Isaias 63 - Maung A Balita Biblia

Say Impanalo na Katawan ed saray Bansa

¹ “Siopa yay onsasabin nanlapud siudad na Bozra ed Edom? Siopa yay mapagalang ya akakawes na ambal-balanga, a manaakar a sankataruk toy pakayari tan biskeg?” Sikato so Katawan, makapanyarin mangilaban, ya onsasabin mangibawag na pananalo to.

² “Akin et ambalbalangay kawes to, singa kawes na toon manggagatin na ubas a gawaen ya alak?”

³ Say Katawan ebat to, “Ginagatinan kon singa ubas iray bansa, et anggapoy dinmagon tinmulong ed siak. Ginagatinan ko rad pasnuk ko, et awalwalsikan na dala so intiron kawes ko.

⁴ Ginetmak a sinmabi lay panaon na pangilaban kod saray totook; panaon la a panusa ed saray kalaban da.

⁵ Mankelaw ak nen ninmengneng ak tan anengneng kon anggapoy ontulong ed siak. Balet pinabiskeg ak na pasnuk ko tan siak a diliy analo.

⁶ Diad pasnuk ko ginagatinan ko ray amin a bansa tan tinetemek ko ra. Imbung kod dalin so dala ra.”

Say Kaabigan na Katawan ed Israel

⁷ Salitaen ko so ag mangoman a panangaro na Katawan; Idadayew ko lapud amin a ginagawa ton para sikatayo. Daakan so impamindision tod saray totood Israel lapud panangasi tan say ag mangoman a panangaro to.

⁸ Say Katawan kuanto, “Sikaray totook; ag da ak palikdoen.” Kanyan inlaban to rad

⁹ amin a kairapan da. Aliwan anghil, no ag ta say Katawan, so angilaban ed sikara. Lapud panangaro tan panangasi to dinondon to ra. Nen imbeneg iran panaon inaasikaso to ra lawas,

¹⁰ balet sinumpa ra tan pinaermen da so masanton ispiritu to. Kanyan nagmaliw a kalaban da so Katawan tan nilabanan to ra.

¹¹ Balet kabebekta anunotan da ray apalabas ya agew nen Moises ya aripen na Katawan, tan tinepet da, “Iner natan so kawalaan na Katawan ya angilaban na saray pangulo da ray totoo to ed kalener dad dayat? Kawalaan na Katawan ya angiter ed kinen Moises na ispiritu to?

^12-13 Kawalaan na Katawan a diad pakayari to et nanggawa na saray ankabaleg a pakelaw diad panamegley nen Moises, binelsay toy danum ed dayat tan inwanwan ton binmaliw iray totoo to ed aralem a danum, pian makagamur na ag manganggan kagalangan to?” Diad panangiwanwan na Katawan, singa ra kabayod katakelan ya ag balut natumba.

¹⁴ Say Katawan impanpainawa to ra tan singa ra bakan niakar ed patar a malambut a pastolan. Inwanwan to ray totoo to tan diad onya apagalangan so ngaran to.

Pankerew na Panangasi tan Tulong na Dios

¹⁵ Katawan, manlapud tawen a panaayaman mo ed inkasantom tan kagalangan mo, nengneng mo kami pa. Iner so kawalaay baleg a panangimasakit mod sikami? Iner so kawalaay pakayarim? Kawalaay panangarom tan panangasim? Ag mo kami pa ibebeneg.

¹⁶ Sika so ama mi. Ag kami bibirbiren na saray lalaki min di Abraham tan Jacob, balet sika, Katawan, so ama mi; sika lawas so mangyaagel ed sikami.

¹⁷ Akin et abuloyan mon nabalangan mi ray dalan mo? Akin et papaaweten moy olo mi, pian nibeneg mi ka? Pawil ka pa, makasengeg ed saray totoon manlilingkur ed sika, saray totoon kayaryan mo lawas.

¹⁸ Sikami ran masanton totoom et apataynan kami ya agano na saray kalaban mi; ginagatinan day santuariom.

¹⁹ Ipapasen mon singa ag mo kami inoleyan a balut, singa ag kamin balut totoom.