Isaias 55 - Maung A Balita Biblia

Iyapay na Dios so Panangasi to

¹ Say Katawan kuanto, “Dago kayo, amin yon napgaan—niay danum! Dago kayo, sikayon anggapoy kuarta— manaliw kayoy trigo tan mangan kayo! Dago kayo! Manaliw kayoy alak tan gatas— anggapoy nepeg yon bayaran!

² Akin et gagastosen yoy kuarta yo ed antokaman ya ag makapenek? Akin et gagastosen yoy suildo yo, et siansian narasan kayo? Dengel yo ak tan gawa yoy ibabagak, et manliket kayo ed sankananaman iran kakanen.

³ “Dengel kayo natan, sikayon totook, tan dago kayod siak; dago kayod siak et nawalaan kayoy bilay! Ando lan andoy pisipanan kod sikayo tan iter kod sikayoy bindision ya insipan kod kinen David.

⁴ Ginawak a pangulo tan manoley si David ed saray bansa, tan diad panamegley to impanengneng kod sikaray pakayarik.

⁵ Tawagen yo natan iray arum a bansa; ag da kayo amta nen saman, balet natan mambabtik iran ondago a mikasakey ed sikayo! Siak, say Katawan a Dios yo, say masanton Dios na Israel, so makaoley ed pakasumpal ed saya; itdan ta kayo na kagalangan tan dayew.”

⁶ Pawil kayod Katawan tan mampikasi kayod sikato, natan ta asingger ni.

⁷ Saray makasalanan a totoo et ibeneg da komun so kabibilay da tan omanen day panagnunot da. Ompawil ira komun ed Katawan a Dios tayo, ta mapangasi tan sipaparaan a mamirdona.

⁸ Say Katawan kuanto, “Saray kanunotan ko et aliwan singa saray kanunotan yo, tan saray kagagawak et aliwan singa saray kagagawa yo.

⁹ No panoy kaatagey na saray katawenan ed mundo, ontan met so kaatagey na saray kagagawa tan saray kanunotan ko ed saray kagagawa tan saray kanunotan yo.

¹⁰ “Say salitak ed singa yilo tan singa oran ya ompepelag a manlapud tawen a manalog ed dalin. Patutuboen da ray tanaman a mangiiter na bokel ya itanem tan say bunga a kanen.

¹¹ Ontan met so pagmaliwan na salitan ibabalikas ko— ag ompawil ed siak ya anggapoy agawaan to; sumpalen toy antokaman a ginetmak tan gawaen toy angibakian kon gawaen to.

¹² “Maliket kayon ontaynan ed Babilonia; mareen kayon nipaway ed siudad. Mankanta ray kapalandeyan tan saray kapokdulan, tan mantipak ed liket iray kakiewan.

¹³ Ontubo ray kiew a sipris ed pasen a kawalaan da ray sabitan natan; ontubo ray kiew a mirtil ed pasen a totobuan natan na saray ambabaing. Sikato yay tanda a mansiansia lawas, sakey a tanda a mangipanunot ed ginawak, siak a Katawan.”