Isaias 57 - Maung A Balita Biblia

Kabosul na Dios so Pididios na Israel ed saray Talintao

¹ Ompatey iray matonung, et anggapoy toon makatalus odino mangabagey. Balet no ompatey ira, anggapo lay makasigensigen ed sikara.

² Ta diad ipatey na saray totoon matonung nagamuran day kareenan tan inawa.

³ Dago kayo dia a pasintinsiaan, sikayon makasalanan! Anggapoy pidomaan yod saray managanito, managkalugoran, tan saray marotak a bibii.

⁴ Siopay luludlureyen yo? Sikayon matitila, siopay kakantiawan yo?

⁵ Igagalang yo ray diriyos na inkabona diad panaakdulan yod silong na saray masanton kiew yo. Ibabagat yo ray anak yo diad saray ongib na ankakabaleg a bato diad gilig na saray kolus.

⁶ Mangaala kayod man na saray pino-pinon bato, insan igagalang yo ran diriyos. Iibungan yo ra na alak a pinagkabagat ed sikara tan iyaakaran yo ra na saray bagat a trigo. Abaloan yon napapaliket yo ak ed saraya?

⁷ Kalab-kalab kayod tagey na kapalandeyan a mangisaklang diman na saray bagat tan diman kayo met manaakdulan.

⁸ Ililira yod saray beneg na kaput yo iray mabanbanday a talintao yo. Ikakaindan yo ak; manlalabus-lakseb kayo, insan kayo onsasapat ed saray ankakabaleg a katri yo a kaiba yo ray kainarowan yon uupaan yo tan diman yo ra aakdulan. Diman yo pepeneken so kaliktan na laman yo.

⁹ Popoyukan yoy laman yo na saray nandoroman pabalingit, insan kayo mangigalang ed dios a Moloc. Diad pananap yo na saray diriyos ya igalang yo, mangibabaki kayod ararawin pasen, ya anggan diad pasen a panaayaman da ray inaatey.

¹⁰ Pakekesawen yoy sikayon dili diad panaanap yo na arum a diriyos, balet ag yo totondaan so mananap. Nununoten yo a pabibiskegen kayo na saray mabambanday a talintao yo, kanyan ag kayon balut nakekesawan.

¹¹ Say Katawan kuanto, “Siopa ra yan diriyos a mamapatakot ed sikayo, kanyan tilatilaan yo ak tan sigput yo ak lan lilingwanan? Tinondaan yo lay pangigagalang yod siak lapud abayag ak ya ag oneseesel?

¹² Abaloan yo a maung so gagawaen yo, balet iparontal koy kagagawa yo, et ag kayo natulongan na saray talintao yo.

¹³ No onkerew kayoy tulong, pailaban kayod saratay talintaoy diriyos yo. Diad sakey a siplug na dagem, nibantak ira! Balet saray manmamatalek ed siak et nakayaryan day dalin tan igalang da ak ed Timplok.”

Insipan na Dios so Ontulong tan Mamaabig

¹⁴ Say Katawan kuanto, “Papawil yod siak iray totook. Ekal yo ray amin a makasbel ed dalanen da! Manggawa kayoy dalan tan iparaan yo!

¹⁵ “Siak so atagey tan masanton Dios a mambibilay ed ando lan ando. Manaayam ak ed atagey tan masanton pasen, balet manaayaman ak met ed kawalaan da ray mapaabeba tan magbabawin totoo, pian nipawil koy biskeg na linawa ra tan say ilalo ra.

¹⁶ Initdan ko na bilay iray totook, tan ag ko ituloy so pangakusak ed sikara odino pamasnuk kod sikara ed ando lan ando.

¹⁷ Akapasnuk ak ed sikara lapud kasalanan da tan say inkaagom da, kanyan dinusak ira tan inkaindan ko ra. Balet anawet so olo ra tan intuloy dan inonur so labay da.

¹⁸ “Anengneng koy ginagawa ra, balet paabigen ko ra. Iwanwan ko ra tan tulongan ko ra, ta ligliwaen ko ray maermen.

¹⁹ Itdan ko ran amin na kareenan, amin da ray walad arawi tan saray walad asingger! Paabigen ko ray totook.

²⁰ Balet saray totoon maoges singa ra madaluyon a dayat, a dotak tan linang so isasakbit da.

²¹ Anggapoy kareenan da ray makasalanan,” kuay Katawan.