Isaias 50 - Maung A Balita Biblia

¹ Say Katawan kuanto, “Abaloan yo amon pinataynan ko ray totook a singa sakey a lakin angisian na asawa to? Kawalaan sirin na saray kasulatan na impansian? Abaloan yo amon inlako ta kayo ed inkadakep a singa sakey a too ya inlako ton aripen iray anak to? Andi, adakep kayod arawi lapud saray kasalanan yo; apataynan kayod arawi lapud saray kaogsan a ginagawa yo.

² “Akin et ag inmebat iray totook nen linma ak a mangilaban ed sikara? Akin et ag ira inmebat nen tinmawag ak? Makapoy ak ta a mangilaban ed sikara? Diad sakey a ganggan ko napaekat koy dayat tan magmaliw a kalawakan iray ilog, et ompatey iray sirad man lapud kakulangay danum.

³ Nayarian kon pagmaliwen ya ambilonget so tawen, a singa walay paneermenan ton inatey.”

Say Katotoluk na Aripen na Katawan

⁴ Imbangat na Katawan a Dios ed siak so salitaen ko, pian napabiskeg ko so linawa na toon mapaga. Kapag kabwasan iitdan to ak na pilalek ya ondengel ed ibangat to.

⁵ Say Katawan initdan to ak na pakatalus, et ag ak linmaban ed sikato odino inarawian ko.

⁶ Intaryak so beneg ko ed saray nansiplat ed siak. Ag ko ra binaat nen pinabaingan da ak, nen binagut da ray balbas ko tan nilulukdaan day lupak.

⁷ Balet ag ak nasakitan na saray panamabaing da lapud tutulongan ak na Katawan a Dios. Pinakapal koy lupak pian nitepel ko ra. Amtak ya ag ak napelag ed kababaingan,

⁸ lapud asingger so Dios, tan paneknekan ton anggapoy kasalanan ko. Wala kasiy siopaman a makatepel a mangakusa ed siak? No wala, onla kamin dua ed korti, ta iparontal toy pangaakusaan tod siak.

⁹ Say dilin Katawan a Dios so mangyaagel ed siak— siopa sirin so makapaneknek a siak so nankasalanan? Naandipat ya amin iray mangaakusad siak; naandipat iran singa abel ya inoput na taboney.

¹⁰ Amin yon mangigagalang ed Katawan tan mangoonur ed saray salita na aripen to, nayarin ambilonget a tua so dadalanen yo, balet manmatalek kayod Katawan, ipia yod Dios so bilay yo.

¹¹ Sikayon mankokomplut a maneral ed saray arum et naderal kayo ed saray dilin komplut yo. Say dilin Katawan so mangyabuloy ya onyay nagawa; makapasinagem so pansumpalan yon kairapan.