Isaias 56 - Maung A Balita Biblia

Amin a Bansa Napisakop ed Olupan na saray Totoo na Dios

¹ Say Katawan kuantod saray totoo to, “Gawa yo so katonungan tan kaptekan, ta ag mabayag ilaban ta kayo.

² Bindisionan ko ray totoon ngingilinan da lawas so Agew na Panagpainawa tan ag da susumlangen so ganggan nipaakar ed sayan agew. Bindisionan ko ray ag manggagawa na antokaman a kaogsan.”

³ Say toon taga arum a bansa ya akikasakey ed saray totoo na Katawan et ag to nepeg ya ikuan, “Say Katawan ag to ak pangigalangen a kaibak iray totoo to.” Say toon kapun ag ton balut nepeg a nunoten a lapud ag to makaanak et ag to makapikasakey ed saray totooy Dios.

⁴ Say Katawan kuantod satan a too, “No ngilinan moy Agew na Panagpainawa tan gawaen moy makapaliket ed siak tan matoor mon sumpalen so impisipanan ko,

⁵ nanunotan ed Timplok tan diad saray totook so ngaran mo. Mabayag ni so pakanunot ed sika nen say no wala ray anak mon lalaki tan bibii. Ag kan balut nalingwanan.”

⁶ Say Katawan kuantod saray sangkailin nagmaliw a kabyangan na saray totoo na Katawan, a mangaaro tan manlilingkur irad sikato, ngingilinan day Agew na Panagpainawa, tan matoor dan susumpalen so impisipanan to:

⁷ “Iyakar ta kayod Sion, say masanton palandey ko, panliketen ta kayo ed dalem na abung kon panagpikasian, tan awaten ko ray bagat ya isaklang yod altar ko. Natawag so Timplok ya abung na panagpikasian na saray totoo ed amin a bansa.”

⁸ Say Katawan a Dios ya angisempet ed saray totoo ton Israel manlapud saray bansan nibantakan da et insipan to a pikasakeyen to nid sikara iray arum a totoo.

Adusa ray Pangulo na Israel

⁹ Say Katawan imbaga tod saray arum a bansa ya ondago ran singa saray ayayep ed takel tan buagen da ray totoo to.

¹⁰ Kuanto, “Amin da ray pangulo a kanepegan day mamasakbay komun ed saray totook et bulag ira! Anggapoy amta ra. Singa ra bantay ya aso ya ag makadangul—mandokdokul ira labat a mankogkogip. Agaylay panlabay dan onogip!

¹¹ Singa ra masisiban aso ya ag balut napepesel. Anggapoy pakatalus da ra yan pangulo. Gagawaen na balang sakey ed sikara so labay to tan say dilin pankaabigan to so aanapen to.

¹² Sarayan bueken kuanda, ‘Mangala tayoy alak tan maninom tayoy laba-labay tayo! Nabwas lalon maliket tayo, ta dakel niy alak a nainom tayo nen say natan.’”