lalaki ra, masimoon ko ran pinasakbayan ya onuren da ak. Insan ko intutuloy a pinapasakbayan iray totoo ya anggad natan.

⁸ Balet ag ira dinmengel o inmonur. Ingen, balang sakey nansiansian anawet so puso to tan maoges. Ingganggan ko ran ontoluk ed sipanan, balet ag da labay so ontoluk. Kanyan inter kod sikaray amin a dusan nibagad saman a sipanan.”

⁹ Insan inkuan ni na Katawan ed siak, “Onlalaban ed siak iray totood Juda tan saray taga Jerusalem.

¹⁰ Pinawil da ray kasalanan na saray lalaki ran ag tinmoluk ed saray ingganggan kod sikara; angigalang irad saray arum a diriyos. Dineral na saray totood Israel tan Juda so impisipanan kod saray lalaki ra.

¹¹ Lapud saya, siak, say Katawan, papasakbayan ko ra a deralen ko ra tan ag ira makabatik. Tan no sikaray onkerew na tulong ed siak, ag ko ra dengelen.

¹² Diad satan saray totood Juda tan saray taga Jerusalem onla rad saray diriyos dan pangibabagatan da, tan onkerew iray tulong. Balet ag ira nilaban na saratan a diriyos no onsabi yan deral.

¹³ Say karakel na diriyos na saray totood Juda et singa karakel na saray siudad da; tan saray karakel na saray ginagawan altar a panangisaklangan na makapaingungot iran bagat ed kinen Baal na saray taga Jerusalem et singa karakel na saray dalan ed siudad.

¹⁴ Jeremias, ag ka mampipikasid siak odino ipikasim ed siak ira yan totoo. No nagunigon ira, et onkerew irad siak na tulong, ag ko ra dengelen.”

¹⁵ Say Katawan kuanto, “Manggagaway kaogsan iray totoon inararok. Anto sirin so kanepegan dan niwala rad Timplo? Abaloan dan napaer day deral ya onsabid sikara diad panggagawa ra na saray sipan tan diad pangibabagat dad saray ayayep? Makapanliket ira sirin?

¹⁶ Tinawag ko ran aminsan na mabolubolung a kiew na oliba tan amayamay so balibalin bunga to; balet natan, poolan ko ray bolung to diad iterak na singa madalagorug a karul tan lupak-lupaken ko ray sanga to.

¹⁷ “Siak, say Katawan a Makapanyarin-amin, intanem koy Israel tan Juda; balet natan ibabawag kod sikaray dusan panderal ed sikara. Dineral day sikaran dili, lapud nanggawa ray kaogsan; impanpasnuk da ak lapud impanbabagat dad kinen Baal.”

Nankokomplutan dan Pateyen si Jeremias

¹⁸ Impaamtad siak na Katawan so pankokomplut na saray kalaban ko.

¹⁹ Singa ak mauyuyamon kordiro a tetengtengen ed panagpateyan, tan ag ko amtad saman a mamplaplano ray maoges a bengatla. Inkukuanda, “Ibatang tayoy kiew legan a mabona-bona ni; pateyen tayo pian anggapo lay makanunot ed sikato.”

²⁰ Insan nampikasi ak, “Katawan a Makapanyarin-amin, sakey kan matonung a huis; susuboken moy kanunotan tan say liknaan da ray totoo. Iyabuloy mo pan nanengneng ta kan ombawid sarayan totoo, lapud sikay angimatalkan kod kipapasen ko.”

²¹ Labay na saray totood Anatot a pateyen da ak, kanyan imbaga rad siak a pateyen da ak no ituloy koy pampulong kod ngaran na Katawan.

²² Kanyan inkuan na Katawan a Makapanyarin-amin, “Dusaen ko ra! Napatey ed bakal iray lalakin tobun-balo ra; ompatey ed eras iray anak da.

²³ Anggapod sikaray nakeraan no onsabiy panaon ya inggetar kon panusak ed saray totood Anatot.”