Jeremias 1 - Maung A Balita Biblia

¹ Sasalitaen na sayan libro so nipaakar ed imbabaga nen Jeremias a lakin anak nen Hilcias, tan sakey ed saray papari ed baley na Anatot diad dalin nen Benjamin.

² Akisalitay Katawan ed kinen Jeremias nen kumalabintaloy taon na panaarid Juda nen Josias a lakin anak nen Amon.

³ Akisalita lamet ed sikato so Katawan nen arid Juda si Joakim a lakin anak nen Josias. Kayari to ya, amimpiga-pigan akisalitay Katawan ed sikato anggad kumalabinsakey na panaari nen Sedekias a lakin anak nen Josias. Nen kumaliman bulan ed saman a taon, saray totood Jerusalem et nibantak irad arum a bansa.

Say Impanawag na Katawan ed kinen Jeremias

⁴ Inkuan na Katawan ed siak,

⁵ “Kasakbayan ta kan initday bilay pinili ta ka la, tan kasakbayay inkianak mo, pinili ta kan magmaliw a propita ed saray bansa.”

⁶ Insan ko inkuan, “Katawan a Dios, ag ko amtay mansalita; ogaogaw ak ni.”

⁷ Balet inkuan na Katawan ed siak, “Ag mo ibabagan ogaogaw ka; ingen, lakad saray totoon pangibakian kod sika, ta ibagam ed sikaray amin ya igaganggan kod sika.

⁸ Ag ka ontatakot ed sikara, ta wala ak a mangyagel ed sika. Siak, say Katawan, so nansalita!”

⁹ Insan inyonat na Katawan so taklay to, diniwit to ray bibil ko, insan kuantod siak, “Nia, iter kod sika ray nepeg mon salitaen.

¹⁰ Natad sayan agew iiter kod sikay pakaoley ed saray bansa tan saray nanarian, pian sikay mamagut tan mangigeba, maneral tan manalo, mamaalagey tan mangiletneg.”

Saray Duaran Pasingayew

¹¹ Tinepet na Katawan ed siak, “Jeremias, antoy nanenengneng mo?” Inmebat ak, “Sakey a sangay kiew ya almindra.”

¹² Inkuan na Katawan ed siak, “Tua tay imbagam, tan mambabantay ak, pian naimatunan koy pakasumpal na saray sinalitak.”

¹³ Akisalita lamet ed siak so Katawan. Tinepet to, “Anto niy nanenengneng mo?” Inmebat ak, “Nanenengneng kod baybay so sakey a bangan manlelwag so karga to. Ngalngali la onlepwad abalaten so karga to.”

¹⁴ Inkuantod siak, “Say deral a manlapud baybay et ondapod saray amin a manaayam diad sayan dalin,

¹⁵ lapud tatawagen kon ondago ray amin a bansa ed baybay. Saray arari ra ilira ray trono ra diad saray puirta na Jerusalem tan diad kaliber-liber na saray arum a siudad na Juda.

¹⁶ Dusaen ko ray totook lapud nankasalanan ira; inkaindan da ak, nansasaklang iray bagat ed saray diriyos, tan inggagalang da ray ginagawa ran talintaoy diriyos.

¹⁷ Mamparaan ka, Jeremias; laka, ta ibagam ed sikaray amin ya ingganggan kod sikan salitaen mo. Ag ka la natan ontatakot ed sikara; ta no andi, pagmaliwen ta kan lalon ontakot no wadman ka lad sikara.

^18-19 Dengel ka, Jeremias! Onsumpad sika so balang sakey a too ed sayan dalin—saray arari ed Juda, saray opisyal, saray papari, tan saray totoo. Balet natan iitdan ta kay biskeg, pian nasumlang mo ra; magmaliw kan singa siudad ya aliber na padir, singa balatyang a lusek, tan singa gansan padir. Ag da ka natalo, ta wala ak ed sika a mangyagel ed sika. Siak, say Katawan, so nansalita.”