Isaias 52 - Maung A Balita Biblia

Iyagel na Dios so Jerusalem

¹ Jerusalem, mampabiskeg ka tan mampatalonggaring ka lamet! Masanton siudad na Dios, kawesan moy sikan dili na kagalangan! Ag lan balut looban na saray pagano iray puirtam.

² Pokpokan moy dabuk ed sikan dili, O Jerusalem! Bangon kad dabuk tan yorung kad tronom! Okbar yoy golunggolung ya akasinger ed sikayo, sikayon adakep a totood Sion!

³ Say Katawan a Dios kuantod saray totoo to, “Nen nagmaliw kayon aripen, anggapoy kuartan imbayar; ontan met anggapoy kuartan ibayar diad panondon ed sikayo.

⁴ Nen linma kayon nanayam a sangkaili ed Egipto, linma kayod dilin linawa yo; balet say Asiria inala to kayod pasootan tan anggapo so antokaman ya imbayar to.

⁵ Natan say agawad sikayod Babilonia et singa samay agawa lad sikayo nen saman; aripen kayo, balet anggapoy antokaman ya imbayar. Saray manooley ed sikayo et mapaatagey tan malastug ira tan lawas dan ipapanengneng so ag da pangingalngalep ed siak.

⁶ Onsabiy agew a birbiren yon siak so Dios tan siak so akisalita ed sikayo.”

⁷ Agaylay abig a nengnengen so ibabaki ya onsasabin bebeltangen toy kapalandeyan a taruk toy maung a balita, say balita na kareenan! Ibabawag toy pananalo tan kuantod Sion, “Ari so Dios mo!”

⁸ Maneeyag iray mangguaguardiad siudad, mambabansag iran oneeyag lapud liket. Nanengneng dad dilin mata ra so ipapawil na Katawan ed Sion.

⁹ Ikasil yoy pankanta yo lapud liket, sikayo ran deral-deral na Jerusalem! Ta say Katawan iyagel toy siudad to tan ligliwaen to ray totoo to.

¹⁰ Ikana na Katawan so masanton pakayari to; ilaban to ray totoo to, tan nanengneng ya na sankamundoan.

¹¹ Ag yo sasaewen a taynan so Babilonia, amin yon umaawit na saray kagawaan na Timplo. Ag yo didiwiten so antokaman a marotak onung ed ganggan; pansiansia yon masanto so sikayon dili tan taynan kayo.

¹² Ag kayo natan nepeg ya ontaynan a magangganat; ag yo ipapasen ya onlilimot kayon ontaynan. Say Katawan a Dios yo so mangiwanwan ed sikayo tan mangyagel ed sikayod amin a dapag.

Say Maniirap ya Aripen

¹³ Say Katawan kuanto, “Maung so kasumpalay kimey na aripen ko; ontan lay kitanduro tan kigalang to.

¹⁴ Amayamay iray atalagnaw nen anengneng day aripen ko; asugat-sugat so intiron laman to kanyan singa aliwa lan tooy nengneng to.

¹⁵ Balet natan amayamay a bansay mankelaw ed sikato, tan diad pankelaw da ray arari ag ira makaskasel. Nanengneng tan natalusan day ag da ni akabatan nen saman.”