Isaias 59 - Maung A Balita Biblia

Binosul na Propita iray Kasalanan na Totoo

¹ Ag yo nununoten a say Katawan et makapoy, kanyan ag to kayo nilaban odino telek, kanyan ag to kayo narengel no onkerew kayoy tulong!

² Saray kasalanan yo so makasengeg na ag to idengel ed sikayo. Saray kasalanan yo so mamapasian ed sikayo ed Dios no mangigalang kayod sikato.

³ Nankasalanan kayod panagtila yo, panagduksa yo, tan panagpatey yoy too.

⁴ Mangisesegep kayoy kaso ed korti, balet andi kayo ed katonungan. Saray tila so panmamatalkan yod panalo yo. Papasakitan yo ray arum a totoo diad panggagawa yod saray maoges a plano yo.

^5-6 Aliling day iknul na nanditan oleg iray maoges a pankokomplut yo. Ompatey so mangan na iknul, ta no teraken mo oleg so ompaway! Anggapoy kaabigan a niiter ed sikayo na saray pankokomplut yo—singa ra andi-kakanaan a kawes a ginawad linat na genggeng!

⁷ Maoges lawas iray plano yo, tan agaylay siglat yon manumpal. Bengat-bengat kayon mamapatey na saray totoon anggapoy kasalanan. Deral tan bagbag so ititilak yo ed inerman a laen yo,

⁸ tan maatap so bilay na amin a too no siber-siber kayo. Andid katonungan iray amin a gagawaen yo. Pikewet a dalan so totombuken yo, tan maatap so bilay na amin a manakar ed satan a dalan.

Impatwa na saray Totoo so Kasalanan da

⁹ Saray totoo kuanda, “Amta tayo la natan no akin et ag itayo iyagel na Dios ed saray mamapairap ed sikatayo. Pampipilalekan tayoy liwawan pankurangan, balet bilonget labat ya amin so wala,

¹⁰ tan solingsoling itayon singa tayo bulag. Nipapatakba itayo anggan kagkaagwan; singa itayo manaakar ed labi, singa tayo walad ambilonget a pasen a panaayaman da ray inaatey.

¹¹ Ataktakot tan maerermen itayo. Pampipirawatan tayon say Dios ilaban to itayod kakairapan tan kalalames tayo, balet anggapoy naalagar tayo.

¹² “Katawan, amayamay iray kaogsan a ginagawa mi sumpad sika. Aakusaen kami na saray kasalanan mi. Malinew so pakaamta mid saray kasalanan mi.

¹³ Sinmumpa kamid sika, impolisay mi ka, tan ag mi ka inonur. Pinapairap mi ray arum tan inmarawi kamid sika. Pikewet iray kanunotan mi; tila ray salita mi.

¹⁴ Apaarawi lay inkatonung, tan ag makaasingger lay kaptekan. Niparokul ed plasa so katwaan, tan anggapod may pasen na inkatoor.

¹⁵ Nanaandipat lay amin ya inkatoor kanyan siopamay ontondan manggaway kaogsan et sikato so panggawaan day kaogsan.” Anengneng ya na Katawan, et naermenan lapud inkaandi na inkatonung.

Imparaan na Katawan so Pangyagel tod saray Totoo to

¹⁶ Mankelaw ed impakanengneng to ya anggapoy ontulong ed saray napapairap. Kanyan ipakana toy dilin pakayari to ed pangyagel tod sikara tan say panalo to.

¹⁷ Isolung ton singa kawes a mital ed pagew to so inkatonung, tan singa hilmit so pakayarin mangilaban. Kawesan toy sikaton dili na ontan lan pampilalek a mametek ed saray pikewet tan say panusa tan pamales ed saray maoges a paniirapan na saray totoo.

¹⁸ Dusaen to ray kalaban to onung ed saray ginawa ra, pati saray manaayam ed saray arawin dalin.

¹⁹ Amin a totoo, manlapud bokig ya anggad sagur, takotan day Katawan tan say baleg a pakayari to. Onsabi a singa maples ya ilog, singa mabiskeg a dagem.

²⁰ Say Katawan kuantod saray totoo to, “Onla ak ed Jerusalem a mangyagel tan mangilaban ed amin yon angibeneg ed saray kasalanan yo.

²¹ Saya so pisisipanan kod sikayo: Initdan ta kayo na pakayarik tan inyawat ko ray bangat kod sikayo a kayaryanen yo ra ed anggad angga; et manlapud natan ya anggad angga nepeg ya onuren yo ak tan ibangat yo ray anak yo tan saray kabyangay boleg yo ya onuren da ak.”